ހައިލަމްގެ މައްސަލައެއް ބަލަމުންދާ ކަމުގެ ސިޓީ މިއަދު އޭނާއަށް ފޮނުވާނަން: ޖޭއެސްސީ
ހައިލަމްގެ މައްސަލަ ބަލާކަން ހާމަ ކުރީ މިދިޔަ ބުދަ ދުވަހު
ކްރިމިނަލް ކޯޓުގެ އިސްގާޒީ އަހުމަދު ހައިލަމް އަދި ސަސްޕެންޑް ކޮށްފައިވާ ސުޕްރީމް ކޯޓުގެ ފަނޑިޔާރު އަބްދުﷲ ޑީޑީ. އެދެ ފަނޑިޔާރުންގެ މައްސަލަވެސް ޖޭއެސްސީއިން ދަނީ ބަލަމުން
ކްރިމިނަލް ކޯޓުގެ އިސް ގާޒީ އަހުމަދު ހައިލަމްގެ މައްސަލަ ޖުޑީޝަލް ސަރވިސް ކޮމިޝަން (ޖޭއެސްސީ) އިން ބަލަމުންދާކަމުގެ ސިޓީ ހޯމަ ދުވަހު ފޮނުވާނެ ކަމަށް އެ ކޮމިޝަނުން ބުނެފިއެވެ.
ޖޭއެސްސީ އިން ވަނީ އިސް ގާޒީ ހައިލަމް އާއި އެ ކޮމިޝަނުން މިހާރު ވެސް ބަލަމުން ގެންދާ ސުޕްރީމް ކޯޓުގެ ފަނޑިޔާރު އަބްދުﷲ ދީދީގެ އިތުރު މައްސަލައެއް ބަލަމުންދާކަން މިދިޔަ ބުދަ ދުވަހު ހާމަ ކޮށްފައެވެ.
އެކޮމިޝަންގެ ޑިރެކްޓަރ ހަސަން ޒަހީން ރާއްޖެއެމްވީއަށް ވިދާޅުވީ ޖޭއެސްސީއަށް ހުށައެޅިފައިވާ މައްސަލަ އެކޮމިޝަނުން ބަލަން ނިންމައި މައްސަލަ ބަލަމުންދާކަމުގެ ލިޔުން އިސް ގާޒީ ހައިލަމްއަށް ހޯމަ ދުވަހު އަންގަވާނެ ކަމަށެވެ. ނަމަވެސް އަބްދުﷲ ދީދީގެ އާ މައްސަލައެއް ބަލަމުންދާނެކަން އޭނާއަށް ސިޓީއަކުން އަންގާނީ އަދި އެމައްސަލައިގައި ފުރިހަމަ ކުރަންޖެހޭ ކަންތައްތަކެއް ހުރުމުން އެކަން ފުރިހަމަ ކުރުމަށްފަހު ކަމަށް ޒަހީން ވިދާޅުވި އެވެ.
އިސް ގާޒީ ހައިލަމްގެ މައްސަލައެއް ޖޭއެސްސީއިން ބަލާކަން އެނގިވަޑައިގެންފައިނުވާކަން އޭނާ ހާމަކުރެއްވީ އާދީއްތަ ދުވަހު އޮތް ކުރީގެ ރައީސް އަބްދުﷲ ޔާމީންގެ ޝަރީއަތުގައި އެމަނިކުފާނުގެ ވަކީލަކު ހުށައެޅުއްވި ކަމަކަށް ޖަވާބު ދެއްވަމުންނެވެ.
އެމަނިކުފާނުގެ ވަކީލަކު ވަނީ ޖޭއެސްސީއިން ގާޒީ ހައިލަމްގެ މައްސަލައެއް ބައްލަވާ ކަމަށް ބުނެފައިވާ މައްސަލައިގައި ނުކުމެދާނެ ކަންތައްތަކެއް އެބަހުރި ކަމަށާއި އިސް ގާޒީގެ މައްސަލައެއް ބަލަމުންދާ ކަމަށް ޖޭއެސްސީއިން ނޫސްބަޔާން ނެރެފައި އޮތްކަމަށް ވިދާޅުވެފައެވެ. ޖޭއެސްސީއަކީ ގާޒީ ހައިލަމް ސަސްޕެންޑް ކުރުމުގެ ބާރު އޮތްތަނަކަށްވުމުން އެކަމުގައި ސިޔާސީ ނުފޫޒު އެމައްސަލައަށް ވަދެދާނެކަމަށް ގަބޫލު ކުރެއްވޭކަމަށް އެ ޝަރީއަތުގައި ވިދާޅުވިއެވެ.
ޖަވާބުގައި އިސް ގާޒީ ހައިލަމް ވިދާޅުވީ އޭނާގެ މައްސަލައެއް ބަލަމުން ދާކަން ޖޭއެސްސީއިން އަންގާފައި ނުވާ ކަމަށެވެ. އަދި ޖޭއެސްސީއިން އޭނާގެ މައްސަލަ ބެލިކަމުގައިވިއަސް އެއީ އެ މައްސަލައަށް އަސަރު ފޯރާނެކަމެއް ކަމަށް ގަބޫލު ނުކުރެއްވޭކަމަށާއި އެފަދަ ނުފޫޒެއް އޮތްކަމަކަށް ގަބޫލު ނުކުރެއްވޭ ކަމަށެވެ.
ރައީސް ޔާމީންގެ މައްޗަށް އުފުލާފައިވާ މަނީ ލޯންޑަރިންގެ މައްސަލަ ބައްލަވަނީ އިސް ގާޒީ ހައިލަމްއެވެ.
ހައިލަމްގެ މައްސަލައެއް ބަލަން ނިންމާފައިވާކަން ޖޭއެސްސީއިން ހާމަ ކޮށްފައިވާއިރު ކްރިމިނަލް ކޯޓުގައި ނުނިމި ހުރި މައްސަލަތަކާ ދިގުލައިގެންދާ ކަމުގެ ޝަކުވާއާއި ގުޅިގެން ޖޭއެސްސީއިން އެކުލަވައިލި ރިޕޯޓާއި ގުޅިގެން އޭނާއަށް ވަނީ ފާޑުކިޔުންތައް އަމާޒު ވެފައެވެ.އެގޮތުން ކޯޓުގެ އިސްގާޒީ މައްސަލަތައް މޮނިޓަރ ނުކުރުމާއި އިސްގާޒީ މައްސަލަތައް އަވަސް ކުރުމަށް މަސައްކަތް ކޮށްފައި ނުވާކަން ވަނީ ފާހަގަކޮށްފައެވެ.
ކްރިމިނަލް ކޯޓުގެ އިސް ގާޒީ އަކީ ހައިލަމް އެވެ.
