އަންނަ ޖޫން މަހު ރަޝިއާގައި ފެށުމަށް ހަމަޖެހިފައިވާ ވޯލްޑް ކަޕަށް ބްރެޒިލްގެ ފޯވާޑް ނޭމާ ފިޓުވާނެ ކަމުގެ ޔަގީންކަން އެ ޓީމުގެ ޑޮކްޓަރު ދީފިއެވެ.
ނޭމާއަށް އަނިޔާވީ ފްރެންޗް ލީގުގައި މާސޭއާ ދެކޮޅަށް ކުޅުނު މެޗުގައެވެ. އޭނާއަށް މި މެޗުގައި އަނިޔާވި ނަމަވެސް ޕީއެސްޖީއިން އެ މެޗު 3-0 ގެ ނަތީޖާއަކުން ކާމިޔާބުކުރިއެވެ. ނޭމާގެ ފަޔާއި ކުޑަހުޅަށް ލިބުނު އަނިޔާއަކާއި ގުޅިގެން އޭނާވަނީ ތިން މަހަށް ކުޅުމާއި ދުރަށް ދާންޖެހިފައެވެ. އޭނާ މިވަގުތު ހުރީ އެ އަނިޔާއަށް ފަރުވާ ހޯދުމަށް އަމިއްލަ ގައުމުކަމަށްވާ ބްރެޒިލްގައެވެ.
ބްރެޒިލްގެ ގައުމީ ޓީމުގެ ޑޮކްޓަރު ރޮޑްރިގޯ ލަސްމަރ ބުނެފައިވަނީ އަނިޔާ ސީރިއަސްކަން ނޭމާއަށް އެނގުމާއެކު އޭނާ ވަރަށް ދެރަވި ކަމަށާއި ސާޖަރީ އެއް ފުރިހަމަކުރަން ޖެހޭކަން އޭނާއަށް އެނގުމާއެކު އޭނާ ވަރަށް ބޮޑަށް ހިތްހަމަނުޖެހޭ ކަމަށެވެ. އޭނާ ބުނީ ވޯލްޑް ކަޕް ބޯމަތިވެފައި އޮއްވާ އެފަދަ ބޮޑު އަނިޔާއެއް ކުރިމަތިވުމާއެކު ވަރަށް ބިރު ގަންނަން ޖެހުނު ކަމަށާއި އޭނާއަކީ ނަފްސާނީ ގޮތުން ވަރުގަދަ ކުޅުންތެރިޔެއްކަން އެނގިގެންދިޔަ ކަމަށެވެ.
ރޮޑްރިގޯ ބުނީ ނޭމާ ބޭނުންވަނީ ވީހާވެސް އަވަހަށް ކުޅުމުގެ ތެރެއަށް އެނބުރި އަންނަން ކަމަށާއި ސާޖަރީއަށް ފަހު ޓާގެޓް ކަނޑައެޅީ ހަ ހަފްތާތެރޭ އެނބުރި ކުޅުމުގެ ތެރެއަށް އައުމަށް ކަމަށެވެ. އޭނާ ބުނީ އެޔަށް ފަހު އިތުރު ބެލުންތައް ބެލުމަށް ފަހު އޭނާ އެނބުރި އަންނާނެ ދުވަހެއް ޔަގީންވެގެންދާނެ ކަމަށެވެ. އޭނާ ބުނީ ސާޖަރީއަށް ފަހު ކަންކަން ކުރިޔަށްދާ ގޮތް ވަރަށް ރަނގަޅަށް ބަލަންޖެހޭ ކަމަށާއި އެހެން ނޫނީ އަނެއްކާ ވެސް އަނިޔާ ބޮޑުވުމަކީ އެކަށީގެންވާ ކަމެއް ކަމަށެވެ.
ބްރެޒިލްގެ ގައުމީ ޓީމުން އަންނަނީ ޕީއެސްޖީގެ ޑޮކްޓަރުންނާއެކު ނޭމާގެ ރިކަވަރީގެ ކަންކަން ވަރަށް ގާތުން މޮނީޓަރ ކުރަމުންނެވެ. ބައެއް މީޑިއާތަކުން ވަނީ ނޭމާގެ އިންޖަރީއާ ގުޅިގެން ޕީއެސްޖީ އަދި ބްރެޒިލްގެ ގައުމީ ޓީމުގެ މެނޭޖްމަންޓާއި ދެމެދު މައްސަލަ ޖެހިފައިވާ ކަމަށް ބުނެފައެވެ. އެހެން ނަމަވެސް ރޮޑްރިގޯ ވަނީ މި ވާހަކަތައް ދޮގުކޮށްފައެވެ.
އޭނާ ބުނީ ނޭމާގެ އަނިޔާގެ ކުރިން ޕީއެސްޖީއާ ދެމެދު އެއްވެސް މައްސަލައެއް ނެތް ކަމަށާއި އެއްވެސް އިރެއްގައި ޕީއެސްޖީގެ މެޑިކަލް ޑިޕާޓްމެންޓާއި މައްސަލަ ޖެހިފައިނުވާ ކަމަށެވެ. ހަމައެހެންމެ ޕީއެސްޖީގެ މެޑިކަލް ޑިޕާޓްމެންޓްގައި ހަރަކާތްތެރިވާ މީހުން ވަރަށް ރަނގަޅަށް އެނގޭ ކަމަށާއި އެމީހުންނާ ދެމެދު ވަރަށް ގާތް ގުޅުމެއް އޮންނަ ކަމަށް ވެސް ރޮޑްރިގޯ ބުނެފައިވެއެވެ. އޭނާ ބުނީ ފުރަތަމަ ދުވަހުން ފެށިގެން ވެސް ނޭމާގެ ރިކަވަރީގެ ކަންކަން ކުރިޔަށް ގެންދަނީ ދެ މެޑިކަލް ޓީމުގެ ބެލުމުގެ ދަށުން ކަމަށެވެ.
މިއަހަރުގެ ވޯލްޑް ކަޕް ވެސް ނޭމާއަށް ގެއްލޭނެ ކަމުގެ ބިރު އޮތް ނަމަވެސް މިހާރު އެ ބިރު ވަނީ ނެތިގެން ގޮސްފައެވެ. އަމިއްލަ ގައުމުގައި 2014 ވަނަ އަހަރު ބޭއްވި ވޯލްޑް ކަޕްގެ ކުއާޓާގައި ކޮލޮމްބިއާ އާއި ދެކޮޅަށް ކުޅުނު މެޗުގައި ނޭމާއަށް އަނިޔާވެ އޭނާއަށް މުބާރާތް ނިމިގެންދިޔައެވެ.
