އޭޝިއަން ގޭމްސްއަށް 200 އެތުލީޓުން، މިއީ އައިއޯއައިޖީއަށް ތައްޔާރުވާން ލިބޭ ބޮޑު ފުރުސަތެއް
މިއަހަރުގެ މުބާރާތް އޮންނާނީ އިންޑޮނޭޝިއާގެ ޖަކާޓާގައި
2014 ވަނަ އަހަރުގެ އައިއޯއައިޖީގައި ރާއްޖޭގެ އެންމެ ބާރު ދުވުންތެރިޔާ ދުވަނީ
އިންޑޮނޭޝިއާގެ ޖަކާޓާގައި މިއަހަރު ބާއްވާ އޭޝިއަން ގޭމްސްއަށް ރާއްޖޭގެ ފަރާތުން 200 އެތުލީޓުން ދާނެ ކަމަށާއި އަދި މިއީ އަންނަ އަހަރު އޮންނަ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުވުމަށް ލިބޭ ބޮޑު ފުރުސަތެއް ކަމަށް ރާއްޖޭގެ އޮލިމްޕިކް ކޮމިޓީގެ ޖެނެރަލް ސެކްރެޓަރީ އަހުމަދު މަރުޒޫގު ވިދާޅުވެއްޖެއެވެ.
ރާއްޖެޓީވީގެ "ކުޅިވަރުފައިލް" ