ނޯތު ހާބަރުގައި އޮތް ބެސްޓް ލައިން ނަމަކަށް ކިޔާ ބޯޓެއްގައި ގޭސްފުޅިއެއް ގޮވައިގެން ހިނގި ހާދިސާގައި ހަތް މީހަކަށް އަނިޔާވެ އެކަކު އައިސީޔޫއަށް ގެންގޮސްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ ބުދަ ދުވަހުގެ ރޭ 7:15 ހާއިރު ފަރުވާ ދިނުމަށް އައިސީޔޫއަށް އެކަކު ގެންގޮސްފައިވާ ކަމަށެވެ. ގޭސްފުޅި ގޮވި ހާދިސާގައި އަނިޔާވެފައިވަނީ ފަސް ދިވެހި ފިރިހެނުންނަށާއި ދެ ބަންގްލަދޭޝް މީހުންނަށެވެ.
އޭގެތެރެއިން އައިސީޔޫއަށް ގޮސްފައިވަނީ ބަންގްލަދޭޝް މީހެކެވެ. ފުލުހުން ބުނީ މިހާތަނަށް ބެލި ބެލުމުން ބޯޓުގައި ހުރި ގޭސްފުޅިތައް މަތީގައި ގިނަ އަދަދެއްގެ މުދާ ޖަހާފައި ހުރިކަން ފާހަގަ ވެފައިވާ ކަމަށެވެ.
މައުލޫމާތު ލިބިފައިވާ ގޮތުގައި އައިސީޔޫގައި އޮތް ބިދޭސީ މީހާއަށް ފަރުވާ ދެމުން އަންނަނީ އައިޖީއެމްއެޗް އިންނެވެ. އެކަމާއި ގުޅިގެން އައިޖީއެމްއެޗްގެ ބަހެއް ވަނީ ލިބޭގޮތް ނުވެފައެވެ.
މިމައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ބުނެއެވެ.
