ކުންޏާއި ނަޖިހުން ކަރަންޓް އުފައްދަނީ
މިއީ ދުނިޔޭގެ އެހެން ގައުމުތަކުގައި ވެސް ކުރާ ކަމެއް ކަމަށް މިނިސްޓަރ ވިދާޅުވި
ރައްޔިތުންގެ މަޖިލީހުގެ އެންވަޔަރްމެންޓް އެންޑް ކްލައިމެޓް ޗޭންޖް ކޮމިޓީ
ރަށްރަށުގައި އުފެދޭ ނަޖިހާއި ގޭބަދިގެއިން ނަގާ ކުނިން ކަރަންޓް އުފައްދަން ވިސްނަމުންދާ ކަމަށް އެންވަޔަރްމަންޓް މިނިސްޓަރު ޑރ. ހުސެއިން ރަޝީދު ހަސަން ވިދާޅުވެއްޖެ އެވެ.
ރައްޔިތުންގެ މަޖިލީހުގެ އެންވަޔަރްމެންޓް އެންޑް ކްލައިމެޓް ޗޭންޖް ކޮމިޓީގައި ވާހަކަ ދައްކަވަމުން ޑރ. ހުސައިން ވިދާޅުވީ އެނައެރޮބިކް ޑައިޖެޝަން ޓެކްނޮލޮޖީ ހުރިހާ ރަށަކަށްވެސް ތަޢާރަފް ކުރަން ވިސްނަމުންދާ ކަމަށާއި އެކަމަށްޓަކައި ރޭވުން ތަކެއް މިހާރު ރާވަމުންދާ ކަމަށެވެ.
"ރަށްރަށުގައި އުފެދޭ ނަޖިހާއި ގޭބަދިގެއިން ނަގާ ކުނި އެއްކޮށްގެން އޭގެން ގޭސް އުފައްދަން. އެއީ އެނައެރޮބިކް ޑައިޖެޝަންގެ ތެރެއިން ގޭސް އުފައްދައިގެން އޭގެން އުފެދޭ ގޭހުން ކަރަންޓް އުފެއްދުން." މިނިސްޓަރު ވިދާޅުވި އެވެ.
އެ ޕްރޮސެސްގެ ތެރެއިން ނުކުންނަ ބައެއް ޕްރޮޑަކްޓަކީ އެކި ގޮތްގޮތަށް ބޭނުން ކުރެވިދާނެ އެއްޗިހި ކަމަށް މިނިސްޓްރ ފާހަގަ ކުރެއްވެވިއެވެ.
"ކާދުގެ ގޮތުގައި ވެސް ގަސްހައްދަންވެސް ރުއްހައްދަންވެސް ބޭނުން ކުރެވިދާނެ. އަދި އޭގެ އިތުރަށް ހިއްކައިގެން އަންދައިގެން ފަހުން އިންސޮލަރޭޓްވެސް ކުރެވިދާނެ" މިނިސްޓަރ ވިދާޅުވިއެވެ.
މިނިސްޓަރު ވިދާޅުވީ އަންދައިގެން ނައްތާނުލެވޭ ކުނި، ކުދިކޮށްގެން ވޭސްޓްމެނޭޖްމަންޓް ސެންޓަރުތަކަށް ގެންދިއުމަށް ނިންމާފައިވާ ކަމަށެވެ.
"އެކަން ކުރުމަށް މިނިސްޓްރީން ވިސްނާފައި އޮތް ގޮތަކީ ރަށްރަށުގައި އުފެދޭ ކުނިވާ ޒާތުގެ ކުނި އެގެންނަން ވޭސްޓްމެނޭޖްމަންޓް ސެންޓަރަށް. ގެނެސް އޭގެން ކާލު އުފައްދަން މަސައްކަތް ކުރުމަށް." މިނިސްޓަރ ވިދާޅުވިއެވެ.
އޭގެ އިތުރަށް ރަށުގައި އުފެދޭ ސޮލިޑް ވޭސްޓް، ފުޅިޔާ ދަޅާ ލަކުޑިއާއި އަދި އެހެން ޒާތުގެ ސާމާނު އެރަށްރަށުގައި އިންދޭނެ ގޮތް ނެތުމުން އެތަކެތި ރަށުން ބޭރުކުރަން ޖެހޭ ކަމަށް މިނިސްޓަރ ވިދާޅުވިއެވެ.
"ފިއްތައިގެން ބޭރު ކުރަން ވިސްނާފައި އޮތީ. ފުޅި އެއްޗިހިވެސް މުގުރައިގެން ބޭރުކުރަން ވިސްނާފއި އޮތީ ދެން އެ ރަށްރަސުގައި އެންދޭނެ ސާމާނު އެރަށްރަށުގައި އަންދަން ވިސްނާފައި." މިނިސްޓަރ ވިދާޅުވިއެވެ.
މިއީ ދުނިޔޭގެ އެހެން ގައުމުތަކުގައިވެސް ކުރާ ކަމެއް ކަމަށާއި އެ ޓެކްނޮލޮޖީ އެގްޒިސްޓްވާ ކަމަށެވެ. އެހެންކަމުން އެކަން ކުރުމަށް ތައްޔާރު ވަމުންދާ ކަމަށް މިނިސްޓަރ ވިދާޅުވި އެވެ.
