ޓެކް ފެއަރ އަށް އުކުޅަސް އޮތީ ތައްޔާރަށް، ތިން ދުވަހެއްގެ ތެރޭ ސެންޓަރުގެ މަސައްކަތް ނިންމާލެވޭނެ
މިހާރު ކުރިޔަށް ދަނީ ލޭންޑްސްކޭޕިން މަސައްކަތް
ޓެކް ފެއަރ ސްޓޭޖްގެ މަސައްކަތް ކުރިޔަށް ދަނީ
އއ. އުކުޅަހުގައި ބާއްވާ ''އުކުޅަސް ޓެކް ފެއަރ'' އަށް މުޅި ރަށް އޮތީ ތައްޔާރަށް ކަމަށާއި، އެ ފެއަރ ބާއްވަން ތައްޔާރު ކުރަމުންދާ ކޮންފަރެންސް ހޯލްގެ މަސައްކަތް ތިން ދުވަހެއްގެ ތެރޭގައި ނިންމާލެވޭނެ ކަމަށް އެ ރަށު ކައުންސިލުން ބުނެފިއެވެ.
ޕްރޮފެސަރު ހަސަން އުގައިލް ފައުންޑޭޝަނުން އިސްނަގައިގެން ޓޫރިޒަމް މިނިސްޓްރީއާ، އުރިދޫގެ ގުޅިގެން ރާއްޖޭގައި ފުރަތަމަ ފަހަރަށް ބާއްވާ ޓެކް ފެއަރ އޮންނާނީ މި މަހުގެ 26 އިން 28 ގައި އުކުޅަހުގައެވެ. އެ މަހާސިންތާ ދެބަޔަކަށް ބަހާލައިގެން ކުރިއަށްގެންދާއިރު، ފުރަތަމަ ބަޔަކީ އިންޓަނޭޝަނަލް ކޮންފަރެންސް އަދި ދެވަނަ ބަޔަކީ ޓެކް ފެއާގެ ބަޔެވެ. އިންޓަނޭޝަނަލް ބައިގައި ބައިވެރިވާނީ އާޓިފިޝަލް އިންޓަލިޖެންސް އަދި ކޮމްޕިއުޓަރ ސައިންސްގެ ދުނިޔޭގެ ފެންވަރުގައި ފުންނާބު އުސް އިސް ފަރާތްތަކުން ކަމަށާއި، މީގެ އިތުރުން ޓެކްނޮލޮޖީއާ ގުޅުންހުރި މައުލޫމާތުތައް ހިއްސާކުރާއިރު، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މުރަކައާގުޅޭ ހޯދުންތަކުގެ ދިރާސާގެ މައްޗަށް ހުށައަޅުއްވައިދެއްވާ ޚާއްސަ ހުށައެޅުމެއްވެސް އޮންނާނެ ކަމަށް އުގައިލް ފައުންޑޭޝަނުން މައުލޫމާތުދެއެވެ.
ޓެކް ފެއަރގެ އެންމެ ފަހުގެ މައުލޫމާތު ރާއްޖެ.އެމްވީ އަށް ހިއްސާކުރަމުން އުކުޅަސް ކައުންސިލްގެ ރައީސް ޝައުކަތު އިބްރާހިމް ވިދާޅުވީ، ކޮންފަރެންސް ސެންޓަރ ހެދުމުގެ މަސައްކަތް ވަރަށް ހަލުވިކަމާއިއެކު ކުރިޔަށްދާ ކަމަށެވެ. އެރަށުގައި ޓެކް ފެއަރ ބޭއްވުމަށް ޕްރޮފެސަރު އުގެއިލް ނިންމެވުމާއި ގުޅިގެން މިދިޔަ އަހަރުގެ ޑިސެމްބަރު މަހުން ފެށިގެން ކައުންސިލުން ދަނީ ތައްޔާރުވަމުންނެވެ. ޝައުކަތު ވިދާޅުވީ، ފެއަރ ބޭއްވުމަށް ޕްލޭން ހުށައެޅުމުން ސަރުކާރުން އެކަމަށް ކުރު މުއްދަތެއްގެ ތެރޭގައި އިޖާބަދީފައިވާ ކަމަށެވެ. 22 މިލިއަން ރުފިޔާގެ އެ މަޝްރޫއު ސަރުކާރުން ހަވާލު ކުރީ އަމީން ކޮންސްޓްރަކްޝަންއާ އެެވެ.
