ހުޅުމާލޭ ފިޔަވަތިން ފިލި 7 ކުއްޖަކު ފުލުހުންގެ އެހީއާއެކު ހޯދައިފި
10 އޯގަސްޓު 2019 | ހޮނިހިރު 11:35ހާދިސާ ހިނގާފައިވަނީ ހޮނިހިރު ދުވަހުގެ ވަގުތެއްގައި
ހުޅުމާލެ
މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސާރވިސަސްއިން ހުޅުމާލޭގައި ހިންގާ ކުޑަކުދިންގެ މަރުކަޒުކަމުގައިވާ ފިޔަވަތިން ފިލި 7 ކުއްޖަކު ހޯދުމަށްފަހު އަނބުރާ މަރުކަޒަށް ގެނެސްފިއެވެ.
އެކަމާ ގުޅޭގޮތުން މިނިސްޓްރީގެ މީޑިއާ އޮފިޝަލު ވިދާޅުވީ، މި ހާދިސާ ހިނގާފައިވަނީ ހޮނިހިރު ދުވަހުގެ ވަގުތެއްގައި ކަމަށާއި، ހުޅުމާލޭ ފުލުހުންގެ އެހީތެރިކަމާއެކު، އެކުދިން އަނބުރާ މަރުކަޒަށް ގެނެސްފައިވާ ކަމަށެވެ.
އޭގެ އިތުރުން އެފަދަ ހާދިސާތައް ހުއްޓުވުމަށާއި، ތަކުރާރު ވިޔަ ނުދިނުމަށް މިނިސްޓްރީން ގިނަ ފިޔަވަޅުތަކެއް އަޅަމުންދާ ކަމަށާއި، އަދި އެކަމަށްޓަކައި ކަމާބެހޭ މުއައްސަސާތަކާ ގުޅިގެން މަސައްކަތްތަކެއް ކުރެވެމުންދާ ކަމަށްވެސް މިނިސްޓްރީން ބުނެފައިވެއެވެ.
އެކަމާ ގުޅޭގޮތުން ފުލުހުން ބުނީ، އެ ކުދިން ފިލިކަމުގެ ރިޕޯޓް ހެނދުނު ހަތެއް ޖަހާކަންހާ އިރު ފުލުހުންނަށް ލިބުނު ކަމަށާއި، ފުލުހުންނަށް އެކުދިން ފެނިފައިވަނީ ޓްރީ ޓޮޕް ހޮސްޕިޓަލް ކައިރި ހުރި ފެންސަކަށް އަރައި ތިއްބާ ކަމަށެވެ. އަދި އެއިން އެއްވެސް ކުއްޖަކަށް އަނިޔާއެއް ވެފައިނުވާ ކަމަށްވެސް ފުލުހުން ބުނެފައިވެއެވެ. އެކަމާގުޅޭ އިތުރު ތަފްސީލް ފުލުހުން ހާމަކޮށްފައެއް ނުވެއެވެ.
މީގެ ކުރިން ވެސް ޖެންޑަރ މިނިސްޓްރީގެ ބެލުމުގެ ދަށުގައި ހުންނަ ކުޑަކުދިންގެ މަރުކަޒުތަކުން ކުދިން ފިލުމުގެ މައްސަލަތައް ފެންމަތިވެފައިވެއެވެ. ނަމަވެސް މިއީ ހުޅުމާލޭގައި ހުންނަ ފިޔަވަތިން ކުދިންތަކެއް ފިލައިގެން އެމައްސަލަ ފެންމަތިވީ ފުރަތަމަ ފަހަރެވެ.
