އިންޑިއަން އޯޝަން އައިލެންޑް ގޭމްސް 2023 ވަނަ އަހަރު ރާއްޖޭގައި ބާއްވަނީ
ރާއްޖެއަށް ލިބިފައިވަނީ ހަތަރު ވޯޓް
އިންޑިއަން އޯޝަން އައިލެންޑް ގޭމްސް - 2019
އިންޑިއަން އޯޝަން އައިލެންޑް ގޭމްސް 2023 ވަނަ އަހަރު ރާއްޖޭގައި ބާއްވަން ނިންމައިފިއެވެ.
އައިއޯއައިޖީގެ ކައުންސިލުން ނެގި ވޯޓުގައި ރާއްޖެ 4 ވޯޓުން ބިޑް ކާމިޔާބުކޮށްފައިވާއިރު ކޮމޯރަސް އަދި މަޑަގަސްކަރައަށް ލިބިފައިވަނީ އެއް ވޯޓެވެ.
އިންޑިއަން އޯޝަން އައިލޭންޑް ގޭމްސް 2023 ވަނަ އަހަރު ރާއްޖޭގައި ބޭއްވުމަށް، ހުށަހަޅަންޖެހޭ ބިޑް ރަސްމީކޮށް ކުޅިވަރާއި ބެހޭ ވަޒީރު އަހުމަދް މަހުލޫފް ހުށަހަޅުއްވާފައިވަނީ މި މަހުގެ 20 ވަނަ ދުވަހުއެވެ.
ރާއްޖޭގެ ބިޑް ހުށަހަޅުއްވަމުން މިނިސްޓަރ މަހުލޫފް ވިދާޅުވީ މި މުބާރާތަކީ ދިވެހިންގެ ހިތްތަކާއި ގުޅިފައިވާ މުބާރާތެއް ކަމަށާއި، ދިވެހިރާއްޖެއިން އެންމެ ފުރަތަމަ ވާދަކުރި ބައިނަލްއަގްވާމީ މުބާރާތަކީ އައިއޯއައިޖީ ކަމަށެވެ. މީގެ އިތުރުން މަހުލޫފް ވިދާޅުވީ ދިވެހިން ފުޓުބޯޅައިގައި ޖެހި އެންމެ ފުރަތަމަ ލަނޑު ޖަހައިފައިވަނީ އައިއޯއައިޖީގައި ކަމަށެވެ.
ރާއްޖެއެމްވީއަށް މައުލޫމާތު ދެއްވަމުން މަހްލޫފް ވިދާޅުވީ އިންޑިއަން އޯޝަން އައިލެންޑް ގޭމްސް ރާއްޖޭގައި ބޭއްވިގެން ދިޔުމަކީ ރާއްޖޭގެ ކުޅިވަރުގެ އާއިލާއަށް ލިބުނު ވަރަށް ބޮޑު އުފަލެއް ކަމަށެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވަނީ މި މުބާރާތް 2023 ވަނަ އަހަރު ރާއްޖޭގައި ބޭއްވުމަށް ވަރަށް ބޮޑު އަހައްމިޔަތު ކަމެއް ދެއްވާފައެވެ. އެގޮތުން ރައީސްގެ މަންދޫބުންގެ ގޮތުގައި ޖުލައި މަހުގެ ހަތްވަނަ ދުވަހުން ފެށިގެން ހާރިޖީ ވަޒީރު އަބްދުﷲ ޝާހިދުގެ އިތުރުން ކުޅިވަރާއި ބެހޭ ވަޒީރު އަހްމަދު މަހުލޫފް ވަނީ މުބާރާތުގައި ވާދަކުރާ ގައުމުތަކަށް ގޮސް އެ ގައުމުތަކުގެ އިސްވެރިންނާއި ބައްދަލުކުރައްވާ، އެ ގައުމުތަކުގެ ތާއީދު ހޯދުމަށް މަސައްކަތް ކުރައްވާފައެވެ.
އައިއޯއައިޖީގެ ކައުންސިލުން ދާދި ފަހުން ވަނީ ރާއްޖެއަށް ޒިޔާރަތްކޮށް ދިވެހި ސަރުކާރާއި މޯލްޑިވްސް އޮލިމްޕިކް ކޮމެޓީއާ ބައްދަލުކޮށް ރާއްޖޭގައި ހުރި ކުޅިވަރު ވަސީލަތްތައް ބައްލަވާލައްވާފައެވެ.
