ނޯރވޭގެ މިސްކިތަކަށް ހަމަލާދިން މީހަކަށް ޓެރެރިޒަމް ގެ ތުހުމަތު
12 އޯގަސްޓު 2019 | ހޯމަ 04:05ހަމަލާދިން ވަގުތު މިސްކިތުގައި ތިބީ ތިން މީހުން
ނޯރވޭގައި ހަމަލާދިން މިސްކިތް
ނޯރވޭގެ މިސްކިތަކަށް ދިން ބަޑީގެ ހަމަލާއަކީ ޓެރަރިޒަމްގެ އަމަލެއް ކަމަށް ޝައްކުކުރެވޭތީ، ޓެރަރިޒަމްގެ އަމަލެއްގެ ގޮތުގައި އެމައްސަލަ ތަހުގީގުކުރަން ފަށައިފިއެވެ.
އާދިއްތަ ދުވަހު އެ ގައުމުގެ އަލް-ނޫރް އިސްލާމިކް ސެންޓަރަށް ގޮސް 20 އަހަރުގެ ފިރިހެނަކު ވަނީ ބަޑި ޖަހާ މިސްކިތުގައި ތިބި މީހުންނަށް ހަމަލާދީފައެވެ.
އޭނާ މިސްކިތައް ވަދެ ހަމަލާދިން ވަގުތު މިސްކިތުގައި ތިބީ ތިން މީހުންނެވެ. އޭގެ ތެރެއިން އެކަކަށް ވަނީ އޭނާ ހުއްޓުވަން އުޅުމުގެ ތެރޭގައި އަނިޔާވެފައެވެ. އަނިޔާވެފައިވަނީ އުމުރުން 65 އަހަރުގެ ފިރިހެނަކަށެވެ.
ނޯރވޭގެ ފުލުހުން ވަނީ އޭނާ ހައްޔަރުކޮށްފައެވެ. އަދި ޖެހިގެން އައި ދުވަހު އޭނާގެ 17 އަހަރުގެ ކޮއްކޮ މަރާލާފައި އޮއްވާ ފެނުމުން ނޯރވޭގެ ފުލުހުން މިހާރު ވަނީ އޭނާގެ މައްޗަށް މީހަކު މަރާލި ކަމުގެ ތުހުމަތުވެސް ކޮށްފައެވެ.
މި މައްސަލަތައް ނޯރވޭގެ ފުލުހުން ދަނީ އިތުރަށް ތަހުގީގު ކުރަމުންނެވެ.
