ނޮޅިވަރަންފަރަށް ބަދަލުކޮށް ދާއިމީ ބޯހިޔާވެހިކަމެއް ނުލިބޭ އާއިލާތަކަށް 18 މިލިއަންގެ ބަދަލެއްދެނީ
17 ސެޕްޓެމްބަރު 2019 | އަންގާރަ 23:43އާއިލާތަކަށް ދާއިމީ ބޯހިޔާވަހިކަން ފޯރުކޮށްދިނުމުގެ މަސައްކަތް ވަނީ މި އަހަރުގެ އޭޕްރީލް މަހުގައި ފެށިފައިވޭ
ފަލަ ސުރުހީ ޕޮރޮގްރާމްގެ ތެރެއިން
ނޮޅިވަރުފަރަށް ބަދަލުކޮށްފައިވާ އާއިލާތަކަށް ދޭންޖެހޭ ބަދަލު ދޭނ ޕްލޭނެއް ހަދައިފައިވާ ކަމަށް ހައުސިންގް މިނިސްޓްރީން ބުނެފި އެވެ.
މީހުން އެއްފަސްކުރުމުގެ ސިޔާސަތުގެ ދަށުން ހދ ނޮޅިވަރަންފަރަށް ބަދަލުކޮށްފައިވާ އާއިލާތަކުގެ ތެރެއިން ދާއިމީ ބޯހިޔާވަހިކަން ފޯރުކޮށްދެވިފައިނުވާ އާއިލާތަކަށް ބަދަލު ދިނުމަށް ސަރުކާރުން ނިންމިކަން ހާމަކޮށް، ރާއްޖެޓީވީގެ ފަލަސުރުހީގައި މިނިސްޓްރީގެ ޑެޕިއުޓީ މިނިސްޓަރ އަލީ ޝާމިން ވިދާޅުވީ އެކަން މިހާރު ރަށު ކައުންސިލަށްވެސް އަންގާފައިވާނެ ކަމަށެވެ.
ނޮޅިވަރަންފަރަށް ބަދަލުކުރެވިފައިވާ ފަރާތްތަކުގެ ތެރެއިން ދާއިމީ ބޯހިޔާ ވަހިކަން ނުދެވިތިބި އާއިލާތަކުގެ މައްސަލަ އަކީ މިސަރުކާރު ހަވާލުވީއްސުރެ މި ސަރުކާރުގެ ސަމާލުކަމަށް އައިސްފައިވާ ކަމެއް ކަމަށާއި، މި އާއިލާތަކަށް ދާއިމީ ބޯހިޔާވަހިކަން ފޯރުކޮށްދިނުމުގެ މަސައްކަތް ވަނީ މި އަހަރުގެ އޭޕްރީލް މަހުގައި ފެށިފައިކަމަށް ޝާމިން ވިދާޅުވި އެވެ. އަދި އެ މަސައްކަތް ޓާރގެޓާއި އެއްގޮތަށް ނިންމައިލެވޭނެކަމަށާއި އެ މަސައްކަތް އަންނަ އަހަރުގެ މޭމަހުގައި އެއްކޮށް ނިންމާލެވޭނެކަމުގެ އުއްމީދު އެބައޮތްކަމަށް ޝާމިން ވިދާޅުވި އެވެ.
ހދ ނޮޅިވަރަންފަރަށް ހިޖުރަކޮށް މިހާތަނަށް ދާއިމީ ބޯހިޔާވަހިކަން ނުލިބި ތިބި އާއިލާތަކަށް ބަދަލުގެ ގޮތުގައި ދިނުމަށް ސަރުކާރުން ނިންމާފައިވަނީ 18،444،520.00 (އަށާރަ މިލިއަން ހަތަރު ލައްކަ ސާޅީސް ހަތަރުހާސް ފަސްސަތޭކަ ވިހި) ރުފިޔާ އެވެ. އަދި މި ފައިސާ އެ އާއިލާތަކަށް ދޫކުރާނީ ތިން މަރުހަލާ އަކަށް ބަހައިލައިގެންނެވެ.
އެ ތިން މަރުހަލާގެ ތެރެއިން ފުރަތަމަ މަރުހަލާގެ ފައިސާ ކަމަށްވާ 6،722،520.00 (ހަ މިލިއަން ހަތް ލައްކަ ބާވީސްހާސް ފަސްސަތޭކަ ވިހި) ރުފިޔާ މި އަހަރު ތެރޭގައި ދިނުމަށް ނިންމައިފައިވާ ކަމަށް ޝާމިން ވިދާޅުވި އެވެ. އަދި އެކަމުގެ އުސޫލުތައް ކައުންސިލާ ގުޅިގެން ކުރިއަށްގެންދާކަމަށްވެސް އޭނާ ވިދާޅުވި އެވެ.
