އައިސިސް އާއިއެކު 16 ޓެރަރިސްޓް ޖަމާއަތެއްގެ ނަން އިއުލާންކޮށްފި

ދިވެހި ސަރުކާރުން ގަބޫލުކުރާ ޓެރަރިސްޓް ޖަމާއަތްތަކުގެ ނަންތައް އިއުލާނުކޮށްފި އެވެ.

2015 ވަނަ އަހަރު ޓެރަރިޒަމް މަނާ ކުރުމުގެ ގާނޫނު ވުޖޫދަށް ގެނައިއިރު އެގާނޫނުގެ 18 ވަނަ މާއްދާގައި ބުނެފައިވަނީ ޓެރަރިސްޓް ޖަމާއަތްތައް ކަމަށް ބެލެވޭ ޖަމާއަތްތައް ކަނޑައަޅާނީ ރައީސުލްޖުމްހޫރިއްޔާ ކަމަށެވެ. ނަމަވެސް ފަހުން އެ ގާނޫނަށް 2016 ވަނަ އަހަރުގައި ގެނައި އިސްލާހުގައި ބުނެފައިވަނީ ޓެރަރިސްޓް ޖަމާއަތްތައް ރައީސް ކަނޑައެޅުއްވި ނަމަވެސް ޓެރަރިސްޓް ޖަމާއަތްތަކުގެ ލިސްޓް ގައުމީ ސަލާމަތާބެހޭ މަޖިލީހުގެ އިރުޝާދާއެކު ސިފައިން ބަލަހައްޓަންވާނެ ކަމަށެވެ.

ޓެރަރިޒަމް މަނާ ކުރުމުގެ ގާނޫނަށް މިސަރުކާރުން އިސްލާހު ހުށައެޅިއިރު އެގާނޫނުގެ 18 ވަނަ މާއްދާއަށް ވަނީ ޓެރަރިސްޓް ޖަމާއަތްތަކާއި ހަނގުރާމަވެރި ސަރަހައްދުތައް ކަނޑައަޅާނީ، ގައުމީ ސަލާމަތާބެހޭ މަޖިލީހުގެ މަޝްވަރާގެމަތިން ރައީސުލްޖުމްހޫރިއްޔާކަމަށް ބަދަލު ގެނައުމަށް ހުށައަޅާފައެވެ.

ރައީސް އޮފީހުގައި ނޫސްވެރިންނާ ބައްދަލުކުރައްވާ ރައީސް އިބްރާހިމް މުހައްމަދު ސޯލިހު ވަނީ ޓެރަރިސްޓް ޖަމާއަތްތައް ހާމަ ކުރައްވާނެކަމަށް ވިދާޅުވެފައެވެ.

ބިލްގައިވާގޮތަށް ހަނގުރާމަވެރި ސަރަހައްދުތަކަކީ ކޮން ސަރަހައްދު ތަކެއްތޯ ކަނޑައަޅުއްވާނެތޯ ރާއްޖެ.އެމްވީން ސުވާލުކުރުމުން އެމަނިކުފާނު ވިދާޅުވީ މިސަރުކާރުން ގާނޫނަށް ގެންނަ އިސްލާހު ގެނައުމުން، ގާނޫނުގައި ވާގޮތަށް އަމަލު ކުރައްވާނެކަމަށެވެ. އަދި މިހާރު އަމަލު ކުރައްވަމުން ގެންދަވަނީ މިހާރު އޮތް ގާނޫނަށް ކަމަށާއި އެގާނޫނުގައިވާ ގޮތަށް ހަނގުރާމަވެރި ޖަމާއަތަކީ ކޮބައިކަން އާންމު ކުރެއްވީކަމަށް ވިދާޅުވިއެވެ. އަދި ގައުމީ ސަލާމަތާއި ގުޅުންހުރި ބޭފުޅުންނާއި ބައްދަލުކޮށް ލިސްޓު އާންމު ކުރައްވަން ނިންމެވީ ޓެރަރިސްޓް ޖަމާއަތްތަކަކީ ކޮބައިކަން ނޭނގި އެފަދަ ޖަމާއަތްތަކުގައި ބައިވެރިވެވުނަސް އެކަން އާންމުންނަށް ނޭނގިދާނެތީ ކަމަށެވެ. އަދި އެއީ ކޮންމެ ރައްޔިތަކަށް ވެސް އެނގެން ޖެހޭ މައުލޫމާތު ކަމަށް ވިދާޅުވިއެވެ.

ސަރުކާރުން ޓެރަރިޒަމް މަނާކުރުމުގެ ގާނޫނަށް ގެނައުމަށް ހުށައަޅާފައިވާ އިސްލާހުގައިވާގޮތުން ޚާއްސަ ހުއްދައެއް ލިބިގެން ނޫނީ ރާއްޖެއިން ބޭރުގައި ހަނގުރާމަވެރި ސަރަހައްދުތަކަށް ދިއުމަކީ ކުށެކެވެ. އެ ބިލްގައިވާގޮތުން ޓެރަރިސްޓް ޖަމާއަތަކަށް ތާއީދުކުރުމަށް ގޮވާލުމާއި އެފަދަ ޖަމާއަތަކަށް ތާއީދުކުރާ މީހެއްކަން ދޭހަވާފަދަ ޚިޔާލެއް ފާޅުކުރުން؛ އަދި އެފަދައިން ފާޅުކުރާ ޚިޔާލު ރައްދުވާ ފަރާތުން އެ ޚިޔާލަށް ބަރޯސާވެ، ޓެރަރިސްޓް ޖަމާއަތަކަށް އެފަރާތުން ތާއީދުކުރުމަށް ހިތްވަރު ލިބިގަނެދާނެކަމާމެދު ފަރުވާލެއް ނެތި، އެ ޚިޔާލުފާޅުކުރުމަކީ ވެސް ކުށެކެވެ.

އެ ބިލްގައި ހަނގުރާމަވެރި ސަރަހައްދުތަކަކީ ކޮބައިކަން ރައީސް ކަނޑައަޅަން ޖެހޭނެ ކަމަށް ލާޒިމް ކުރެއެވެ. ނަމަވެސް އެކަން ރައީސް ކަނޑައަޅުއްވާނީ އެގޮތަށް ގާނޫނަކަށް ގެނައުމުން ކަމަށް އެމަނިކުފާނު ވިދާޅުވިއެވެ. ސަރުކާރުން ހުށައެޅި ބިލް ރައީސް ތަސްދީގު ކުރައްވާތާ 15 ދުވަހުގެ ތެރޭގައި ހަނގުރާމަވެރި ސަރަހައްދުތަކުގެ ލިސްޓު ރައީސް ހާމަ ކުރައްވަން ޖެހެއެވެ.

ޓެރަރިޒަމް ކުށްތަކުގެ ގޮތުގައި ބިލުގައި ކަނޑައަޅާފައިވާ ކުށްތަކުގެ އަދަބަކީ 20 އަހަރާއި 25 އަހަރާ ދެމެދުގެ މުއްދަތަށް ޖަލުގައި ބަންދު ކުރުން ކަމަށް ވެސް އެ ބިލްގައި ވެއެވެ.