އީދު ފާހަގަކުރުމަށްޓަކައި ހިންނަވަރަށް 3000 އަށްވުރެ މީހުން ގޮސްފައިވޭ
މިއީ މިހާ ކުލަ ގަދަ ގޮތެއްގައި ހިންނަވަރުގައި އީދު ފާހަގަކުރާ ފުރަތަމަ ފަހަރު
ހިންނަވަރުގައި އީދު ފާހަގަކުރުމުގެ ތެރެއިން
އަޟްހާ އީދު ފާހަގަކުރުމަށްޓަކައި ޅ. ހިންނަވަރަށް 3000 އަށްވުރެ ގިނަ މީހުން ގޮސްފައިވާ ކަމަށް އެ ރަށު ކައުންސިލުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން އެ ރަށު ކައުންސިލްގެ ރައީސް ޢަބްދުﷲ އިބްރާހީމް ވިދާޅުވީ އެ ރަށަށް ވަރަށް ގިނަ މީހުން ޒިޔާރަތްކޮށްފައިވާ ކަމަށެވެ. އެގޮތުން ލޯންޗު މެދުވެރިކޮށް ޒިޔާރަތް ކުރި މީހުންގެ އަދަދަށް ބަލާއިރު 2500 އަށްވުރެ މަތިވާނެ ކަމަށެވެ.
ޢަބްދުﷲ އިބްރާހީމް އިތުރަށް ވިދާޅުވި އެ ރަށުގައި އީދު ފާހަގަކުރުމަށް ސަރުކާރުން ހަމަޖެއްސުމުން އެކަމާ އުފާ ކުރައްވާ ކަމަށާއި އެކަމަށްޓަކައި ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހުއަށް ޝުކުރު ދަންނަވާ ކަމަށެވެ.
އީދު ފާހަގަކުރާ ރަށަކަށް ހިންނަވަރު ހަމަޖެއްސީ މިނިސްޓްރީއާ ގުޅިގެން އީދުފާހަގަކުރަން ބޭނުންވާ ރަށްތަކުން ޕްރޮޕޯސަލް ހުށައެޅުމަށް އެދި ކައުންސިލްތަކަށް ފޮނުވި ސަރކިއުލައާ ގުޅިގެން ޕްރޮޕޯސަލް ހުށައެޅި 6 ރަށުގެ ތެރެއިން އެންމެ ރަނގަޅު ޕްރޮޕޯސަލްއެއް ހުށައެޅި ރަށަކީ ހިންނަވަރު ކަމަށްވާތީ ކަމަށް ހޯމް މިނިސްޓްރީން ބުނެއެވެ.
މިއީ މިހާ ކުލަ ގަދަ ގޮތެއްގައި ހިންނަވަރުގައި އީދު ފާހަގަކުރާ ފުރަތަމަ ފަހަރެވެ.
