ހުވަފެނުގައި ވެސް އުކުޅަހުގެ މެޖޯރިޓީއެއް ޕީޕީއެމަށް ނުލިބޭނެ: ޒަމީރު

އއ. އުކުޅަހުގެ މެޖޯރިޓީ ވެރިކަން ކުރާ ޕީޕީއަމަށް، ހުވަފެނަކުން ވެސް ނުލިބޭނެ ކަމަށް އެރަށު ކައުންސިލް މެމްބަރު އަލީ ޒަމީރު ވިދާޅުވެއްޖެއެވެ.

ރާއްޖެއެމްވީއަށް މައުލޫމާތު ދެމުން ޒަމީރު ވިދާޅުވީ ކުރިއަށް އޮތް ލޯކަލް ކައުންސިލް އިންތިހާބުގައި އެރަށުގެ މެޖޯރޓީ ވެރިކަން ކުރާ ޕީޕީއެމުން ހޯދުމަށްޓަކައި ރައްޔިތުންނަން ބިރުދައްކަމުން އަންނަ ކަމަށެވެ. އެރަށު އެމްޑީޕީގެ ހަ މެމްބަރުން ފުލުހުން ހައްޔަރުކުރީ ސީދާ ލޯކަލް ކައުންސިލް އިންތިހާބުގެ މެޖޯރިޓީ ހޯދުމަށްޓަކައި އިތުރު ގޮތެއް ނެތުމުން ކަމަށް ޒަމީރު ވިދާޅުވިއެވެ.

"އުކުޅަހުގެ މެޖޯރިޓީއެއް ހުވަފެނަކުން ވެސް ނުލިބޭނެ ، ބޮޑު ތަނުން ބަލިކުރާނަން،" ކައުންސިލް މެމްބަރު ޒަމީރު ވިދާޅުވިއެވެ.

އެމްޑީޕީގެ އެކްޓިވިސްޓް މެމްބަރު ޝިނާޒު މޫސާ ޕީޕީއެމަށް ސޮއިކުރުމުން، އެ ގޭގެ ދޮރުމަތީގައި މަހާނައެއް ހެދި މައްސަލައާ ގުޅިގެން އއ. އަތޮޅު ކައުންސިލްގެ ނައިބް ރައީސް މޫސާ ނައީމްގެ އިތުރުން ފަސް މީހުން ވަނީ އާދީއްތަ ދުވަހުގެ ރޭ ހައްޔަރުކޮށްފައެވެ. ފުލުހުންގެ ހާއްސަ ޓީމެއް އުކުޅަހަށް ގޮސް އެމީހުން ހައްޔަރުކުރީ ސިހުރު ފަންޑިތަ ހަދައި، ރައްޔިތުންގެ ހިތްތަކުގައި ބިރުވެރިކަން އުފައްދަން އުޅުނު ކަމުގެ ތުހުމަތުގައެވެ.

އުކުޅަހުގެ މަގުމަތީގައި މަހާނައެއް ހަދި މައްސަލަ ފުލުހުން ދަނީ ބަލަމުން -- ފޮޓޯ:ގޫގުލް -- ފޮޓޯ:ގޫގުލް

ޒަމީރު ވިދާޅުވީ މިދިޔަ ހުކުރު ދުވަހުގެ ރޭ އުކުޅަހު އެމްޑީޕީގެ މެމްބަރުން ބޮޑި ބަތް ކެއުމުގެ ހަރަކާތަކަށް ފަހު ، އެރަށު މަގުމަތީގައި މަހާނަ އެއް ހެދިކަމަށެވެ. އެހެންނަމަވެސް މަހާނަ ހެދީ ސިހުރު ފަންޑިތަ ހެދުމަށް ނޫން ކަމަށް އޭނާ ވިދާޅުވިއެވެ.

"ކޮންމެ ހުކުރު ދުވަހެއްގެ ރޭ އުކުޅަހު ރައްޔިތުން ބޮޑިބަތް ކެއުމުގެ ހަރަކާތެއް ބާއްވާނެ، އެ ހަރަކާތް ނިމުމާއި އެކު ސަކަރާތަކަށް މަގުމަތީގައި ހެދީ، އެއީ ސިހުރު ފަންޑިތައާ ގުޅުން ހުރި ކަމެއް ނޫން،" ޒަމީރު ވިދާޅުވިއެވެ.

އޭނާ ވިދާޅުވީ މަގުމަތީގައި މަހާނަ އެއް ހެދީ އެމްޑީޕީގެ އެކްޓިވިސްޓް ޝިނާޒް މޫސާ ޕީޕީއެމަށް ސޮއި ކުރުމުން، އޭނާގެ ނަން އެމްޑީޕީގެ ފުހެލިކަން އެންގުމަށްޓަކައެވެ. ކޮންމެ ތުހުމަތެއްގައި އުކުޅަހު އެމްޑީޕީގެ މެމްބަރުން ހައްޔަރުކުރި ނަމަވެސް ، އެޕާޓީގެ އާންމު މެމްބަރުންގެ ހިތްވަރަށް ބަދަލެއް ނާންނާނެ ކަމަށް އޭނާ ވިދާޅުވިއެވެ.

ޒަމީރު ވިދާޅުވީ ރަސްދޫ އާއި މާލެއިން ފުލުހުންގެ ހާއްސަ ޓީމެއް ގޮސް ހައްޔަރުކޮށްފައި ވަނީ އެރަށު ފުސްވިލާގޭ، އިބްރާހިމް ސުޒެއިނާއި، ރަތްވިލާގޭ އަބްދުﷲ ވާހިދު އަލީ، ވިންޓަރ ވިލާ، ސައުދުﷲ އިބްރާހިމް، ފެންފިޔާޒުގެ، ފިކުރީ ހަނިފްގެ އިތުރުން ފިނިފެން ބަގީޗާ، އަބްދުﷲ ސައީދު ކަމަށެވެ.އުކުޅަހުގެ އެމްޑީޕީ އެކްޓިވިސްޓް ޕީޕީއެމަށް ސޮއި ކުރުމުން އެރަށުގެ އެމްޑީޕީގެ އާންމު މެމްބަރުން ދަނީ އެކަމަށް ވަރަށް ބޮޑަށް ފާޑުކިޔަމުނެވެ.