ކްލަބުތަކަށް ފައިސާ ދޭނެކަމުގެ ޔަގީންކަން ދީފައެއް ނުވާނެ: މަހްލޫފް
ކްލަބްތައް ވަނީ މާލީ ގޮތުން އެހީއަށް ބޭނުން ވެފައި
ޔޫތް މިނިސްޓަރ މަހްލޫފް
ސަރުކާރުން ކްލަބުތަކަށް ފައިސާ ދޭނެކަމުގެ ޔަގީންކަން ދީފައި ނުވާނެ ކަމަށް ކުޅިވަރާ ބެހޭ ވަޒީރު ވިދާޅުވެއްޖެއެވެ.
މިނިސްޓަރ މަހުލޫފް ވިދާޅުވީ ފުރަތަމަ ޑިވިޒަންގެ ކްލަބުތަކަށް ތިން މިލިއަން ރުފިޔާ ދިނުން އެއީ މި ސަރުކާރުގެ ވިސްނުމެއް ނޫން ކަމަށާއި މީގެ ކުރިން ވެސް ފުޓުބޯޅަ ފޯރިއާއެކު ކުޅުނީ ތިން މިލިއަން ރުފިޔާ ސަރުކާރުން ދީގެން ނޫންކަމަށެވެ.
މިނިސްޓަރ މިހެން ވިދާޅުވިއިރު ސަރުކާރުން ނިމިދިޔަ ސީޒަނުގައި ވަނީ ފުޓުބޯޅަ ކުރިއެރުވުމަށް ކަމަށް ބުނެ ދައުލަތުގެ ކުންފުނިތައް މެދުވެރިކޮށް ފުރަތަމަ ޑިވިޒަނުގައި ކުޅޭ ކްލަބުތަކަށް ތިން މިލިއަން ރުފިޔާ ދީފައެވެ.
ފުރަތަމަ ޑިވިޒަނުގެ ކްލަބުތަކުންދަނީ ސަރުކާރުން މީގެ ކުރިން ދެމުން އަންނަ ތިން މިލިއަން ރުފިޔާ ނުލިބޭތީ ކަންބޮޑުވުން ފާޅުކޮށްފައެވެ. އަދި މީގެ ތެރެއިން ބައެއް ކްލަބުތަށް އިނދަޖެހުމާއި ގާތަށް އައިސްފައި ވާއިރު އެންމެ ފަހުގެ ޗެމްޕިއަން ޓީސީ އަދި ވިކްޓްރީ ސްޕޯޓްސް ކްލަބުން އަންނަނީ ލީގުގެ ދެވަނަ ބުރުގައި ކުޅެވޭނެ ކަމާއި މެދު ސުވާލު އުފެދިފައެވެ.
މިނިސްޓަރ އިތުރަށް ވިދާޅުވީ ފުޓުބޯޅަ ކުރިއެރުވެން އޮތީ އަތޮޅު ތެރޭގައި ފުޓުބޯޅަ ކުރިއަރުވައިގެން ކަމަށާއި ބޭނުން ވަނީ ކްލަބުތަކަށް ފަހި ގޮތްގޮތް ހޯދުމަށް ކަމަށާއި އަދި ޓީމުތަކާއެކު އޮތް ގުޅުން އިތުރަށް ރަނގަޅު ކުރުމަށް ކަމަށެވެ. އެގޮތުން ނިއުރޭޑިއަންޓަށް ދިމާވެފައިވާ މައްސަލަ ހައްލުކޮށްދިނުމަށް ވަރަށް ބޭނުންވާ ކަމަށާއި ނަމަވެސް ބަޔަކު ހާވައިފައިވާ ހަޑިއެއްގެ ޒިންމާ ސަރުކާރުން ނުނަގާނެ ކަމަށް މިނިސްޓަރ ވިދާޅުވިއެވެ.
