ރައީސް ޔާމީނާ ދެކޮޅަށް ހެކި ނެގުން ނިންމުމަށް ފަހު، ދިފާއީ ހެކި ނެގުން ދެން އޮންނަ ޝަރީއަތެއްގައި
ޔާމީންގެ އެކައުންޓަށް އެއް މިލިއަން ޑޮލަރު ޖަމާކުރެއްވީ މުދަލެއް ވިއްކާލައިގެން ކަމަށް ޒަމީރު ވިދާޅުވި
ކުރީގެ ރައީސް އަބްދުﷲ ޔާމީން މިއަދު ބޭއްވި ޝަރީއަތުގައި ވާހަކަ ދައްކަވަނީ
ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ މަނީ ލޯންޑަރިންގެ މައްސަލައިގައި ދައުލަތުން އެމަނިކުފާނާއި ދެކޮޅަށް ހުށައެޅި ހެކިބަސް ނަގައިފިއެވެ.
ދައުލަތުގެ ފަރާތުން ރައީސް ޔާމީނާއި ދެކޮޅަށް ހުށައެޅި ހެކީގެ ގޮތުގައި އޭސީސީގެ ރައީސް މުއައްވިޒު ރަޝީދާއި ކުރީގެ ނައިބު ރައީސް އަހުމަދު އަދީބާއި، އޭސީސީގެ ކުރީގެ ރައީސް ހަސަން ލުތުފީއާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރ އަބްދުﷲ ޒިޔާތާއި، މުހައްމަދު ވަސީމާއި، ކުރީގެ ޓުއަރިޒަމް މިނިސްޓަރ މޫސާ ޒަމީރާއި، ބީއެމްއެލްގެ ބޯޑް މެމްބަރުން ކަމަށްވާ މުހައްމަދު ލުވެއިޒް އާއި މުހައްމަދު ޝަރީފު ވަނީ ހެކިންގެ ގޮތުގައި ދައުލަތުން ހުށައަޅާފައެވެ.
މީގެ ކުރިން ބޭއްވި ޝަރީއަތުގައި ވަނީ މުއައްވިޒާއި އަދީބާއި ޒިޔަތުގެ ހެކިބަސް ނަގާފައެވެ. އަންގާރަ ދުވަހު ހެކިބަސް ނަގާފައިވަނީ ވަސީމާއި ޒަމީރާއި ލުވައިޒްގެ އިތުރުން ބީއެމްއެލްގެ ޑެޕިއުޓީ ސީއީއޯ މުހައްމަދު ޝަރީފުގެ ހެކިބަހެވެ. ހެކިބަސް ނަގާފައި ނުވަނީ ލުތުފީގެ ހެކިބަހެވެ. ލުތުފީ ވަނީ އޭނާ ހެކި ބަސް ދެއްވުމުގައި މަޖުބޫރުކަމާއި ބިރުވެރިކަން ހުރި ކަމަށް ބުނެ ކްރިމިނަލް ކޯޓަށް ސިޓީއެއް ފޮނުއްވާފައެވެ. ލުތުފީ މިވަގުތު ހުންނެވީ މެލޭޝިއާގައެވެ.
އަންގާރަ ދުވަހު ބޭއްވި ޝަރީއަތުގައި ދައުލަތުގެ ފަރާތުން ބުނެފައިވަނީ ލުތުފީގެ ހެކިބަސް ނެގުމަށް ދައުލަތުން މަސައްކަތް ކުރި ކަމަށާއި ލުތުފީ ހާޒިރުވާން ބޭނުން ނުވާ ކަމުގެ މައުލޫމާތު ފުލުހުން ފަރާތުން އެންގުމާ ގުޅިގެން ރަސްމީކޮށް އެކަން ލިއުމަކުން އެންގުމަށް ދައުލަތުން ލުތުފީ ގާތު އެދިލައްވާފައިވާނެ ކަމަށެވެ. ނަމަވެސް އަދި އެފަދަ ލިއުމެއް ނުލިބޭ ކަަމަށް ދިފާއުން ބުނެފައި ވެއެވެ. އޭގެ ޖަވާބަކަށް ގާޒީ ހައިލަމް ވިދާޅުވީ ލުތުފީއަކީ ހެކިން ހުށަައެޅުމުގެ ފުރަތަމަ ޝަރީއަތުގައި ވެސް ހާޒިރު ކުރަން ދައުލަތުން ހުށައެޅި ފަރާތް ކަމަށާއި ވީޑިއޯ ކޮންފަރަންސުން ހެކި ބަސް ނެގުމަށް މެލޭޝިއާގައި ހުންނަ ރާއްޖޭގެ އެމްބަސީއަށް ހާޒިރުކުރުމަށް މަސައްކަތް ކުރި ކަމަށް ދައުލަތުން ކޯޓަށް އަންގާފައިވާ ކަމަށެވެ.
