އެމްޑަބްލިއުއެސްސީ އެމްއެންޔޫއެސްޔޫ ފުޓްސަލް ފިއެސްޓާ 2019 ފަށައިފި

ޔުނިވަރސިޓީ، ކޮލެޖް، އަދި ހައިސްކޫލްތަކުގެ މެދުގައި ބާއްވާ އެންމެ ބޮޑު ފުޓްސަލް މުބާރާތް، އެމްޑަބްލިއުއެސްސީ އެމްއެންޔޫއެސްޔޫ ފުޓްސަލް ފިއެސްޓާ 2019 ފަށައިފިއެވެ.

މިމުބާރާތުގައި ބުރާސްފަތި ދުވަހުގެ ރޭ ކުރިއަށް ދިޔައީ ގްރޫޕް ސްޓޭޖުގެ މެޗުތަކެވެ. ފުރަތަމަ ދެމެޗުގައި ވާދަކުރީ އަންހެން ޑިވިޜަންގެ ޓީމުތަކެވެ. އެގޮތުން ފުރަތަމަ މެޗުގައި އެފްއެޗްޓީއެސް އާއި ސައިރިކްސް ކޮލެޖް ބައްދަލުކުރި މެޗު 2-4 ގެ ނަތީޖާއަކުން ކާމިޔާބުކުރީ ސައިރިކްސް ކޮލެޖްގެ ޓީމެވެ. މިމެޗުގެ މޮޅު ކުޅުންތެރިޔަކަށް ހޮވިފައިވަނީ ސައިރިކްސް ކޮލެޖަށް 3 ގޯލު ޖަހައިދިން މަރިޔަމް ވަފާއެވެ.

އަންހެން ޑިވިޜަންގެ ދެވަނަ މެޗުގައި ވާދަކުރީ މެޕްސް ކޮލެޖާއި އެފްއެޗްއެސްއެވެ. މިމެޗު ނިމުނީ 0-0 ގެ ނަތީޖާ އަކުންނެވެ. މިމެޗުގެ މޮޅު ކުޅުންތެރިޔަކީ އެފްއެޗްއެސްގެ ޒިޔާދާ މުހައްމަދެވެ.

އަންހެން ޑިވިޜަންގެ ތިންވަނަ މެޗުގައި ބައްދަލުކުރީ އެމްއެންޔޫ ބީއެސް އަދި އެމްއައި ކޮލެޖެވެ.

މި މެޗު 4-1 ގެ ނަތީޖާ އަކުން ކާމިޔާބުކުރީ އެމްއައިއެވެ. މި މެޗުގެ މޮޅު ކުޅުންތެރިޔަކީ އެމްއައި ކޮލެޖްގެ އާމިނަތު ޝާމިލާއެވެ.

އަންހެން ޑިވިޜަންގެ ހަތަރުވަނަ މެޗުގައި ބައްދަލުކުރީ އެފްއީ އަދި ވިލާ ކޮލެޖެވެ.

ވިލާ ކޮލެޖުން ފަހަތުން އަރައި މި މެޗު ކާމިޔާބުކުރީ 4-1 ގެ ނަތީޖާ އަކުންނެވެ. މި މެޗުގެ މޮޅު ކުޅުންތެރިޔަކީ ވިލާ ކޮލެޖުގެ އައިޝަތު އީމާން އަހްމަދު ޒައީމެވެ.

ފިރިހެން ޑިވިޜަންގެ ފުރަތަމަ މެޗުގައި ބައްދަލުލުރީ އެމްއައި ކޮލެޖާއި ސީއެފްއެސްއެވެ.

މިމެޗު އެމްއައި އިން ކާމިޔާބުކުރީ 6-0 ގެ ނަތީޖާ އަކުންނެވެ. މި މެޗުގެ މޮޅު ކުޅުންތެރިޔަކީ އެމްއައި ކޮލެޖްގެ ޤާސިމް ސަމާނެވެ.

ފިރިހެން ޑިވިންގެ ދެވަނަ މެޗުގައި ވާދަކުރީ ޕޮލިޓެކްނިކް އާއި އެފްއެޗްޓީއެސްއެވެ. މިމެޗުން 2-3 ގެ ނަތީޖާއަކުން ކުރިހޯދީ އެފްއެޗްޓީއެސްގެ ޓީމެވެ. މި މެޗުގެ މޮޅު ކުޅުންތެރިޔަކީ އެފްއެޗްޓީއެސްގެ އަހްމަދު ހުނައިފެވެ.

ފިރިހެން ޑިވިޜަންގެ ތިންވަނަ މެޗުގައި ބައްދަލުކުރީ އެފްއެލްއައިއެސް އަދި އެވިޑް ކޮލެޖެވެ.

މި މެޗު އެވިޑް ކޮލެޖުން ކާމިޔާބުކުރީ 9-0 ގެ ތަފާތު ބޮޑު ނަތީޖާ އަކުންނެވެ. މި މެޗުގެ މޮޅު ކުޅުންތެރިޔަކީ އެވިޑް ކޮލެޖުގެ ރިހާމް އަބްދުލް ޣަނީއެވެ.

ފިރިހެން ޑިވިޜަންގެ ފަހުމެޗުގައި ބައްދަލު ކުރީ އެމްއެންޔޫ ބީއެސް އަދި އެމްބީއެސްއެވެ.

ވާދަވެރި ކުޅުމެއް ފެނިގެންދިޔަ މި މެޗު އެމްބީއެސްއިން ކާމިޔާބުކުރީ 2-1 ގެ ނަތީޖާ އަކުންނެވެ. މި މެޗުގެ މޮޅު ކުޅުންތެރިޔަކީ އެމްބީއެސްގެ އަލީ ޝިޔާހުއެވެ.

އެމްއެންޔޫއެސްޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބޭއްވޭ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ)އިންނެވެ.