7 ފެބުރުއަރީގެ ކަންކަން ތަހުޤީޤްކުރަންޖެހޭ: ރައީސް ނަޝީދު
އަމުރަށް ނުކިޔަމަންތެރިވުންކަމަކީ ގޯހެއް، އެކަމުން ދައުލަތަށް ކުރާނެ ފައިދާއެއް ނޯންނާނެ
ފެބުރުއަރީ 7 ވަނަ ދުވަހު ރައީސް ނަޝީދު ޖުމްހޫރީ މައިދާން ސަރަހައްދުގައި
2012 ވަނަ އަހަރުގެ ފެބުރުއަރީ 7 ވަނަ ދުވަހު ފުލުހުންނާއި ސިފައިން ހިންގި ކަންކަން ތަހުޤީޤްކުރަންޖެހޭކަމަށް ގަބޫލުކުރައްވާކަމަށް ރައީސް މުހައްމަދު ނަޝީދު ވިދާޅުވެއްޖެ އެވެ.
އެމްޑީޕީގެ ޒުވާނުންގެ ކޮންގްރެސްގައި 7 ފެބުރުއަރީގެ ކަންކަން ތަހުޤީޤްކުރަންޖެހޭކަމަށް ގަބޫލުކުރައްވަންތޯ ޒުވާނަކު ސުވާލުކުރުމުން ސަމާސާ ރާގަކަށް ރައީސް ނަޝީދު ވިދާޅުވީ އެއީ "ފޭރާން ހަލާކުވާނެ" ކަމަކަށް ވާކަމެއް ކަމަށެވެ. އެމަނިކުފާނު އެ އިޝާރަތްކުރެއްވީ ބުރާސްފަތި ދުވަހުގެ ރައްޔިތުންގެ މަޖިލީހުގެ ޖަލްސާގައި 7 ފެބުރުއަރީގެ ކަންކަން ތަހުޤީޤްކުރާނަމަ ގައުމަށް ގެއްލުން ލިބިދާނެ ކަމަށް ހޯމް މިނިސްޓަރު އިމްރާން ވިދާޅުވި ވިދާޅުވުމަށެވެ.
އެކަމުގައި އެމަނިކުފާނުގެ ހިޔާލު ތަފާތުކަން ފާހަގަކުރައްވާ ރައީސް ނަޝީދު ވިދާޅުވީ އެ ދުވަހު ފުލުހުންނާއި ސިފައިން ހިންގި ކަންކަމަކީ އަމުރަށް ނުކިޔަމަންތެރިކަން ދައްކާކުރި ކަންތައްތަކެއް ކަމަށާއި، އަމުރަށް ނުކިޔަމަންތެރިވުންކަމަކީ ގޯހެއް ކަމަށެވެ. އަދި ލައިން އޮފް ކޮމާންޑް ގެއްލުމަކީ ދައުލަތަކަށް ރަނގަޅެއްވާނެ ކަންކަމެއް ނޫންކަމަށް ރައީސް ނަޝީދު ވިދާޅުވި އެވެ. އެހެންކަމުން އެމަނިކުފާނު ދެކިވަޑައިގަންނަވާގޮތުގައި އެކަންކަން ބަލަންޖެހޭނެ ކަމަށް ރައީސް ނަޝީދު ވިދާޅުވި އެވެ.
ބުރާސްފަތި ދުވަހު ރައްޔިތުންގެ މަޖިލީހުގެ ޖަލްސާގައި މިނިސްޓަރ އިމްރާން ވިދާޅުވީ އެ ދުވަހުގެ ހާލަތަށް ދިވެހިން އެނބުރި ދާ ނަމަ، ގައުމަށް ލިބޭނެ އެއްވެސް ފައިދާއެއް ނެތް ކަމަށެވެ. މިނިސްޓަރ ވިދާޅުވި ގޮތުގައި އެކަމުގެ ސަބަބުން ޤައުމުގައި އޮތް ހަމަޖެހުން ގެއްލިގެން ދިއުމަކީ އެކަށީގެންވާކަމެއް ކަމަށެވެ.
އެމްޑީޕީގެ ސަޕޯޓަރުން މިއަދުވެސް ތުހުމަތުކުރާ ގޮތުގައި އެމްޑީޕީގެ ވެރިކަން ވައްޓާލާފައިވަނީ ބަޢާވާތަކުންނެވެ. އަދި އެކަމުގައި ޝާމިލްވި ފުލުހުންނާއި ސިފައިންނާއި މެދުވެސް ފިޔަވަޅު އަޅަންޖެހެ އެވެ.
ހޯމް މިނިސްޓަރ އިމްރާން އަބްދުﷲ އަކީ އެމްޑީޕީގެ ވެރިކަން ވައްޓާލުމަށް އޭރުގައި އެންމެ ގަދަޔަށް މަސައްކަތްކުރެއްވި ބޭފުޅުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. އަދި ރައީސް ނަޝީދު އިސްތިއުފާދެއްވަން ނިންމެވި ހަބަރާއެކު، ފުލުހުންގެ އިދާރާގެ ތެރޭގައި އުފާފާޅުކޮށް ހެއްދެވި ބޭފުޅުންގެ ތެރޭގައިވެސް މިނިސްޓަރ އިމްރާން ހިމެނިވަޑައިގަންނަވަ އެވެ.
