ކަމަދޫއަށް މިހާރު ވަނީ ކަރަންޓުގެ ހިދުމަތް ދެވިފައި: ފެނަކަ
15 ސެޕްޓެމްބަރު 2019 | އާދީއްތަ 13:04އެރަށަށް ކަރަންޓުގެ ހިދުމަތް ދެމުންގެންދިޔައީ އެކި ފީޑަރުތަކަށް ބަހާލައިގެން
ބ. ކަމަދޫ
އާދިއްތަ ދުވަހުގެ މެންދުރުފަހު، ބ.ކަމަދޫއަށް ކަރަންޓުގެ ހިދުމަތް ފޯރުކޮށްދީފައިވާނެ ކަމަށް ފެނަކަ ކޯރޕަރޭޝަނުން ބުނެފިއެވެ.
ކަމަދޫގައި ހިންގާފައިހުރި 250 ކިލޯ ވޮޓްގެ އިންޖީނުގެ ބެޓެރި ފެއިލްވުމާއި ގުޅިގެން އެ އިންޖީނު ވަނީ ނިވިފައެވެ. ފެނަކައިން ބުނިގޮތުގައި، އެރަށަށް ކަރަންޓުގެ ހިދުމަތް ދެމުންގެންދިޔައީ އެކި ފީޑަރުތަކަށް ބަހާލައިގެންނެވެ.
ކަމަދޫއަށް ދިމާވި ކަރަންޓުގެ މައްސަލަ ހައްލުކުރުމަށްޓަކައި، ހޮނިހިރު ދުވަހުގެ 12:00 ގައި އެރަށަށް އިންޖިނިއަރެއް ފޮނުވާ، މުޅި ރަށަށް ކަރަންޓުގެ ހިދުމަތް ފޯރުކޮށްދީފައިވާނެ ކަމަށް ފެނަކައިން ބުނެފައިވެއެވެ. އަދި މި މައްސަލަ ހައްލުކުރެވިފައިވަނިކޮށް އާދިއްތަ ދުވަހު ހެނދުނު 07:30 ހާއިރު 250 ކިލޯ ވޮޓްގެ އިންޖީނުގެ ބެޓެރި ގޮވައި އެ ރަށުގެ ބޮޑުބަޔަކުން ކަރަންޓު ކެނޑުނު ކަމުގައި ފެނަކައިން ބުނެފައިވެއެވެ.
12:50 ވަންދެން ރަށަށް ކަރަންޓް ދެމުންގެންދިޔައީ އެ ރަށު ސްކޫލް ހުންނަ ސަރަހައްދާއެކު ރަށުގެ އެކި ފީޑަރުތަކަށް ބަހާލައިގެން ކަމަށް ފެނަކައިން ބުނެފައިވާއިރު، 12:50 ހާއިރު އެރަށުގެ 180 ކިލޯ ވޮޓުގެ ދެ އިންޖީނު ރަނިންގއަށް ގެނައުމަށާއި ޕެނަލްގެ ބްރޭކަރ ބަދަލުކުރުމަށް ރަށުގެ ރައްޔިތުންނަށް އެންގުމަށްފަހު 12:50 ން 13:30 އަށް މުޅި ރަށުން ކަރަންޓް ވަނީ ކަނޑާލެވިފައެވެ.
ޕެނަލްގެ މަސައްކަތް ނިމި 13:30 ގައި ވަނީ މުޅި ރަށަށް ކަރަންޓުގެ ހިދުމަތް ދެވިފައި ކަމަށާއި 250 ކިލޯ ވޮޓުގެ އިންޖީނަށް ދިމާވެފައިވާ މައްސަލަ ބެލުމަށް އެ ކުންފުނީގެ އިންޖިނިއަރުން ދަނީ މަސައްކަތް ކުރަމުން ކަމަށް އެ ކުންފުނިން މައުލޫމާތުދެއެވެ.
ރަށުގެ ކަރަންޓުގެ ޑިމާންޑް ބެލުމަށްފަހު ދެމެހެއްޓެނިވިގޮތަށް ކަމަދޫގެ ރައްޔިތުންނަށް ކަރަންޓުގެ ހިދުމަތް ފޯރުކޮށްދިނުމަށްޓަކައި 250 ކިލޯ ވޮޓުގެ ޖަނަރޭޓަރެއް ގެނައުމަށް ކުރަންޖެހޭ އެންމެހާ މަސައްކަތް ކުރަމުންދާކަމަށް އެ ކުންފުނިން ބުނެފައިވެއެވެ.
