ގައުމީ ޔުނިވަރސިޓީގެ ބިލް، ތަޅުމަށް ފޮނުވާލެވޭނީ އަންނަ ހަފުތާތެރޭގައި: އަހްމަދު އަބްދުﷲ
20 ޖުލައި 2019 | ހޮނިހިރު 07:56ބިލަށް އިސްލާހު ހުށަހަޅުއްވަން ތިން ހަފްތާގެ މުހުލަތެއް ވަނީ މެމްބަރުންނަށް ދެއްވާފައި
އިސްލާމިކް ޔުނިވަރސިޓި އޮފް މޯލްޑިވްސް
ގައުމީ ޔުނިވަރސިޓީގެ ބިލަށް އިސްލާހު ހުށަހަޅަން ބޭނުންފުޅުވާ މެމްބަރުން އިސްލާހު ހުށަހަޅުއްވާ ނިމުމުން، އިސްލާހުތަކަށް ރިއާޔަތް ކުރުމަށްފަހު އަންނަ ހަފުތާ ތެރޭގައި ގައުމީ ޔުނިވަރސިޓީގެ ބިލް ތަޅުމަށް ފޮނުވާލެވޭނެ ކަމަށް ބިލް ދިރާސާ ކުރަމުން އަންނަ ގައުމީ ތަރައްގީ އާއި ތަރިކަ ކޮމިޓީގެ މުގައްރިރު އަހްމަދު އަބްދުﷲ ވިދާޅުވެއްޖެއެވެ.
ގައުމީ ޔުނިވަރސިޓީގެ ބިލް ދިރާސާ ކުރުމަށްފަހު ކޮމިޓީގެ ރިޕޯޓް، 17 ޖުލައިގައި އޮތް މަޖިލިސް ޖަލްސާއަށް ފޮނުވުމުން، މެމްބަރުން ވަނީ ބިލަށް އިތުރު އިސްލާހުތަކެއް ހުށަހަޅުއްވަން އިތުރު ވަގުތު ދެއްވުމަށް އެދިވަޑައިގެންފައެވެ. މެމްބަރުންގެ އެދިވަޑައިގަތުމާއެކު، މަޖިލީހުގެ ރިޔާސަތުން ވަނީ ތިންދުވަހުގެ މުހުލަތެއް އިސްލާހު ހުށަހެޅުއްވުމަށް މެމްބަރުންނަށް ދެއްވާފައެވެ. އިސްލާހު ހުށަހެޅުއްވުމަށް މެމްބަރުންނަށް ލިބިވަޑައިގެންނެވި ތިން ދުވަހުގެ މުއްދަތު ހަމަވާނީ އާދިއްތަ ދުވަހުގައެވެ.
ގައުމީ ތަރައްގީ އާއި ތަރިކަ ކޮމިޓީގެ މުގައްރިރު، ބާރަށު ދާއިރާގެ މެމްބަރު އަހްމަދު އަބްދުﷲ ވިދާޅުވީ މެމްބަރުން ފޮނުއްވާ އިސްލާހުތަކާއި ގުޅިގެން ދިރާސާ ކުރަންޖެހޭ ކަންތައްތަށް ދިރާސާ ކުރެއްވުމަށްފަހު، އަންނަ ހަފްތާތެރޭގައި ކޮމިޓީގެ ރިޕޯޓް މަޖިލީހުގެ ތަޅުމަށް ފޮނުވާލެވޭނެ ކަމަށެވެ.
ގައުމީ ޔުނިވަރސިޓީގެ ބިލަށް އިސްލާހު ގެންނަން ހުށަހަޅާފައިވަނީ، އެޔުނިވަރސިޓީގެ ވައިސް ޗާންސެލަރ އަދި ޑެޕިއުޓީ ވައިސް ޗާންސެލަރގެ މަގާމަށް މީހުން އައްޔަންކުރަނީ ޔުނިވަރސިޓީގެ ކައުންސިލުން ކަމުގައި އޮތް އޮތުން (ދިވެހިރާއްޖޭގެ ގައުމީ ޔުނިވަރސިޓީގެ ގާނޫނު) އަށް ގެނެވުނު ފުރަތަމަ އިސްލާހުގެ ދަށުން ބަދަލުކޮށް އެމަގާމުތަކަށް މީހުން އައްޔަން ކުރާނީ ރައީސުލްޖުމްހޫރިއްޔާ ކަމުގައި ހަމަޖެހިގެންގޮސްފައި ވީނަމަވެސް ކަމާގުޅޭގޮތުން ކައުންސިލަށް އޮތް އިހުތިޔާރުތަކާ ބެހޭ ބައެއް މާއްދާތައް އެގާނޫނުގައި އިސްލާހުކޮށްފައިނުވާތީވެ، އެގާނޫނުގައި ހުރި އެފަދަ ތައާރުޟުވުންތައް ނައްތާލުމަށާއި، އެގާނޫނު ތަންފީޒުކުރުމުގައި މިހާރު ދިމާވެފައިވާ ދަތިތައް ހައްލުކުރުމަށްޓަކައި ގެންނަންޖެހޭ އިސްލާހުތައް އިސްލާހުތައް ގެނައުމަށެވެ.
މީގެ އިތުރުން އިސްލާމިކް ޔުނިވަރސިޓީގެ ގާނޫނު ތަންފީޒުކުރުމުގައި މިހާރު ދިމާވެފައިވާ ދަތިތައް ހައްލުކުރުމާއި، ޔުނިވަރސިޓީގެ ހިންގުމުގެ އިންތިޒާމްތައް (ދިވެހިރާއްޖޭގެ ގައުމީ ޔުނިވަރސިޓީގެ ގާނޫނު)ގެ ދަށުން އުފައްދާފައިވާ ގައުމީ ޔުނިވަރސިޓީގެ ހިންގުމާ ވީ ވަރަކުން އެއްގޮތްކުރުމަށްޓަކައި އެގާނޫނަށް ގެންނަންޖެހޭ އިސްލާހުތައް ގެނައުމަށެވެ.
ގައުމީ ޔުނިވަރސިޓީގެ ބިލަށް އިސްލާހު ގެނައުމުގެ ބިލް ސަރުކާރުގެ ފަރާތުން މަޖިލީހަށް ހުށަހެޅުއްވީ މަޑަވެލި ދާއިރާގެ މެމްބަރު ހުސެއިން ފިރުޝާންއެވެ.
