ނައިބު ރައީސް ފައިސަލް ނަސީމް ތިލަދުންމަތީ ދެކުނުބުރީގެ ބައެއް ރަށްތަކަށް ޒިޔާރަތް ކުރެއްވުމަށް ބުރާސްފަތި ދުވަހު ފެއްޓެވި ދަތުރުފުޅުގައި ހދ. ހަނިމާދޫއަށް ވަޑައިގެންފިއެވެ.

ފައިސަލް އެރަށަށް ފައިބާ ވަޑައިގަތުމާއެކު އެރަށުގެ ރައްޔިތުންގެ ވަނީ އެމަނިކުފާނަށް ހޫނު މަރުހަބާއެއް ދަންނަވާފައެވެ.

ރައީސް އޮފީހުން ބުނީ އެމަނިކުފާނު ހަނިމާދޫ ސްކޫލަށް ޒިޔާރަތްކުރައްވައި، އެސްކޫލްގެ މުވައްޒަފުންނާ ބައްދަލުކުރައްވައި އެތަނުގެ މަސައްކަތްތައް ކުރިއަށްދާގޮތް އޮޅުންފިލުއްވައި، ތަނުގެ މިހާރުގެ ހާލަތު ބައްލަވައިލެއްވި ކަމަށެވެ.

މި ޒިޔާރަތުގައި ސްކޫލުގެ މެނޭޖްމަންޓުން ގިނަ ކަންބޮޑުވުންތަކެއް ފައިސަލް އާ ހިއްސާ ކުރިއެވެ. އޭގެ ތެރޭގައި ސްކޫލުގެ އިމާރާތް ބާވެ ފާރުތައް ކަނޑައިގެންގޮސް ސީލިންގުން ފެންލީކުވުން ފަދަ މައްސަލަތައް ހިމެނެއެވެ.

މީގެ އިތުރުން، ވިއްސާރަ ދުވަސްވަރު ސްކޫލް ތެރޭގައި ފެންބޮޑުވެ ސްކޫލްގެ ކިޔެވުން ބަންދުކުރަން ޖެހޭކަމަށް ބުނެ މެނޭޖްމަންޓުން ކަންބޮޑުވުން ފާޅުކޮށްފައެވެ.

މި ބައްދަލުވުމުގައި ފައިސަލް ވިދާޅުވީ ސްކޫލަށް ބޭނުންވާ އެންމެ މުހިންމު ކަންތައްތައް ސަރުކާރުން ވީހާވެސް އަވަހަކަށް ކޮށްދެއްވާނެ ކަމަށެވެ.

އެމަނިކުފާނުގެ މި ޒިޔާރަތުގައި ދެން ވަޑައިގަތުމަށް ހަމަޖެހިފައިވަނީ ހދ. ކުޅުދުއްފުށްޓަށެވެ.