މެންޗެސްޓަރ އެރީނާގައި ބޮން ގޮއްވާލި ސަލްމާން އަބީދީގެ އެ ދުވަހުގެ ފޮޓޯއެއް ފުލުހުން އާއްމުކޮށްފިއެވެ.

ފުލުހުންވަނީ މެއި މަހުގެ 18 ވަނަ ދުވަހާއި 22 ވަނަ ދުވަހާ ދެމެދު އޭނާ ނޫކުލައިގެ ސޫޓް ކޭހެއް ހިފައިފައިގެން އުޅެނިކޮށް ފެނިފައިވާ ފަރާތެއްވާނަމަ އެ މައުލޫމާތު ފޯރުކޮށްދިނުމަށް އެދިފައެވެ.

ބީބީސީއިންވެސް ވަނީ ބޮންގޮއްވި ދުވަހުގެ ކުރީ ދުވަހު އޭނާ ފިހާރައެއްގެ ތެރޭހުއްޓައި ފެންނަ ސީސީޓީވީ ފުޓޭޖެއް ލިބިފައިވާކަމަށް ބުނެފައެވެ.

މެއި މަހުގެ 22 ވަނަ ދުވަހު ދިން ހަމަލާގައި 22 މީހުން މަރުވިއެވެ.

ފުލުހުން ދަނީ ގްރޭޓަރ މެންޗެސްޓަރގެ ސިޓީގެބޭރުން އޮންނަ ބަރީގެ ގޮނޑެއް ބަލާ ފާސްކުރަމުންނެވެ.

ފުލުހުން ބުނީ އުމުރުން 22 އަހަރުގެ ސަލްމާން އަބީދީ މެންޗެސްޓަރގެ ވިލްމްސްލޯ ރޯޑް އޭރިއާއަށް އަދި ސިޓީސެންޓަރަށް ސޫޓްކޭސް ހިފައިގެން ގޮސްފައިވާކަމަށެވެ.

ނޯތްވެސްޓް ކައުންޓަރ ޓެރެރިޒަމްގެ ފުލުހުން ބުނީ އެ ސޫޓް ކޭހަކީ ހަމަލާގައި ބޭނުންކޮށްފައިވާ ސޫޓްކޭސްއާ ތަފާތު ސޫޓްކޭސްއެއްކަމަށެވެ.

"އެ ކޭސްއާ އޭގައި ނުރައްކާތެރި އެއްޗެއް ހުންނާނެ ކަމަށް ގަބޫލުކުރަންވީ ސަބަބެއްނެތް، ނަމަވެސް ރައްކާތެރިވުމަށް ޢާއްމުންނަށް ގޮވާލަން" އޭނާ ވިދާޅުވިއެވެ.

މީގެ އިތުރުންވެސް އެ ސޫޓްކޭސް ފެނިއްޖެ ނަމަ އަމިއްލައަށް އެ ނެގުމުގެ ބަދަލުގައި ފުލުހުންނަށް ގުޅުމަށްވަނީ އިލްތިމާސްކޮށްފައެވެ.