ރައީސް ނަޝީދު އުކުޅަހަށް ވަޑައިގެންފި
ރައީސް ނަޝީދު އުކުޅަހަށް ވަޑައިގެންފަ ވަނީ ހަވީރު 4:30 ހާއިރު
ރައީސް ނަޝީދު އުކުޅަހަށް ވަޑައިގަތުމުން އެ ރަށުން އެމަނިކުފާނަށް ވަނީ ހޫނު މަރުހަބާއެއް ދަންނަވާފަ
ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އުކުޅަހަށް ވަޑައިގެންފިއެވެ.
ރައީސް ނަޝީދު އުކުޅަހަށް ވަޑައިގަނެފައި ވަނީ އޮގަސްޓް 27 ވަނަ ދުވަހު ހަވީރު 4:30 ހާއިރު މޯލްޑިވިއަންގެ ސީޕްލޭނެއްގައެވެ. އެމަނިކުފާނަށް މަރުހަބާ ދެއްނެވުމަށްޓަކައި ރަށުގެ ގިނަ އަދަދެއްގެ ރައްޔިތުންވަނީ ބަނދަރު މައްޗަށް ނުކުމެފައެވެ.
ރައްޔިތުންގެ މަޖިލީހުގެ ރައީސްގެ މި ދަތުރުފުޅަކީ އުކުޅަހުގައި މިހާރު ކުރިއަށްދާ އުކުޅަސް ފެއަރ ގައި ބައިވެރިވެވަޑައިގަތުމަށްޓަކައި އެމަނިކުފާނު ކުރައްވާ ދަތުރުފުޅެކެވެ. އެމަނިކުފާނު ފެއަރއަށް ޒިޔާރަތް ކުރައްވައި ފެއަރގައި ހުރި ސްޓޯލްތަކަށް ޒިޔާރަތްކުރައްވައި ސްޓޯލްތައް ބައްލަވާލައްވާނެއެވެ. އަދި ސްކީމާ ކޮންފަރެންސްގެ ބައިވެރިންނާ އެމަނިކުފާނު ރަސްމީކޮށް ބައްދަލުކުރެއްވުމަށް ވެސް ވަނީ ހަމަޖެހިފައެވެ.
މި ދަތުރުފުޅުގައި އެ މަނިކުފާނު ވަނީ ރަށުގައި ގަސް އިންދުމުގެ ޕްރޮގްރާމެއް ވެސް ފައްޓަވާ ދެއްވާފައެވެ. މި ޕްރޮގްރާމްގެ ދަށުން އުކުޅަސް ޓެކް ފެއަރ އަށް ވަޑައިގެން އުޅުއްވާ ޕްރޮފެސަރުންނާ ސައިންޓިސްޓުން ވެސް ރަށުގައި ގަސް އިންދާނެއެވެ.
ރައީސް މުހައްމަދު ނަޝީދަކީ މިފަދަ ކޮންފަރެންސްތައް ރާއްޖޭގެ އެކި ކަންކޮޅުތަކުގައި ބޭއްވުމަށް އަބަދުވެސް ބާރު އަޅުއްވާ މަސައްކަތްކުރައްވާ ބޭފުޅެކެވެ.