ލުތުފީގެ ހެކިބަހާ ނުލާ ވެސް މައްސަލަ ކުރިއަށްގެންދަންޖެހޭ ހާލަތެއްގައި ކުރިއަށްގެންދަވަން ތައްޔާރުވެގެން ތިބިކަން ދައުލަތުން ވަނީ ފާހަގަ ކޮށްފައެވެ. ނަމަވެސް އެފަދަ ހާލަތެއްގައި ލުތުފީ ފުލުހުންގެ އިދާރާއަށް ދީފައިވާ ވީޑިއޯ އިންޓަވިއު "ލައިޓް ހެކިބަހެއްގެ" ގޮތުގައި ބުރަދަނެއް ދީގެން ނެގިދާނެ ކަމަށް ފާހަގަ ކުރިއެވެ. އަދި އެ ވީޑިއޯއިން މަޖުބޫރުން ކޮށްފައިވާ އިންޓަވިއުއެއްނަމަ އެ ނަމަ އެކަން ބޮޑީ ލެންގުއޭޖާއި ޓެކްސްޗަރ އިން ފާހަގަވާނެ ކަމަށް ދައުލަތުން ފާހަގަ ކުރިއެވެ.
އެ ވާހަކަތަކަށް ރައްދު ދެއްވަމުން ރައީސް ޔާމީން ވިދާޅުވީ ވީޑިއޯއިން ލުތުފީގެ ހަށިގަނޑު ހަރާކާތްތަކުން އޭނާއަށް ފުލުހުން ނުފޫޒު ފޯރުވިތޯ ދެނެގަތުމުގެ ފުރުސަތެއް ނޯންނާނެ ކަމަށެވެ. އެކަމާ ގުޅިގެން ލުތުފީ އާ ސުވާލުކުރުމުގެ ފުރުސަތު ދިފާއުއަށް ނުލިބި އެ ވީޑިއޯ ޝަރީއަތަށް ބަލައިގަތުމަށް އިއުތިރާޒް ކުރައްވާ ކަމަށް ރައީސް ޔާމީން ވިދާޅުވިއެވެ. އަދި ލުތުފީގެ ހެކިބަސް ނެގުމަށް ދައުލަތުން މަސައްކަތް ކޮށްދިނުމަށް އެދުނެވެ.
ދައުލަތުން ބުނީ ހެކިބަސް ނެގުމަށް މަސައްކަތް ކޮށްފައި ވާނެ ކަމަށާއި މަޖުބޫރުން މީހެއްގެ ހެކިބަސް ނެގުމަށް ގާނޫނު ތަން ނުދޭކަން ފާހަގަ ކުރިއެވެ. އަދި ލުތުފީ ދީފައިވާ ވީޑިއޯ އިންޓަވިއުއާއި ދައުލަތުން ހުށައަޅާފައިވާ ކިތާބީ ހެކިތަކާއި ދިމާވާތީ އެވީޑިއޯ ހެއްކެއްގެ ގޮތުން ބޭނުން ކުރެވޭނެކަން ދައުލަތަށް ގަބޫލު ކުރެވޭކަން ފާހަގަ ކުރިއެވެ.
ޝަރީއަތުގައި ޝަރީފް ހެކިބަސް ދެއްވަމުން ވިދާޅުވީ އޭސީސީގެ އޭރުގެ ރައީސް ލުތުފީ އޭނާއަށް ގުޅުއްވުމަށް ފަހު އެސްކްރޯ އެކައުންޓް ގެ ޕްރޮސެސް އޮތް ގޮތް އެއްސެވި ކަމަށެވެ. އަދި ރައީސް ޔާމީނާއި ބީއެމްއެލް އާމެދު އެކްސްކްރޯ އެކައުންޓް ހުޅުވުމަށް ފަހު އެކަން އެނގުނު ކަމަށާއި އެކަމުގައި އަމަލީ ގޮތުން ބައިވެރިވެފައި ނުވާނެ ކަމަށެވެ. އެކައުންޓް ހުޅުވުނު ފަހުން ލިއުމެއް ބޭނުންވާ ކަަމަށް ރައީސް އޮފީހުން އާޒިމާ ޝުކޫރު އެދިލައްވާފައިވާ ކަމަށް ޝަރީފު ވިދާޅުވިއެވެ. އެސްކްރޯ އެކައުންޓް ހުޅުވީ އުސޫލުތަކާއި އެއްގޮތަށްތޯ ދިފާއުން ސުވާލު ކުރުމުން ޝަރީފު ވިދާޅުވީ އެ އެކައުންޓް ހުޅުވާފައިވަނީ އުސޫލާއި ބެންކް ގާނޫނާއި އެއްގޮތްވާގޮތުގެ މަތިންކަމަށް ގަބޫލު ކުރައްވާ ކަމަށެވެ. އެކައުންޓް ހުޅުވުމަކީ އެކަމަށް ޚާއްސަ ޑިޕާޓްމަންޓެއްގެ މަސްއޫލިއްޔަތެއް ކަމަށާއި އެއީ އޭނާގެ މަސްއޫލިއްޔަތެއް ނޫން ކަމަށް ޝަރީފު ވިދާޅުވިއެވެ.
