7 ފެބްރުއަރީގެ ޖަރީމާގައި ބައިވެރިވި ސިޔާސީ ލީޑަރުންނަށް ފިޔަވަޅު އަޅަން ޖެހޭ: ޑރ. ޑީޑީ

2012 ވަނަ އަހަރުގެ ފެބުރުއަރީ 7 ވަނަ ދުވަހު ވެރިކަން ވައްޓާލަން ބައިވެރިވި ސިޔާސީ ލީޑަރުންނަށް ފިޔަވަޅު އަޅަންޖެހޭ ކަމަށް ކުރީގެ ފިޝަރީޒް މިނިސްޓަރ ޑރ. އިބްރާހިމް ދީދީ ވިދާލުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ޑރ. ޑީޑީ ވިދާޅުވީ، 7 ފެބްރުއަރީގެ ހާދިސާއަކީ ހިންގި ބޮޑު ޖަރީމާއެއް ކަމަށާއި، އެ ޖަރީމާ ހިންގުމުގައި ބައިވެރިވި މީހުންނަށް ފިޔަވަޅު އަޅަންޖެހޭ ކަމަށެވެ.

ޑރ. ޑީޑީ ވިދާޅުވީ، 7 ފެބްރުއަރީގެ ހާދިސާ ތަކުރާރުވުމަކީ އެއްވެސް ދިވެހި ރައްޔިތެއް އެދޭ ގޮތް ނޫން ކަމަށާއި، ދެވަނަ 7 ފެބްރުއަރީއެއް ތަކުރާރު ނުވުމަށް ކުރަންޖެހޭ އެންމެ ބޮޑު ކަމަކީ އެ ހާދިސާ ތަހުގީގު ކުރުން ކަމަށެވެ. އަދި އެ ޖަރީމާގައި އަމަލީ ގޮތުން ބައިވެރިވި ސިޔާސީ ލީޑަރުންނަށް ވެސް ފިޔަވަޅު އެޅުމަށް އޭނާ ގޮވައިލެއްވިއެވެ.

އެގޮތުން ޑރ. ޑީޑީ ވިދާޅުވީ، މި ސަރުކާރުން ރައްޔިތުންނަށް ވެފައި އޮތް އެންމެ ބޮޑު ވައުދަކީ އިންސާފު ހޯދައި ދިނުން ކަމަށްވާއިރު، 7 ފެބްރުއަރީގައި ހިނގި ކަންތައްތަކަށް އިންސާފު ލިބޭނެ ކަމަށް ރައްޔިތުން އުންމީދު ކުރާ ކަމަށެވެ.

މީގެއިތުރުން ޑރ. ޑީޑީ ވިދާޅުވީ، 7 ފެބްރުއަރީގައި ހިނގައިދިޔަ ކަންތައްތަކުގެ އިތުރުން ފުލުހުންގެ މުއައްސަސާގައި ތިބި މީހުން ވެރިންގެ އަމުރުތަކަށް ކިޔަމަންނުވި ވާހަކަ ވަރަށް ރަނގަޅަށް ކޯނީ ރިޕޯޓުގައި ފާހަގަކޮށްފައިވާ ކަމަށެވެ.

ނަމަވެސް ޑރ. ޑީޑީ ވިދާޅުވީ، ކުރީގެ ސަރުކާރުން ކޯނީ ރިޕޯޓުގައި ހިމެނިފައިވާ ކަންކަމަށް އެއްވެސް ވަރަކަށް އަޅާލާފައިނުވާ ކަމަށެވެ. އަދި ރައްޔިތުންގެ މަޖިލީހުގައި ހޯމް މިނިސްޓަރ ޝައިހް އިމްރާން އަބްދުﷲ ދެއްކެވި ވާހަކައަށް އިޝާރާތް ކުރައްވާ ޑރ. ޑީޑީ ވިދާޅުވީ، މިނިސްޓަރ އިމްރާން ފާހަގަކުރައްވަނީ ކޮން މަސްލަހަތެއްގެ ވާހަކަކަން އެނގިވަޑައިނުގަންނަވާ ކަމަށެވެ.

ބުރާސްފަތި ދުވަހު ރައްޔިތުންގެ މަޖިލީހުގެ ޖަލްސާގައި މިނިސްޓަރ އިމްރާން ވިދާޅުވީ އެ ދުވަހުގެ ހާލަތަށް ދިވެހިން އެނބުރި ދާ ނަމަ، ގައުމަށް ލިބޭނެ އެއްވެސް ފައިދާއެއް ނެތް ކަމަށެވެ. މިނިސްޓަރ ވިދާޅުވި ގޮތުގައި އެކަމުގެ ސަބަބުން ޤައުމުގައި އޮތް ހަމަޖެހުން ގެއްލިގެން ދިއުމަކީ އެކަށީގެންވާކަމެއް ކަމަށެވެ.