އަންނަ ސީޒަނުގައި ވެސް ރެއާލް ކުޅުންތެރިޔެއްގެ ގޮތުގައި އެ ޓީމަށް ކުޅެމުން އަންނަ ސްޕެއިންގެ މިޑްފީލްޑަރު އިސްކޯ ދެމިހުންނާނެ ކަމުގެ ޔަގީންކަން އެ ޓީމުގެ ކޯޗު ޒައިނުއްދީން ޒިދާން ދީފިއެވެ.

އާޖެންޓީނާއާ ދެކޮޅަށް ސްޕެއިން ކުޅުނު އެކުވެރި ކަމުގެ މެޗު އެ ޓީމުން 6-1 އިން ކާމިޔާބުކުރި އިރު އިސްކޯ ވަނީ އެ މެޗުގައި ހެޓްރިކެއް ހަދާފައެވެ. ސްޕެއިންގެ ގައުމީ ޓީމަށް އިސްކޯ މޮޅު ކުޅުމެއް ދައްކަމުން އަންނައިރު އޭނާއަށް މި ސީޒަނު ރެއާލް މެޑްރިޑްގެ ޓީމުން ފުރުސަތު ދެމުން އަންނަނީ ވަރަށް މަދުންނެވެ. އެ މެޗަށް ފަހު ވާހަކަ ދައްކަމުން އިސްކޯ ބުނީ ސްޕެއިންގެ ކޯޗު އޭނާއަށް އިތުބާރު ކުރާ ކަމަށާއި އެހެން ނަމަވެސް ޒިދާން އޭނާއަށް ފުރުސަތު ނުދެނީ އޭނާއަށް އިތުބާރު ނުކުރާތީ ކަމަށް އެކަށީގެންވާ ކަމަށެވެ.

ހުކުރު ދުވަހު ނޫސްވެރިންނާއި ވާހަކަ ދައްކަމުން ޒިދާން ބުނީ އޭނާއަކީ ވަރަށް އިންސާފުވެރި މީހެއް ކަމަށާއި އެއީ އިސްކޯއަށް ގޯސްކޮށް ބުނެވުނު ވާހަކައެއް ކަމަށެވެ. އޭނާ ބުނީ ސްޕެއިންގައި އިސްކޯއަށް ދީފައި ވަނީ ތަފާތު ރޯލެއް ކަމަށާއި އެހެން ނަމަވެސް ރެއާލްގައި ވެސް އޭނާއަކީ މުހިންމު ކުޅުންތެރިޔެއް ކަމަށެވެ. ޒިދާން ބުނީ ކޮންމެ ކުޅުންތެރިޔަކު ވެސް ގިނަ މެޗު ކުޅެން ބޭނުންވާ ކަމަށާއި އިސްކޯއަށް ފުރުސަތު ނުދެވުނު ކަމުގައި ވިޔަސް އޭނާއަކީ ޓީމުގައި ވަކި މަގާމެއް ލިބިފައިވާ ކުޅުންތެރިޔެއް ކަމަށެވެ.

ޒިދާން ބުނީ އޭނާގެ ވަޒީފާއަކީ ކޮންމެ މެޗެއްގައި ވެސް ކުޅޭ އެގާރަ ކުޅުންތެރިން ޓީމަށް ހޮވުން ކަމަށާއި އިސްކޯއާ މެދު އެއްވެސް ހިތްހަމަނުޖެހުމެއް ނެތް ކަމަށެވެ. އިސްކޯއަށް ފުރުސަތު ނުލިބުމުގައި އޭނާގެ އެއްވެސް މައްސަލައެއް ނެތް ކަމަށާއި އޭނާ ކުޅޭ ކޮންމެ މެޗެއްގައި ވެސް ޓީމަށް އޭނާ 100 އިންސައްތަ ދޭ ކަމަށެވެ. އިސްކޯގެ މަސައްކަތާމެދު ވަރަށް ހިތްހަމަޖެހޭ ކަމަށާއި 25 ކުޅުންތެރިންގެ ސްކޮޑަކުން އެގާރަ ކުޅުންތެރިން ޓީމަށް ހޮވުމަކީ ކޮންމެ ކޯޗަކަށް ވެސް އުނދަގޫވާނެ ކަމެއް ކަމަށް ޒިދާން ބުނެފައިވެއެވެ.

މީގެކުރިން ނޫސްވެރިންނާއި ވާހަކަ ދައްކަމުން ޒިދާން ބުނީ އަބަދު ވެސް ޓީމުގައި ތިބޭ ކުޅުންތެރިންނަށް އިތުބާރު ކުރާ ކަމަށާއި ޓީމު ހަމަ މަގަށް އެޅުވުމަށް ކުރަންޖެހޭ ކަންކަން ވަރަށް ރަނގަޅަށް އެނގޭ ކަމަށެވެ. ޒިދާން ބުނީ އިސްކޯއަކީ މީގެކުރިން ވެސް މޮޅު ކުޅުމެއް ދެއްކި ކުޅުންތެރިޔެއް ކަމަށާއި ކުރިޔަށް އޮތް ތަނުގައި ވެސް އޭނާ އެ ކުޅުން ދައްކާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. ޒިދާން ބުނީ ރެއާލްގައި އިސްކޯ މަޑުކުރަން ބޭނުންވާ ކަމަށާއި އުއްމީދަކީ އިސްކޯގެ މުޅި ކެރިއަރު ވެސް ރެއާލްގައި ހޭދަކުރުން ކަމަށެވެ.

މިދިޔަ ސީޒަނުގެ ފަހު ބައިގައި ރެއާލްގައި އެންމެ މޮޅު ކުޅުމެއް ދެއްކި ކުޅުންތެރިޔަކީ އިސްކޯއެވެ. އޭނާގެ މޮޅު ކުޅުމާއެކު ރެއާލްއިން ޗެމްޕިއަންސް ލީގާއި ސްޕެނިޝް ލަލީގާ ކާމިޔާބުކުރިއިރު އިސްކޯ ވަނީ މި ސީޒަނުގައި ރެއާލްއަށް 36 މެޗު ކުޅެދީފައެވެ. އޭގެ ތެރެއިން 25 މެޗުގެ ފުރަތަމަ އެގާރައިން އޭނާއަށް ފުރުސަތު ލިބުނުއިރު އޭނާ ވަނީ 11 މެޗެއްގައި ބެންޗުން ކުޅެން ނުކުމެފައެވެ. އެ މެޗުތަކުގައި އޭނާ ވަނީ މޮޅު ކުޅުމެއް ދައްކައި އެ ޓީމަށް ހަ ލަނޑު ޖަހައިދީފައެވެ.

އޭނާ ހޯދުމަށް މެންޗެސްޓާ ސިޓީއިން މަސައްކަތްކުރަމުންދާ ކަމަށް ރިޕޯޓުތައް ބުނެއެވެ.