ކަރެކްޝަނަލް ސަރވިސް އާއި އަލަށްގުޅުނު 20 އޮފިސަރުން ހުވާކޮށްފި
ރަސްމިއްޔާތު ޝަރަފްވެރިކޮށްދެއްވީ އަބްދުﷲ މުނާޒް
ކަރެކްޝަންސްގެ އޮފިސަރުން
މޯލްޑިވްސް ކަރެކްޝަނަލް ސަރވިސް އާއި އަލަށްގުޅުނު 20 އޮފިސަރުން ހުވާކޮށްފި އެވެ.
އާދިއްތަ ދުވަހު މާފުށީ ޖަލުގައި ބޭއްވި ރަސްމިއްޔާތު ކޮމިޝަނަރ އޮފް ޕްރިޒަންސް އަބްދުﷲ މުނާޒް ޝަރަފްވެރި ކޮށްދެއްވާފައިވާއިރު، ޑެޕިއުޓީ ކޮމިޝަނަރ އޮފް ޕްރިޒަންސް އިބްރާހިމް މުޙައްމަދު ދީދީ އާއި ޖަލުތަކުގެ ޑައިރެކްޓަރުންގެ އިތުރުން، މިހާރު ޓްރެއިންނިންގ ކުރިއަށްދާ 60 އޮފިސަރުންވެސް ބައިވެރިވެފައިވެއެވެ.
މި ރަސްމިއްޔާތުގައި ވާހަކަ ދައްކަވަމުން މުނާޒް ވިދާޅުވީ، ތެދުވެރިކަމާއި އަމާނަތްތެރިކަމާއެކު ވަޒީފާގެ މަސްއޫލިއްޔަތުތައް އަދާކުރަންޖެހޭ ކަމަށާއި، ޕެރޯލްއާއި ޖަލުތަކުގެ ޤާނޫނުތަކާއި ޤަވާއިދުތަކަށް ބޯލަނބަންޖެހޭނެ ކަމަށެވެ. އަދި ޕެރޯލްގެ ޤާނޫނާއި ޤަވާއިދުތަކާއި ޖަލުތަކުގެ ޤާނޫނާއި ޤަވާއިދުތަކަށް އަހުލުވެރިވެ، އެއާ ޚިލާފު ނުވެ، ހަވާލުކުރެވޭ މަސައްކަތްތައް ފަރުވާތެރިކަމާއިއެކު ކޮށްގެން ކަމަށެވެ.
އޭގެ އިތުރުން، ޖަލުތަކުގައި ތިބޭ ޤައިދީންގެ އިންސާނީ ހައްޤުތައް ރައްކާތެރި ކުރަންޖެހޭނެކަން ވެސް މުނާޒްވަނީ ފާހަގަ ކުރައްވާފައެވެ.
މި ރަސްމިއްޔާތުގައި އޮފިސަރުންގެ ހުވާލާދެއްވާފައިވަނީ ސިވިލް ކޯޓުގެ އިސް ޣާޒީ އަލްއުސްތާޒް ޢަބްދުﷲ އަލީއެވެ.
