ތިމަރަފުށީގައި މާރާމާރި ހިންގާ ޒުވާނުންތަކަކަށް އަނިޔާ ވެއްޖެ
16 އޯގަސްޓު 2019 | ހުކުރު 17:47މާރާމާރި ހިންގާފާ ވަނީ ހުކުރު ދުވަހުގެ ރޭ
ތ. ތިމަރަފުށީގައި ހިންގި މާރާމާރިއާ ގުޅިގެން ފުލުހުން ވަނީ ހަތަރު މީހެއް ހައްޔަރު ކޮށްފައި
ތ. އަތޮޅު ތިމަރަފުށީގައި ހުކުރު ދުވަހުގެ ރޭ މާރާމާރިއެއް ހިންގާ ޒުވާނުންތަކަކަށް އަނިޔާވެއްޖެއެވެ.
ރާއްޖެއެމްވީއަށް މައުލޫމާތު ދެމުން އެ ރަށު ރައްޔިތަކު ބުނީ މާރާމާރިއެއްގައި ތޫނު އެއްޗަކުން ހަމަލާދިނުމުގެ ސަބަބުން ދެ ޒުވާނަކަށް އަނިޔާވެފައިވާ ކަމަށާއި މާރާމާރި ހިންގާފައި ވަނީ އެެ ރަށުގެ ދެ ގްރޫޕަކުން ކަމަށެވެ. އަދި މާރާމާރީގައި އަނިޔާވި ދެ މީހުންނަށް އެ ރަށު ސިއްހީ މަރުކަޒުގައި މިހާރު ފަރުވާދެމުން އަންނަ ކަމަށް ވެސް އޭނާ ބުންޏެވެ.
އޭނާ އިތުރަށް ބުނީ އެ ދެ ގްރޫޕްގެ ދެމެދުގައި މައްސަލަ ޖެހިގެން އުޅޭތާ ދެތިން އަހަރު ވެއްޖެ ކަމަށާއި މީގެ ދެ ތިން ރޭ ކުރިން ވެސް ހަމަނުޖެހުމެއް އެ ދެ ގްރޫޕުން ހިންގާފައިވާ ކަމަށެވެ.
މި މައްސަލަ ފުލުހުންނަށް ރިޕޯޓް ކޮށްފައިވަނީ ހުކުރު ދުވަހުގެ ރޭ 09:11 ގައެވެ. މާރާމާރިއާ ގުޅިގެން ހަތަރު މީހުން ފުލުހުން ހައްޔަރު ކޮށްފައިވާއިރު ޒަހަމް ވި ދެ މީހުންގެ ހާލުވެސް ރަނގަޅުކަމަށް ފުލުހުން ބުންޏެވެ. ފުލުހުންގެ ބެލުމުގެ ދަށަށް ގެންގޮސްފައިވަނީ އުމުރުން 20 އަހަރުގެ ދެ މީހުންނާއި 21 އަހަރުގެ މީހަކާއި 23 އަހަރުގެ މީހެކެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
