އީރާނުން ހިފެހެއްޓި އިނގިރޭސިވިލާތުގެ ދިދަ ޖަހާފައިވާ ތެޔޮބޯޓް ދޫކޮށް ނުލައިފިނަމަ "ސީރިއަސް ކަންތައްތަކަކާ ކުރިމަތިލާން ޖެހޭނެ" ކަމަށް އިނގިރޭސިވިލާތުގެ ފޮރިން ސެކްރެޓަރީ ޖެރެމީ ހަންޓް ވިދާޅުވެއްޖެއެވެ.
ސްޓެނާ އިމްޕީރޯސްގެ ނަންދީފައިވާ އެ ބޯޓްގެ ވެރިޔާ ބުނީ 23 މީހުންނާއެކު ދަތުރުކުރަމުންދިޔަ އެ ބޯޓާ ގުޅޭނެ ގޮތް ނުވާކަމަށެވެ. އަދި ބޯޓް ދަތުރުކުރީ އިރާނުގެ އުތުރަށް ކަމަށެވެ.
ޖެރެމީ ހަންޓް ވިދާޅުވެފައިވަނީ އެ ބޯޓް ދަތުރުކުރަމުންދަނިކޮށް ހަތަރު އުޅަނދަކާއި ހެލިކޮޕްޓަރަކުން ބޯޓް ވަށާލާފައިވާކަމަށެވެ. ލައިބީރިއާގެ ދިދަ ނަގާފައިވާ އިނގިރޭސިވިލާތުގެ އިތުރު އުޅަނދަކަށްވެސް އަސްކަރީ ގާޑުން އަރާފައިވާކަމަށާއި ނަމަވެސް މިހާރު އެ ބޯޓް ދޫކޮށްލުމުން އޭގެ ދަތުރު ފުރިހަމަކުރަމުންދާކަމަށެވެ.
ގްލާސްގޯގައި ގާއިމްވެފައިވާ ނޯރބަލްކް ޝިޕިންގ ޔޫކޭ އިން ބުނީ އެ ކުންފުނިން އޮޕަރޭޓްކުރާ މެސްޑަރސް އިން އަސްކަރީ ގާޑުގެ ސިފައިން ފޭބިފަހުން އަލުން މުއާސަލާތީ ގުޅުން ފެށިފައިވަނީ އިނގިރޭސިވިލާތުގެ ގަޑިން ހުކުރު ދުވަހުގެ 17:30 ގައި ކަމަށެވެ. އެ އުޅަނދުގައި ތިބި އެންމެންގެ ހާލުވެސް ރަނގަޅުކަމަށް އެ ކުންފުނިން ބުނެއެވެ.
ދިހަ ލޯންޗަކުން އެ މެސްޑަރ ވަށާލިއިރު އެ އުޅަނދުގައި 25 މީހުން ތިބިކަމަށް ހަންޓް ވިދާޅުވިއެވެ. މި މައްސަލައިގައި މަޝްވަރާކުރުމަށް އިނގިރޭސި ސަރުކާރުގެ އެމަރޖެންސީ ކޮމިޓީ ކަމުގައިވާ ކޯބްރާއިން ވައިޓްހޯލްގައި ހުކުރު ދުވަހު ދެ ފަހަރަށް ބައްދަލުވުން ބާއްވާފައިވެއެވެ.
ސަރުކާރުގެ ތަރުޖަމާނު ބީބީސީގައި ވިދާޅުވެފައިވަނީ "އީރާނުގެ މި ބަލައިނުގަނަވޭނެ އަމަލުތަކާމެދު އިންތިހާއަށް ކަންބޮޑުވާ" ކަމަށެވެ. އަދި އެ ކަމަކީ ބައިނަލްއަގްވާމީ ކަނޑުދަތުފަތުރުކުމުގެ މިނިވަންކަމަށް ސާފުކޮށް ގޮންޖެހުންކަމަށެވެ.
"އިނގިރޭސި ވިލާތުގެ ދަތުރުކުރާ ފަރާތްތަކަށް އަޅުގަނޑުމެން ލަފާ ދީފައިވާނީ ވަގުތީ ގޮތުން އެ ސަރަހައްދުން ދަތުރުނުކުރުމަށް" އެ ކަމަނާ ވިދާޅުވިއެވެ.
އިނގިރޭސިވިލާތާއި އީރާނާދެމެދު ނުތަނަވަސްކަން އުފެދުނީ ސީރިޔާގެ ރައީސް ބަޝާރުލް އަސަދާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ޚިލާފަށް އެ ގައުމަށް ތެޔޮ ފޯރުކޮށްދެނީކަމަށް ތުހުމަތުކުރެވިގެން ގްރޭސް 1 ނަމަކަށް ކިޔާ އީރާނުގެ ތެޔޮ ޓޭންކަރެއް މި މަހުގެ ކުރީކޮޅު އިނގިރޭސި ރޯޔަލް ސިފައިން ޖިބްރޯލްޓާއިން ހިފެހެއްޓުމާއެކުއެވެ.
އީރާނުގެ ތެޔޮބޯޓް ދަތުރުކުރީ ސީރިޔާއަށް ނޫންކަމަށް ޔަގީންކޮށްދޭނަމަ ބޯޓް ދޫކޮށްލެވިދާނެކަމަށް އިނގިރޭސި ފޮރިން ސެކްރެޓަރީ ޖެރެމީ ހަންޓްވަނީ އީރާނަށް އަންގަވާފައެވެ.
