ރައީސް ސޯލިހު އީދު ޗުއްޓީއަށް ލަންކާއަށް، ފުރާވަޑައިގަންނަވަނީ މި ހަފްތާގެ ފަހުކޮޅު
މި ދަތުރުފުޅުގައި އަނބިކަނބަލުން ފަޒްނާ އަހުމަދުވެސް ބައިވެރިވެލައްވާނެ
ރައީސް އިބްރާހިމް މުހައްމަދު ސޯލިހު އާއި އަނބިކަނބަލުން ފަޒްނާ އަހުމަދު
ރައީސުލް ޖޫމްހޫރިއްޔާ އިބްރާހިމް މުހައްމަދު ސޯލިހު އީދު ބަންދުގައި އަވައްޓެރި ސްރީލަންކާއަށް ވަޑައިގަތުމަށް ހަމަޖެހިފައިވާ ކަމަށް ރައީސް އޮފީހުން ބުނެފިއެވެ.
ރާއްޖެ އެމްވީއަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު އިބްރާހިމް ހޫދު ވިދާޅުވީ ރައީސް ސޯލިހު އީދު ޗުއްޓީ ހޭދަކޮށްލަންވަން ވަޑައިގަންނަވަނީ ލަންކާއަށް ކަމަށެވެ. އަދި އެމަނިކުފާނު މި ހަފްތާގެ ފަހުކޮޅު ފުރާވަޑައިގަންނަވާނެ ކަމަށް ވެސް ވިދާޅުވިއެވެ. ރައީސްގެ މި ދަތުރުފުޅުގައި އަނބިކަނބަލުން ފަޒްނާ އަހުމަދުވެސް ބައިވެރިވެވަޑައިގަންނަވާނެއެވެ.
ރައީސް ސޯލިހު ވަނީ މިއަހަރުގެ ފެބްރުއަރީ މަހު ރަސްމީ ދަތުރުފުޅެއްގައި ލަންކާއަށް ޒިޔާރަތް ކުރައްވާފައެވެ. އެ ދަތުރުފުޅަކީ ސްރީލަންކާގެ ރައީސް މައިތުރިޕާލަ ސިރިސޭނަގެ ދަޢުވަތަކަށް ކުރެއްވި ދަތުރުފުޅެކެވެ. މި ދަތުރުފުޅުގައި އެމަނިކުފާނު ވަނީ ސްރީލަންކާގެ 71 ވަނަ މިނިވަން ދުވަސް ފާހަގަކުރުމަށް ބޭއްވި ރަސްމިއްޔާތް ވެސް ޝަރަފުވެރި ކޮށްދެއްވާފައެެވެ.
އެމަނިކުފާނުގެ މިދަތުރުފުޅުގައި ރައީސްގެ ދެކަނބަލުން ވަނީ ސްރީލަންކާގައި ދިރިއުޅުއްވާ ދިވެހިރައްޔިތުންނާއި ވެސް ބައްދަލުކުރައްވާފައެވެ.
އެމަނިކުފާނު ލަންކާއަށް ފުރާވަޑައިގަތުމުގެ ކުރިން ލަންކާއާއި ރާއްޖެއާ ދެމެދު ކުޅުމަށް ހަމަޖެހިފައވާ ވޮލީބޯޅަ މެޗް އޮގަސްޓު 13 ވަނަ ދުވަހު ބައްލަވާލައްވާނެއެވެ.
