ރައީސް ޔާމީންއާ ދެކޮޅަށް ހެކިބަސް ނެގުން، ބުރާސްފަތި ދުވަހުގެ 9:30 ގައި
ރައީސް ޔާމީންގެ ޝަރީއަތް ކުރިއަށް ދަނީ އާންމުކޮށް ހުޅުވާލައިގެން
ކުރީގެ ރައީސް އަބްދުﷲ ޔާމީން
ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ މަނީ ލޯންޑަރިންގެ މައްސަލައިގައި ދައުލަތުން އެމަނިކުފާނާއި ދެކޮޅަށް ހުށައެޅި ހެކިބަސް ނެގުން ބުރާސްފަތި ދުވަހުގެ ހެނދުނު 9:30 އަށް ތާވަލް ކޮށްފިއެވެ.
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ މީޑިއާ އޮފިޝަލް ފައިސަލް އާދަމް ރާއްޖެއެމްވީއަށް ވިދާޅުވީ ރައީސް ޔާމީންގެ ޝަރީއަތް ބުރާސްފަތި ދުވަހަށް ތާވަލް ކޮށްފައިވާ ކަމަށާއި އެ ޝަރީއަތް ވެސް ކުރީ ޝަރީއަތްތަކެކޭ އެއްގޮތަށް ލައިވް ކުރަން ހަމަޖެހިފައިވާ ކަމަށެވެ.
މިއީ ރައީސް ޔާމީނާއި ދެކޮޅަށް ހެކި ބަސް ނެގުމަށް ބާއްވާ ދެވަނަ ޝަރީއަތެވެ. ފުރަތަމަ ޝަރީއަތް ބާއްވާފައިވަނީ މިމަހުގެ 4 ވަނަ ދުވަހުއެވެ. އެދުވަހު ނަގާފައިވަނީ އެންޓިކަރަޕްޝަން ކޮމިޝަން(އޭސީސީ)ގެ ރައީސް މުއައްވިޒު ރަޝީދުގެ ހެކިބަހެވެ. ބުރާސްފަތި ދުވަހު ބާއްވާ ޝަރީއަތުގައި ވެސް މުއައްވިޒުގެ ހެކިބަސް ނަގާނެއެވެ.
އޭސީސީއިން ރައީސް ޔާމީންގެ މައްސަލަ ތަހުގީގުކޮށް ފުލުހުންނަށް ފޮނުވި ރިޕޯޓު ސައްހަތޯ ބެލުމަށް ދައުލަތުން ބުނި ނަމަވެސް ރައީސް ޔާމީންގެ ފަރާތުން ވަނީ އެންމެ ފަހުން ބޭއްވި ޝަރީއަތުގައި ދައުލަތުން ހުށައެޅި ކިތާބީ ހެކީގެ ލިސްޓުގައި އެ ރިޕޯޓް ނުހިމެނޭ ކަމަށް ބުނެފައެވެ. އެހެން ކަމުން އެ ރިޕޯޓް ފިޔަވައި އެހެން ކަންތައްތަކާއި ގުޅިގެން މުއައްވިޒާއި ވަނީ ސުވާލު ކޮށްފައެވެ. މުއައްވިޒުގެ ހެކިބަސް ބުރާސްފަތި ދުވަހު ނަގާނީ އެ ރިޕޯޓާއި ގުޅިގެން އެކަންޏެވެ.
ދައުލަތުގެ ފަރާތުން ރައީސް ޔާމީނާއި ދެކޮޅަށް ހުށައެޅި ހެކީގެ ގޮތުގައި މުއައްވިޒުގެ އިތުރުން ކުރީގެ ނައިބު ރައީސް އަހުމަދު އަދީބާއި، އޭސީސީގެ ކުރީގެ ރައީސް ހަސަން ލުތުފީއާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރ އަބްދުﷲ ޒިޔާތާއި، މުހައްމަދު ވަސީމާއި، ކުރީގެ ޓުއަރިޒަމް މިނިސްޓަރ މޫސާ ޒަމީރާއި، ބީއެމްއެލްގެ ބޯޑް މެމްބަރުން ކަމަށްވާ މުހައްމަދު ލުވެއިޒް އާއި މުހައްމަދު ޝަރީފު ވަނީ ހެކިންގެ ގޮތުގައި ދައުލަތުން ހުށައަޅާފައެވެ.
