ފެންބޮޑުވުމުގެ ހާދިސާތަކުގެ އަސަރު ބަންގްލަދޭޝްގެ އެތައް މިލިއަން މީހުންނަށް ކޮށްފި

ބަންގްލަދޭޝްގައި ފެންބޮޑުވެ ބިންގަނޑުކަނޑައިގެން ދިޔުމުގެ ހާދިސާތަކުގައި އެތައްހާސް މީހުންގެ ގެދޮރުތައް ގެއްލިފައިވާކަމަށް ބަންގްލަދޭޝްގެ ރެޑް ކްރެސަންޓް ސޮސައިޓީއިން ބުނެފިއެވެ.

މި ހާދިސާތަކުގެ އަސަރު ބަންގްލަދޭޝްގެ 28 ސަރަހައްދެއްގެ 7 މިލިއަން މީހުންނަށް ކޮށްފައިވާއިރު، 163000 ހެކްޓަރުގެ ދަނޑުބިންތަކައް ވަނީ ހަލާކުވެފައެވެ.

ފެންބޮޑުވުމުގެ ހާދިސާތަކުގައި ބަންގްލަދޭޝްގައި ދިރިއުޅޭ ގިނަ މީހުންނަށް ވަރަށް ގިނަ ދަތިތަކާއު ކުރިމަތިލާންޖެހިފައެވެ. އެގޮތުން ގިނަ ސަރަހައްދުތަކުގައި އަދިވެސް ފެންބޮޑުވެފައިވާތީ، އެ ސަރަހައްދުތަކުގައި ދިރިއުޅޭމީހުންނަށް އަދިވެސް ކާނާ ހޯދުމުގައި ދަތިތަކާކުރިމަތިލާންޖެހިފައި ވެއެވެ. ރެޑް ކްރެސަންޓްގެ އެހީތެރިކަންވެސް ލިބިފައިވަނީ މަދު ބަޔަކަށެވެ.

ފެންބޮޑުވުމުގެ ހާދިސާތަކުގައި ސުކޫލްތައް ހަލާކުވުމާއި ގުޅިގެންނާއި ހާދިސާގައި ގެއްލުންވި ފަރާތްތަކަށް އެހީތެރިކަމާއި ބޯހިޔާވަހިކަން ފޯރުކޮށްދިނުމުގައި ބޭނުން ކުރެވެމުންދާތީ 40000 އަށް ވުރެ ގިނަ ކުޑަކުދިން ވަނީ ކިޔެވުމުން މަހުރޫމްވެފައެވެ.

ބަންގްލަދޭޝްގެ ގިނަ ރައްޔިތުންއުޅެނީ ދަނޑުވެރިކަމުން ލިބޭ އާމްދަނީ އިންނެވެ. އަދި މި ހާދިސާތަކުގައި ބޮޑަށް ގެއްލުންވެފައިވަނީވެސް ދަނޑުވެރިކަން ކުރާ ސަރަހައްދުތަކަށެވެ. ބަންގްލަދޭޝް އަކީވެސް ތިމާވެއްޓަށް އަންނަ ބަދަލުތަކުގެ ނޭދެވޭ އަސަރު ހަލުވި މިނުގައި ކުރަމުން އަންނަ ގައުމެއްކަމުގައި ތިމާވެއްޓާއި ބެހޭ މާހިރުންވިދާޅުވިއެވެ.

މިއީ ބަންގްލަދޭޝްއަށް ވޭތުވެދިޔަ ދެއަރުތެރޭގައި އެންމެ ބޮޑުގެއްލުންވި އެއް ހާދިސާ ކަމުގައި ވެސް ބަންގްލަދޭޝްގެ ރެޑް ކްރެސަންޓް ސޮސައިޓީއިން ބުނެއެވެ.