މިހާރު ކުރިޔަށް ދަނީ އެންމެ ފަހުގެ މަސައްކަތް ކަމަށާއި، ކުރިޔަށް އޮތް ދެތިން ދުވަސް ތެރޭ ސެންޓަރު މަސައްކަތް އެއްކޮށް ނިންމާލެވޭނެ ކަމަށް ޝައުކަތު ވިދާޅުވިއެވެ.
ޓެކް ފެއަރ އަށް އިނގިރޭސިވިލާތުގެ ޕްރޮފެސަރުންގެ އިތުރުން ސައިންޓިސްޓުންގެ ޓީމެއް ވަޑައިގަންނަވާނެއެވެ. ފެއަރ ހުޅުވުމުގެ ރަސްމިއްޔާތަށް ވަޒީރުންނާއި ރައްޔިތުންގެ މަޖިލީހުގެ މެމްބަރުންނަށް ކައުންސިލުން ވަނީ ދައުވަތުދީފައެވެ. ކައުންސިލްގެ ރައީސް ވިދާޅުވީ، މެހެމާނުންނަށް ހޫނު މަރުހަބާއެއް ކިޔުމަށް ހަމަޖެހިފައިވާ ކަމަށެވެ. ފެއަރ ވަޑައިގަ ފަރާތްތަކުން ރަށުގެ ގެސްޓް ހައުސްތަކުގައި ތިބެން ހަމަޖެހިފައިވާއިރު ހުރިހާ ގެސްޓް ހައުސްއެއް ކަހަލަ ގޮތަކަށް ވަނީ ބުކްކޮށްފައެވެ.
ރަށަށް ޒިޔާރަތް ކުރާ ފަރާތްތަކަށް ހެނދުނު އަށަކުން ނުވަޔަކަށް މަރުހަބާ ކިޔުމަށް އެކި ކަހަލަ ހަރަކާތްތައް ބަނދަރު ސަރަހައްދުގައި ހިންގުމަށް ހަމަޖެހިފައިވާކަން ޝައުކަތު ވިދާޅުވިއެވެ. ނިމިގެން ދިޔަ ރިޔާސީ އިންތިހާބުގައި ރައީސް ސޯލިހު އަށް ސާފު ޢައުލަބީ އަތެއް ހޯދައިދިން އުކުޅަހުން ވަނީ ޓެކް ފެއަރ ބާއްވާ ސެންޓަރު ހުޅުވައިދެއްވުމަށް އެމަނިކުފާނަށް ދައުވަތު އަރުވާފައެވެ. ޓެކް ފެއަރގެ ސެޝަންތައް ފެށިގެން ދާނީ އެ ދުވަހުގެ މެންދުރު ފަހުގެ ވަގުތެއްގައި ކަމަށާއި، ޔޫތް މިނިސްޓްރީއާ ގުޅިގެން ރަށު ބޮޑު ބެރު ގްރޫޕުގެ ހަރަކާތްތައް ބޭއްވުމަށް ހަމަޖެހިފައިވާކަން ކައުންސިލްގެ ރައީސް ފާހަގަ ކުރެއްވިއެވެ. އެ ފަދަ ޓެކް ފެއަރ އެއް ބޭއްވުމަކީ އެރަށް ދިވެހި ރާއްޖޭގެ ތާރީހުގެ ތެރެއަށް ވަދެގެން ދިޔުން ކަމަށް ކައުންސިލަރު ވަނީ ސިފަ ކުރައްވާފައެވެ.
ތިން ދުވަހަށް ކުރިޔަށްދާ ފެއަރ ނިމުމުން ކައުންސިލްގެ ވިސްނުމަކީ ކޮންފަރެންސް ޓޫރިޒަމް އަށް އެ ސެންޓަރު ހުޅުވާލުމެވެ. އުކުޅަހަކީ ޓޫރިޒަމް ފުޅާކުރަމުން އަންނަ ރަށަކަށްވާއިރު އުއްމީދަކީ އެ ސެންޓަރާ އެކު ކޮންފަރެންސް ޓޫރިޒަމް އެރަށަށް ތާއަރަފް ވެގެން ދިޔުން ކަމަށް ކައުންސިލުން ބުންޏެވެ.