ކިތާބީ ހެކީގެ ގޮތުގައި އޭސީސީއިން ހެދި އެސްކޮރޯ އެކައުންޓް އެއްބަސްވުމާއި، އޭސީސީގެ ތަހުގީގު ރިޕޯޓާއި، އެމްއެމްޕީއާރްސީގެ އޮޑިޓް ރިޕޯޓާއި، ރައީސް ޔާމީން އޭސީސީއަށް ދިން ބަޔާނާއި، މައްސަލާގައި ހިމެނޭ ޓްރާންސްސެކްޝަންތަކުގެ ޗެކްތަކާއި، ސްލިޕްތަކާއި، ބޭންކް ސްޓޭޓްމެންޓްތަކާއި، ޔާމީންގެ މާލީ ބަޔާން ހުށައަޅާފައެވެ.
ޔާމީންގެ ފަރާތްޕުޅުން ދިފާއީ ހެކިވެރިއެއްގެ ގޮތުގައި ހުށަހެޅުއްވީ އެމްއެމްއޭގެ ކުރީގެ ގަވަރުނަރު އަޒީމާ އާދަމެވެ. އަދި ކިތާބީ ހެކިތަކުގެ ގޮތުގައި ހުށަހެޅުއްވީ ފުރަތަމަ ހެއްކަކީ މަނީ ލޯންޑްރިންގެ އެއްވެސް ކަމެއް ނުހިނގާ ކަމަށް ބުނެ އެމްއެމްއޭ އިން ނެރުނު ނޫސް ބަޔާނެކެވެ. އެނޫސްބަޔާނަކީ އަލްޖަޒީރާ އިން ގެނެސްދިން "ސްޓީލިން ޕެރެޑައިސް" ރިޕޯޓުގައި ހުރި ކަންކަން ދޮގުކޮށް އެމްއެމްއޭއިން ނެރުނު ބަޔާނެވެ. މީގެ އިތުރުން އެމްއެމްއެމްޕީއާރުސީ އާއި އެސްއޯއެފްއާ ދެމެދު ހިނގި މުއާމަލާތުތަކާ ގުޅިގެން އެސްއޯއެފްގެ މައްޗަށް ސިވިލް ކޯޓުން ކޮށްފައިވާ ހުކުމެއް ވެސް ވަނީ ކިތާބީ ހެއްކެއްގެ ގޮތުގައި ޔާމީންގެ ފަރާތުން ހުށައަޅާފައެވެ.
ރައީސް ޔާމީންގެ ފަރާތްޕުޅުން ދިފާއީ ހެކީންގެ ހެކިބަސް ނަގާނީ ދައުލަތުން ހުށައެޅި ހެކި ނެގުމަށް ފަހުއެވެ.
ރައީސް ޔާމީންގެ އެކައުންޓަށް އެމްއެމްޕީއާރުސީގެ ޚިޔާނާތުގެ ފައިސާ ދައުރުކުރި އެސްއޯއެފް އެކައުންޓުން ދެފަހަރެއްގެ މަތިން އެއްމިލިއަން ޑޮލަރު ޖަމާކޮށްފައި ވެއެވެ. އެކަމުގައި މަނީ ލޯންޑަރިންގެ ދައުވާ އެމަނިކުފާނުގެ މައްޗަށް ދައުލަތުން ކުރާއިރު އެފައިސާ އޭސީސީއާއެކު ހެދި އެސްކްރޯ އެކައުންޓެއްގައި ބަހައްޓަން އެއްބަސްވުން ހަދާފައިވަނީ މިދިޔަ އަހަރުގެ މާޗް މަހުގެ ތެރޭގައެވެ. ނަމަވެސް އެސްކްރޯ އެކައުންޓަށް ޖަމާކޮށްފައިވަނީ އެހެން ފައިސާތަކެއްކަމާއި އެސްއޯއެފުން ޖަމާކުރި ފައިސާ އިސްލާމިކް ބޭންކުގެ ޖެނެރަލް އިންވެސްޓްމެންޓް އެކައުންޓަކަށް ބަދަލުކޮށް އެފައިސާގެ އަސްލު އޮޅުވާލާފައިވާ ކަމަށް ދައުލަތުން ކުރާ ދައުވާގައި ބުނެފައިވެއެވެ. ދައުލަތުން ބުނެފައިވަނީ ޖެނެރަލް އިންވެސްޓްމެންޓް އެކައުންޓުން ރައީސް ޔާމީން 36 މަސް ދުވަހަށް އިންވެސްޓުކޮށް ފައިދާ ހޯއްދަވާފައިވާ ކަން ހާމަވާ ކަމަށެވެ.