ޝަރީފަށްފަހު ނަގާފައިވަނީކުރީގެ އިކޮނޮމިކް މިނިސްޓްރީގެ ސްޓޭޓް މިނިސްޓަރު އަދި ބީއެމްއެލްގެ ބޯޑު މެންބަރު ލުވެއިޒްގެ ހެކި ބަހެވެ. ލުވެއިޒްއަކީ ބީއެމްއެލްގެ ބޯޑުގެ 8 މެމްބަރުންގެ ތެރެއިން 1 މެމްބަރެވެ. ލުވެއިޒް ވިދާޅުވީ ރައީސް ޔާމީންގެ ފައިނޭންޝަލް ޓްރާންސްއެކްޝަނަކާ ގުޅޭގޮތުން އާޒިމާ ގުޅުއްވި ކަމަށެވެ. އޭނާއަކީ މިނިވަން ބޯޑު މެންބަރެއް ކަމަށް ވުމުން އެކަން ބީއެމްއެލްގެ އޭރުގެ ސީއީއޯ އެންޑްރޫ ހީލީގެ ސަމާލުކަމަށް ގެންނެވި ކަމަށާއި އޭގެ ފަހުން އެކަމުގައި އިތުރު އެއްވެސް މުއާމަލާތެއް އެއްވެސް ފަރާތަކާ ކޮށްފައި ނުވާނެ ކަމަށް ވިދާޅުވިއެވެ.
ޒަމީރު ހެކިބަސް ދެއްވަމުން ވިދާޅުވީ ރައީސް ޔާމީންގެ އެކައުންޓަށް އެއް މިލިއަން ޑޮލަރު ޖަމާކުރެއްވީ މުދަލެއް ވިއްކާލައިގެން އެމަނިކުފާނުގެ އެދިވަޑައިގަތުމަށް ކަމަށެވެ. ފައިސާ ޖަމާކުރަން ލަސްވެގެން ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރ އާޒިމާ ޝަކޫރު ގުޅުއްވި ކަމަށް ޒަމީރު ވިދާޅުވި އެވެ. ނަމަވެސް އެހާ ގިނަ އަދަދެއްގެ ފައިސާ ރައީސް ޔާމީނަށް ދެއްވީ ކީއްވެކަމެއް ޒަމީރު ވިދާޅު ނުވެއެވެ.
ވަސީމް ވިދާޅުވީ ޒަމީރުގެ ގޯއްޗެއް ދެ މިލިއަން ޑޮލަރަށް ބައްލަވައި ގެންނެވި ކަމަށެވެ. އޭގެ ފަހުން އޭނާ ކުރެއްވި މަސައްކަތަކަށް ބޭނުންފުޅުވެގެން ޒަމީރުގެ އަތުން އަނބުރާ ދައްކާ ގޮތަށް 15 މިލިއަން ރުފިޔާ ނަގުދު ފައިސާ ނެންގެވި ކަމަށް ވަސީމް ބުންޏެވެ.
އިސްގާޒީ ހައިލަމް ވިދާޅުވީ ދެން އޮންނަ ޝަރީޢަތެއްގައި ދައުލަތުން ހުށައެޅި ލުތުފީގެ ވީޑިއޯ އިންޓަވިއުއާމެދު ގޮތް ނިންމަވާނެ ކަމަށެވެ. އަދި ދިފާއުން ހުށައަޅާފައިވާ ހެކީގެ ހެކިބަސް ނަގާނެ ކަމަށެވެ. ދިފާއީ ހެކީގެ ހެކިބަސް ނެގުމުގެ އިތުރުން ޝަރީއަތަށް ހުށަހެޅިފައިވާ ކިތާބީ ހެކިތަކާ ގުޅޭ ގޮތުން ދެ ފަރާތަށް ވެސް ވާހަކަ ދެއްކުމުގެ ފުރުސަތު ދެއްވާނެ ކަމަށެވެ.
