އައިއޯއައިޖީ 2019: ހުޅުވުމުގެ ރަސްމިއްޔާތުގައި ދިދަ އުފުލާ އެތުލީޓު އިއުލާންކުރުން އާދީއްތަ ދުވަހު
11 ޖުލައި 2019 | ބުރާސްފަތި 08:25ދިދަ އުފުލާ އެތުލީޓު ހޮވުމަށް ހަމަޖެހިފައިވަނީ އެމްއޯސީގެ ބޯޑުން
ރީޔޫނިއަންގައި 2015 ވަނަ އަހަރު ބޭއްވި އައިއޯއައިޖީ ގޭމްސްގެ ތެރެއިން
އިންޑިއަން އޯޝަން އައިލޭންޑް ގޭމްސް 2019 ގެ ހުޅުވުމުގެ ރަސްމިއްޔާތުގައި ދިވެހި ދިދަ އުފުލާ އެތުލީޓުގެ ނަން އާދީއްތަ ދުވަހު އިއުލާންކުރާ ގޮތަށް ހަމަޖެހިއްޖެއެވެ.
އެމްއޯސީން ބުނީ، ދިދަ އުފުލާ އެތުލީޓު އިއުލާން ކުރާނީ ރައީސް އޮފީހުގައި ބާއްވާ ހާއްސަ ރަސްމިއްޔާތެއްގައި އަންނަ އާދީއްތަ ދުވަހު ކަމަށެވެ.
މި ރަސްމިއްޔާތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބައިވެރިވެވަޑައިގަންނަވާއިރު، އައިއޯއައިޖީ 2019 ގެ ކޮންޓިންޖެންޓާ އެމަނިކުފާނު ބައްދަލުކުރެއްވުމަށް ވެސް ވަނީ ހަމަޖެހިފައި ކަމަށް އެމްއޯސީން ބުނެއެވެ.
މީގެއިތުރުން އެމްއޯސީން ބުނީ، ދިދަ އުފުލާ އެތުލީޓު ހޮވުމަށް ހަމަޖެހިފައިވަނީ އެމްއޯސީގެ ބޯޑުން ކަމަށެވެ.
އައިއޯއައިޖީގެ ހުޅުވުމުގެ ރަސްމިއްޔާތުގައި 2015 ވަނަ އަހަރު ދިވެހި ދިދަ އުފުލީ ރާއްޖޭގެ އެންމެ ބާރު ދުވުންތެރިޔާ ހަސަން ސާއިދުއެވެ. އެފަހަރު ސާއިދުއަށް ވެސް ދިދަ ހަވާލުކޮށްފައިވަނީ ރައީސް އޮފީހުގައި ބޭއްވުނު ހާއްސަ ރަސްމިއްޔާތެއްގައެވެ.
އެފަހަރު ދިދަ އުފުލާނެ އެތުލީޓަކަށް ސާއިދު ހޮވުނީ ހަތް އެތުލީޓުންނާ ވާދަކޮށްގެން އެސްއެމްއެސް މެދުވެރިކޮށެވެ.
އައިއޯއައިޖީގައި ބައިވެރިވާ ދިވެހި ކޮންޓިންޖެންޓު ފުރުމަށް ހަމަޖެހިފައިވަނީ އަންނަ ބުދަ ދުވަހު ހެނދުނެވެ.
