ބިޝާމް މަގާމުން ވަކިކުރުމަށް އެމްޑީޕީގެ ޕީޖީ ގްރޫޕަށް ހުށައަޅައިިފި
9 އޯގަސްޓު 2019 | ހުކުރު 14:31ހުށައެޅުއްވީ ފޮނަދޫ ދާއިރާގެ މެމްބަރު މޫސާ ސިރާޖު
ޕީޖީ ބިޝާމް ރައްޔިތުންގެ މަޖިލީހުގެ ޖުޑިޝަރީ ކޮމިޓީގައި
ޕްރޮސެކިއުޓާ ޖެނަރަލް (ޕީޖީ) އައިޝަތު ބިޝާމް މަގާމުން ވަކިކުރަން މޯލްޑިވިއަން ޑިމްކޮރެޓިކް ޕާޓީ (އެމްޑީޕީ) ގެ ޕާލިމެންޓްރީ ގްރޫޕަށް ހުށައަޅައިފި އެވެ.
އޭނާ މަގާމުން ވަކިކުރައްވަން ފެންނަ ކަމަށް ހުށައެޅުއްވީ އެމްޑީޕީގެ ފޮނަދޫ ދާއިރާގެ މެމްބަރު އަދި ގާނޫނީ ވަކީލު މޫސާ ސިރާޖް އެވެ.
ޖުޑިޝަރީ ކޮމިޓީގައި ހިމެނި ވަޑައިގަންނަވާ ސިރާޖް ރާއްޖެ.އެމްވީ އަށް ވިދާޅުވީ، ބިޝާމް ޖުޑިޝަރީ ކޮމީޓި އަށް ހާޒިރުކުރި ކުރިމުގައި އޭނާ ގާނޫނާ ހިލާފަށް ކަންތައްތަކެއް ކޮށްފައިވާ ކަމަށް ގަބޫލުކުރެވޭތީ، މީގެ ތިން ހަފްތާ ކުރިން އެ މައްސަލަ ޕާލިމެންޓްރީ ގްރޫޕަށް ހުށައަޅާފައިވާ ކަމަށެވެ. އެކަމާއި ގުޅިގެން ޕީޖީ ބައްދަލުވުމެއް މިހާތަނަށް ބާއްވާފައެއްނުވެ އެވެ.
ބިޝާމް ހާޒިރުކުރި ކުރުމުގައި ކުރީ ސަރުކާރުން ނޫފުޒަކުން އެއްވެސް ކަމެއް ނިންމާފައިވާނެތޯ މެެމްބަރުން ސުވާލު ކުރެއްވި އެވެެ. ރައީސް އޮފީހުގެ ތެރެއިން ނުފޫޒު ފޯރުވައިގެން ނުވަތަ ކުރީގެ ރައީސް އަބްދުﷲ ޔާމީން އަންގަވައިގެން ވަކި ގޮތަކަށް އެއްވެސް ކަމެއް ކުރައްވާފައިނުވާ ކަމަށް އެ ކޮމިޓީގައި އޭނާ ވިދާޅުވި އެވެ.
ބިޝާމް މަގާމުން ވަކިކުރައްވަން ޖެހޭ ކަމަށް ގަލޮޅު ދެކުނު ދާއިރާގެ އެމްޑީޕީ މެމްބަރު މީކައިލް އަހުމަދު ނަސީމް ވަނީ ވިދާޅުވެފަ އެވެ.
މިކާއިލް ވިދާޅުވީ، ބިޝާމްއަކީ ޕީޖީގެ މަގާމަށް ކުފޫ ހަމަވާ ބޭފުޅެއް ނޫން ކަމަށެވެ. ބިޝާމް އަކީ އިތުބާރު ގެއްލިފައި ހުރި ބޭފުޅެއްކަން ފާހަގަކުރައްވަމުން މީކައިލް ވިދާޅުވީ، ކުރީގެ ރައީސް މުހައްމަދު ނަޝީދުގެ އިތުރުން ސިޔާސީ ބައެއް ފަރާތްތަކަށް ރައީސް އޮފީހުން އެންގި ގޮތަކަށް އޭނާ ދައުވާތައް އުުފުލި ކަމަށެވެ.
ޕީޖީގެ މަގާމުން ބިޝާމް ވަކިކުރަން ޖެހޭ ކަމަށް އާއްމުންގެ ބައެއް ފަރާތްތަކުން ދަނީ ޝޯޝަލް މީޑިއާގައި ގޮވާލަމުންނެވެ. ރާއްޖޭގެ ފުރަތަމަ އަންހެން ޕީޖީގެ މަގާމަށް ބިޝާމް އައްޔަން ކުރައްވާފައިވަނީ 2015 ވަނަ އަހަރު އެވެ. އެ މަގާމާ ހަވާލުވުމުގެ ކުރިން އޭނާ ވަނީ ރައީސް އޮފީހުގެ ލީގަލް އެފެއާޒް ސެކްރެޓަރީގެ މަޤާމާއި ސްޕެޝަލް އެޑްވައިޒަރ ޓު ދަ ޕްރެޒިޑެންޓްގެ މަގާމު އަދާކުރައްވާފަ އެވެ.
