ދައުރު ދިގު ކުރަން މަޖިލީހުން ފާސްކޮށްފި
27 އޯގަސްޓު 2019 | އަންގާރަ 08:50ދައުރު ދިގު ކުރަން 72 މެމްބަރުން ވަނީ ވޯޓް ދެއްވާފައި
ަމަޖިލިސް ޗެމްބަރުގައި މެމްބަރުން
މަޖިލީހުގެ މި ދައުރު ސެޕްޓެމްބަރު މަހުގެ 5 ވަނަ ދުވަހާއި ހަމައަށް ދިގު ކުރަން ފާސްކޮށްފިއެވެ.
ދައުރު ދިގު ކުރަން 72 މެމްބަރުން ވަނީ ވޯޓް ދެއްވާފައެވެ. މަޖިލީހުގެ ގަވައިދުގައިވާ ގޮތުން ދެވަނަ ދައުރު ހިނގާނީ 01 ޖޫން އިން ފެށިގެން 31 އޮގަސްޓްގެ ނިޔަލަށެވެ.
އޮގަސްޓު މަހުގެ ނިޔަލަށް މަޖިލިސް ޗުއްޓީއަށް ނުގޮސް ދައުރު ދިގު ކުރަން ނިންމީ ސަރުކާރުން ގިނަ ބިލްތަކެއް ފޮނުވާފައި ހުރުމާއެކު، އެ މަސައްކަތްތައ ނިންމުމުގެ ގޮތުންނެވެ.
މަޖިލީހުގެ ފުރަތަމަ ދައުރު ހިނގާނީ 01 ފެބްރުއަރީން ފެށިގެން 30 އެޕްރީލް އަށެވެ. ދެވަނަ ދައުރު ހިނގާނީ 01 ޖޫން އިން ފެށިގެން 31 އޮގަސްޓަށެވެ. އަދި ތިންވަނަ ދައުރު ހިނގާނީ 01 އޮކްޓޫބަރު އިން 30 ނޮވެމްބަރުގެ ނިޔަލަށެވެ.
މަސައްކަތް ނިންމާލުމުގެ ގޮތުން މަޖިލީހުގެ ޖަލްސާތަށް މިހާރު ދަނީ ދެ ދަންފަޅީގައި ބާއްވަމުންނެވެ. ހޯމަދުވަހު ހެދުނު ދަންފަޅި އަދި ރޭގަނޑު ދަންފަޅީގައިވެސް ވަނީ ޖަލްސާ ބާއްވާފައެވެ. އަދި އަންގާރަދުވަހުވެސް ދެ ދަންފަޅީގައި މަޖިލީހުގެ ޖަލްސާތައް ކުރިއަށްދާނެއެވެ.
