އަޅާނުލެވި ބާކީކުރެވިފައިވާ 57 ސްކޫލެއް ރާއްޖޭގައި އެބަ އޮތް: އާތިޔާ
10 ސެޕްޓެމްބަރު 2019 | އަންގާރަ 03:36ހުރިހާ ސްކޫލެއް އޮތީ އެއް ފެންވަރެއްގައި ނޫން
އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އައިޝަތު އާތިޔާ ނަސީރު
އަޅާނުލެވި ބާކީކުރެވިފައިވާ 57 ސްކޫލެއް ދިވެހި ރާއްޖޭގައި އެބަ އޮތް ކަމަށް އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އައިޝަތު އާތިޔާ ނަސީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން އާތިޔާ ވިދާޅުވީ، ރާއްޖޭގައި ވަރަށް ބޮޑަށް އެހީވާންޖެހޭ ސްކޫލްތައް އެބަހުރި ކަމަށާއި، ހުރިހާ ސްކޫލެއް އޮތީ އެއް ފެންވަރެއްގައި ނޫން ކަމަށެވެ.
އާތިޔާ ވިދާޅުވީ، ވަރަށް ކުރީއްސުރެ ސްކޫލްތައް ރިވިއު ކުރާ ކަމަށާއި، އެގޮތުން ސްކޫލްތަކަށް މިނިސްޓްރީގެ ބޭފުޅުން ވަޑައިގެން މައްސަލަތައް ފާހަގަކުރާ ކަމަށެވެ. ނަމަވެސް ހެދި ރިވިއުތައް ހުރީ ފައިލްކޮށްފައި ކަމަށާއި، އޭގެ ބޭނުމެއް ނުކުރާ ކަމަށެވެ. އެގޮތުން އާތިޔާ ވިދާޅުވީ މި ސަރުކާރުގައި ހެދި ރިވުއިން ދައްކާ ގޮތުގައި ވަރަށް ދަށުގައި ހުރި 57 ސްކޫލެއް ފާހަގަކުރެވިފައިވާ ކަމަށާއި، އެ ސްކޫލްތަކަކީ އެއްވެސް ވަރަކަށް އަޅާލެވިފައިނުވާ ބާކީވެފައިތިބި ސްކޫލްތަކެއް ކަމަށެވެ.
އަޅާނުލެވި އޮތް 57 ސްކޫލްގެ ތެރޭގައި އަސާސީ ހިދުމަތް ނުލިބޭ ސްކޫލްތައްވެސް ހިމެނޭ ކަމަށާއި، އޭގެ ތެރޭގައި ޓީޗަރުންނާއި ދަރިވަރުން ބޭނުންކުރާނެ ފާހާނާއެއް ނެތް ސްކޫލްތަކުގެ އިތުރުން ރަނގަޅު ބޯފެން ނުލިބޭ ސްކޫލްތައް ހިމެނޭ ކަމަށްވެސް އާތިޔާ ވިދާޅުވިއެވެ.
މީގެއިތުރުން މިހާރު ތަންފީޒުކުރަމުން އަންނަ މަންހަޖު ރަނގަޅަށް ނޭނގޭ ވެރިންނާއި، ޓީޗަރުން ހިމެނޭ ސްކޫލްތައްވެސް ހުރިކަން ފާހަގަކުރަމުން އާތިޔާ ވިދާޅުވީ، 57 ސްކޫލްގެ ތެރޭގައި ކިޔަވައިދިނުމުގެ ފެންވަރު ރަނގަޅު ނޫން ސްކޫލްތައްވެސް ހިމެނޭ ކަމަށެވެ. އަދި އެ ސްކޫލްތަކުގައި "އަންޓްރެއިންޑް" ޓީޗަރުންވެސް ހިމެނޭ ކަމަށެވެ.
އާތިޔާ ވިދާޅުވީ، މައްސަލަ ފާހަގަކުރެވިފައިވާ 57 ސްކޫލް ތަރައްގީކޮށް އެހެން ސްކޫލްތަކާ އެއް ފެންވަރަށް ގެނައުމަށް ޔުނިސެފްއާ ގުޅިގެން އެޑިއުކޭޝަން މިނިސްޓްރީން ޕްރޮގްރާމެއް ރާވާފައިވާ ކަމަށެވެ. އަދި އިތުރު ޕްރޮގްރާމްތައްވެސް އެ ސްކޫލްތަކަށް އާޒުކޮށް ހިންގުމަށް ހަމަޖެހިފައިވާ ކަމަށް އާތިޔާ ވިދާޅުވިއެވެ.
