ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު، 33 ވަނަ ޤުރުއާން ކިޔެވުމުގެ ގައުމީ މުބާރާތް ބައްލަވާލައްވައިފިއެވެ.

ކީރިތި ޤުރްއާން ކިޔެވުމުގެ ޤައުމީ މުބާރާތުގެ ކިޔެވުން ހިނގަމުންދާ، އިސްލާމީ މަރުކަޒަށް ރައީސް ސޯލިހު މިއަދު ހަވީރު ކުރެއްވި ޒިޔާރަތުގައި މުބާރާތުގެ އިންތިޒާމުތައް ހަމަޖެހިފައިވާގޮތް އޮޅުންފިލުއްވައި އެވަގުތު މުބާރާތުގައި ކިޔަވަމުންދިޔަ ކުދިންގެ ކިޔެވުން އަޑުއައްސަވާލައްވައި އެކުދިންނަށް ހިއްވަރުދެއްވާފައިވެއެވެ.

މީގެ އިތުރުން، އެމަނިކުފާގެ ނައިބު ފައިޞަލް ނަސީމްވެސް ބުދަ ދުވަހުގެ މެންދުރުފަހު ވަނީ މި މުބާރާތް ހިނގަމުންދާގޮތް ބައްލަވާލައްވަން އިސްލާމީ މަރުކަޒަށް ޒިޔާރަތްކުރައްވާފައެވެ.

އާދިއްތަ ދުވަހުން ފެށިގެން، އިސްލާމީ މަރުކަޒުގައި ކުރިއަށްދާ މި މުބާރާތަކީ ތިން ބަޔަކަށް ބާހަލައިގެން ކުރިއަށްގެންދާ މުބާރާތެކެވެ.

މި އަހަރުގެ މުބާރާތް ބަހާލެވިފައިވާ ތިން ކެޓަގަރީއަކީ އާންމު ފަރާތްތަކުގެ ކެޓެގަރީއާއި ސުކޫލުތަކަށް ހާއްސަކުރެވިފައިވާ ބައިގެ އިތުރުން ހާފިޒުންގެ ބައި ކަމަށް އިސްލާމިކް މިނިސްޓްރީން ބުނެފައިވެއެވެ. ސަރުކާރުގެ މުއައްސަސާތަކާއި ކުންފުނިތަކުގެ އިތުރުން ޖަމިއްޔާ ޖަމާއަތްތަކާއި ޤުރުއާން ކިޔަވައިދޭ ކްލާސްތަކާއި ކޮލެޖް ޔުނިވަރސިޓީތައްވެސް މި އަހަރުގެ މުބާރާތުގައި ބައިވެރިވެފައިވެއެވެ.

މި މުބަރާތުގައި 1273 ބައިވެރިން ހިމެނޭ ކަމަށާއި މިހާތަނަށް ރާއްޖޭގައި ބޭއްވި ޤުރުއާން މުބާރާތްތަކުގެ ތެރެއިން އެންމެ ގިނަ ބައިވެރިން ހިމެނޭ މުބަރާތަކީ މިއަހަރުގެ މުބާރާތް ކަމަށް ވެސް އިސްލާމިކް މިނިސްޓްރީގެ ފަރާތުން މައުލޫމާތު ދީފައިވެއެވެ.

މިއަހަރުގެ މުބާރާތް އެންމެ ފުރިހަމައަށް އިންތިޒާމް ކޮށްގެން ކުރިއަށްގެންދިއުމަށް ސަރުކާރުގެ އެއްބާރުލުން ލިބެމުންދާ ކަމަށް އިސްލާމިކް މިނިސްޓްރީން ބުނެފައިވެއެވެ.