ޕޯޗުގަލް އަދި ޔުވެންޓަސްގެ ތަރި ކްރިސްޓިއާނޯ ރޮނާލްޑޯ ރިޓަޔާ ކުރަން އުޅޭކަމުގެ އިޝާރާތެއް ދީފިއެވެ.
ޔުވެންޓަސްގެ ތަރި ރޮނާލްޑޯ އޭނާގެ ރިޓަޔާމެންޓާ ބެހޭގޮތުން ބުނީ ކުރިޔަށް އޮތް އަހަރު ވެސް އޭނާ ރިޓަޔާ ކޮށްފާނެ ކަމަށާއި ނަމަވެސް އޭނާ އަށް 40 އަހަރާއި ހަމައަށް ވެސް ކުޅެވޭނެ ކަމަށެވެ.
ރިޓަޔާމެންޓާއި މެދު އަދި ނުވިސްނާ ކަމަށް ބުނަމުން ރޮނާލްޑޯ ބުނީ އޭނާ ހުރީ އަދި ވަރަށް ފިޓްކޮށް ކަމަށާއި ނަމަވެސް އޭނާ ކުޅުން ހުއްޓާލާ ދުވަސް ވަރަށް ކައިރި ވެއްޖެކަމަށެވެ.
ގައުމީ ޓީމަށާއި ކްލަބް ލެވަލްގައި އެއް ފެންވަރެއްގައި މިހާދުވަހު ކުޅެވުނީ އޭނާ ކުރި ބުރަ މަސައްކަތުން ކަމަށް ބުނަމުން ރޮނާލްޑޯ ބުނީ ހުނަރެއް ލިބިފައި ހުރިކަމުގައި ވިޔަސް އެ ހުނަރު ތަރައްގީ ކުރުމަށް މަސައްކަތް ނުކުރާނަމަ ލިބިފައިވާ ހުނަރުން ވާނެ ފައިދާއެއް ނެތް ކަމަށެވެ.
ފަސް އަހަރު ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާގެ މަގާމު ހޯދައިފައިވާ ރޮނާލްޑޯ އިތުރަށް ބުނީ ފުޓުބޯޅާގައި އޭނާ އަށްވުރެ ގިނަ ރިކޯޑް ހަދައިފައިވާ ކުޅުންތެރިއެއް ހުރިހެން ހީނުވާ ކަމަށެވެ.
ރޮނާލްޑޯއާއި އެކު ޔުވެންޓަސް އަށް ކުޅެމުން އަންނަ ކެދީރާ ބުނީ ރޮނާލްޑޯ އަކީ އަރަމުން އަންނަ ޒުވާން ކުދިންނަށް ނަމޫނާ ދައްކަމުން އަންނަ ކުޅުންތެރިއެއް ކަމަށާއި ޔުވެންޓަސްގެ ޕްރެކްޓިސްތަކަށް އެންމެ ކުރިން ގޮސް ހުންނާނީ ރޮނާލްޑޯ ކަމަށެވެ.
ރޮނާލްޑޯ އަންނަނީ އުމުރުން 34 އަހަރުގައިވެސް މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ ޔޫރަޕްގެ އެންމެ މޮޅު ކުޅުންތެރިޔާގެ މަގާމަށް މިއަހަރުވެސް ނޮމިނޭޓް ވެފައެވެ.
