ޕްރިމިއާލީގު ޗެމްޕިއަން މެންޗެސްޓަރ ސިޓީގެ ކެޕްޓަން ކަނޑައަޅާނީ ކުޅުންތެރިން ކަމަށް އެ ކުލަބުގެ ކޯޗް ޕެޕް ގާޑިއޯލާ ބުނެފިއެވެ.
ގާޑިއޯލާ މިހެންބުނީ ޕްރީސީޒަން ރަހުމަތްތެރިކަމުގެ މެޗުގައި ބުދަ ދުވަހު އެޓީމުގެ މިޑްފިލްޑަރ ޑޭވިޑް ސިލްވާ އަތުގައި ބޭންޑް އެޅުވުމާއި ގުޅިގެން ނޫސްވެރިޔަކު ކުރި ސުވާލަކަށް ޖަވާބު ދެމުންނެވެ.
ގާޑިއޯލާ އިތުރަށް ބުނީ ދާއިމީ ކެޕްޓަން ކަނޑައަޅާނީ ޕްރިސީޒަން މެޗުތައް ނިންމާލުމަށްފަހުގައި ކަމަށެވެ. ގާޑިއޯލާ ބުނީ ޕްރިސީޒަން ނިންމާލުމަށްފަހު ހުރިހާ ކުޅުންތެރިން އެކުގައިތިބެ މަޝްވަރާ ކުރުމަށްފަހު ދާއިމީ ކެޕްޓަނަކު ކަނޑައަޅާނެ ކަމަށެވެ.
ގާޑިއޯލާ މިހެންބުނިއިރު، ސިޓީގެ މިޑްފިލްޑަރ ކެވިން ޑިބްރައިނާ ވަނީ ކެޕްޓަންކަމަށް ޝައުގުވެރިވާ ކަމަށް ބުނެފައެވެ. ޑިބްރައިނާ ބުނީ ޓީމުގެ ކުޅުންތެރިން ބޭނުންވާނަމަ އޭނާ ސިޓީގެ ކެޕްޓަންކަން ގަބޫލުކުރަން ހުރީ ތައްޔާރަށް ކަމަށާއި މި ކަމަކީ ޓީމުގެ ކުޅުންތެރިންގެ ނިންމުމެއްކަމަށް އޭނާ ބުންޏެވެ.
ޑިބްރައިނާގެ އިތުރުން ސިލްވާ ވެސް ވަނީ ކެޕްޓަން ބޭންޑަށް ޝައުގުވެރިވާކަންފާޅު ކޮށްފައެވެ. ސިލްވާ ކެޕްޓަން ބޭންޑްއަށް ޝައުގުވެރިވާކަންފާޅުކުރި އިރު އޭނާ ވަނީ އަންނަ ސީޒަނަށްފަހު ސިޓީ ދޫކޮށްލާނެކަމަށް ބުނެފައެވެ.
