ރާއްޖޭގައި ހުރުމަށް ދޫކޮށްފައިވާ ހުއްދައިގެ ޝަރުތުތަކާއި ޚިލާފުވުމުން މީހަކު ޑީޕޯޓު ކޮށްލައިފި
14 ސެޕްޓެމްބަރު 2019 | ހޮނިހިރު 02:15އެމީހާ ވަނީ ނޯޓިސްއަކާއި ނުލައި، ހުއްދަ ބާތިލު ކުރުމަށް ފަހު ޑީޕޯޓުކޮށްފައި
ޑީޕޯޓްކޮށްފައިވާ ބިދޭސީ މީހާ
މޯލްޑިވްސް އިމިގްރޭޝަން އިން ރާއްޖޭގައި ހުރުމަށް ދޫކޮށްފައިވާ ހުއްދައިގެ ޝަރުތުތަކާއި ޚިލާފުވުމުގެ ސަބަބުން ބިދޭސީ މީހަކު ޑީޕޯޓު ކޮށްފައިވާ ކަމަށް އިމިގްރޭޝަން އިން ބުނެފިއެވެ.
އިމިގްރޭޝަން އިން ކޮށްފައިވާ ޓުވީޓެއްގައި ބުނެފައިވަނީ އަބޫ ހަނީފް ނަމަކަށް ކިޔާ އެ މީހާ ޑީޕޯޓު ކޮށްލާފައިވަނީ ހުކުރު ދުވަހުގެ ރޭ އެއާރޕޯޓުގައި ހިފެއްޓުމަށްފަހު ނޯޓިސްއަކާއި ނުލައި، ހުއްދަ ބާތިލު ކުރުމަށް ފަހު ކަމަށެވެ.
މީގެ އިތުރުން މޯލްޑިވްސް އިމިގްރޭޝަން އާއި މޯލްޑިވްސް ޕޮލިސް ސަރވިސް ގުޅިގެން ކުރިއަށް ގެންދާ އޮފަރޭޝަނެއްގެ ދަށުން ގަވައިދާ ހިލާފަށް ބިދޭސިން ރެކްރޫޓް ކުރާކަމުގެ ތުހުމަތުގައި ހުކުރު ދުވަހު އިތުރު އެހެން ބިދޭސީއަކު ވަނީ ޑީޕޯޓް ކޮށްފައެވެ.
މިހާރު ވެސް ރާއްޖޭގައި ލައްކަ އަކަށް ވުރެ ގިނަ ބިދޭސީން އުޅޭ ކަމަށް އިމިގްރޭޝަންގެ ތަފާސް ހިސާބުތަށް ދައްކާއިރު، އޭގެތެރެއިން 63،000 އަށް ވުރެ ގިނަ ބިދޭސީންނަކީ ގަވައިދާ ޚިލާފަށް އުޅޭ ބިދޭސީންނެވެ.
