ކޮމިޝަނަރ ޖެނެރަލް އޮފް ޓެކްސޭޝަން އާއި ޑެޕިއުޓީ ކޮމިޝަނަރ މަގާމުން ވަކިކުރުމުގެ ބާރު ލިބިދޭ ބިލް މަޖިލީހަށް ބަލައިގަނެ ކޮމިޓީއަށް

ކޮމިޝަނަރ ޖެނެރަލް އޮފް ޓެކްސޭޝަން ނުވަތަ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން މަގާމްގެ މަސްއޫލިއްޔަތު އަދާކުރުމުގައި އިހްމާލްވެއްޖެނަމަ، އޭނާ މަގާމުން ވަކި ކުރުމުގެ ބާރު ރައްޔިތުންގެ މަޖިލީހަށް ލިބޭ ގޮތަށް "ޓެކްސް ނެގުމާބެހޭ އިދާރީ" ގާނޫނަށް އިސްލާހު ގެނައުމަށް ހުށަހެޅުނު ބިލް މަޖިލީހަށް ބަލައިގަނެ ކޮމިޓީއަށް ފޮނުވައިފިއެވެ.

މި ބިލް ވަނީ 72 މެމްބަރުންގެ ވޯޓާއެކު މަޖިލީހަށް ބަލައިގެންފައެވެ. ބިލް އިތުރަށް ދިރާސާ ކުރުމަށް ވަނީ އިގްތިސާދީ ކޮމިޓީއަށް ފޮނުވާފައެވެ. މި ބިލް ސަރުކާރުގެ ފަރާތުން މަޖިލީހަށް ހުށަހަޅާފައިވަނީ އައްޑޫ ހުޅުދޫ ދާއިރާގެ މެމްބަރު އިލްޔާސް ލަބީބްއެވެ.

ޓެކްސް ނެގުމާއި ބެހޭ އިދާރީ ގާނޫނަށް އިސްލާހު ގެނައުމުގެ ބިލްގައިވަނީ ކޮމިޝަނަރ ޖެނެރަލް އަދި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން އައްޔަން ކުރުމާއި ވަކިކުރުމާއި މުސާރަ ކަނޑައެޅުމާއި ގުޅޭ ގޮތުން އިސްލާހު ހުށަހަޅާފައެވެ.

ގާނޫނަށް ގެނެވުނު އިސްލާހުގައިވާ ގޮތުން ކޮމިޝަނަރ ޖެނެރަލް އޮފް ޓެކްސޭޝަން އާއި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމުގައި ތިއްބެވި ބޭފުޅުން މަސްއޫލިއްޔަތުތައް އަދާކުރުމުގައި އިހްމާލްވިކަމަށް، ނުވަތަ މަޤާމުގެ ނުފޫޒް ނާޖާއިޒް ގޮތުގައި ބޭނުންކުރާ ކަމަށް، ނުވަތަ ބޯޑުން ފާސްކޮށްފައިވާ ސުލޫކީ މިންގަނޑާ ޚިލާފުވެފައިވާ ކަމަށް ރައްޔިތުންގެ މަޖިލީހުގެ މަސްއޫލިއްޔަތު ހަވާލުކޮށްފައިވާ ކޮމިޓީއަށް ފެނިގެން، ކޮމިޝަނަރ އާއި ޑެޕިއުޓީ ކޮމިޝަނަރ މަގާމުން ވަކި ކުރުމަށް، ރައްޔިތުންގެ މަޖިލީހުގެ ޖަލްސާއެއްގައި ހާޒިރުވެ ވޯޓުގައި ބައިވެރިވާ މެމްބަރުންގެ އަޣުލަބިއްޔަތުން ފާސްކުރުމުން އޭނާ އެ މަގާމުން ވަކިވާނެ ކަމަށެވެ.

މި ދެ މަގާމު އެއްވެސް ސަބަބަކާއި ހުރެ ހުސްވެއްޖެނަމަ، 45 (ސާޅީސް ފަހެއް) ދުވަހުގެ ތެރޭގައި އެ މަގާމަށް މީހަކު އައްޔަންކުރުމަށް، ބިލަށް ހުށަހެޅުނު އިސްލާހުގެ ތެރޭގައި ވަނީ ބުނެފައެވެ.

ކޮމިޝަނަރ ޖެނެރަލް އާއި ޑެޕިއުޓީ ކޮމިޝަނަރ ޖެނެރަލްގެ މަގާމްގެ މުއްދަތުގެ ދައުރަކީ ފަސް އަހަރުގެ ގޮތުގައި ކަނޑައެޅުމަށް ބިލްގައިވަނީ ބުނެފައެވެ. އެހެން ނަމަވެސް މަގާމްގެ ދައުރުގެ ތެރެއިން، އެ ދެ މަގާމް ރައްޔިތުންގެ މަޖިލީހުން ވަކި ނުކުރާނަމަ، އެ ބޭފުޅަކު އިތުރު ދައުރަކަށް އައްޔަން ކުރުމަށް ގާނޫނު ހުރަހެއް ނާޅައެވެ.

މީގެ އިތުރުން މީރާގެ ބޯޑްގެ މެމްބަރުންނާއި، ކޮމިޝަނަރ ޖެނެރަލް އާއި ޑެޕިއުޓީ ކޮމިޝަނަރ ޖެނެރަލް، މަގާމާއި ހަވާލުވުމުގެ ކުރިއަށް ފާއިތުވީ އަހަރުގެ، އަދި އެއިން ފަރާތެއް މަގާމުން ވަކިވާތާ އެއް އަހަރު ދުވަސް ހަމަވުމާ ހަމައަށް، އަހަރަކު އެއްފަހަރު، އެފަރާތުގެ މިލްކިއްޔާތުގައިވާ މުދަލާއި ފައިސާގެ ހިސާބުތަކާއި، ވިޔަފާރީގެ މަސްލަހަތުތަކާއި، އަރަންޏާއި ދަރަނި ހާމަކޮށް އޮޑިޓަރ ޖެނެރަލަށް ހުށަހަޅަންވާނެ ކަމަށް ވެސް ޓެކްސް އާއި ބެހޭ އިދާރީ ގާނޫނަށް އިސްލާހު ގެނައުމަށް ހުށަހެޅުނު އިސްލާހުގައި ވަނީ ބުނެފައެވެ. އަދި އެ ބަޔާން މީރާގެ ވެބްސައިޓްގައި ޝާއިއުކުރަންވާނެ ކަމަށް ވެސް ވަނީ ބުނެފައެވެ.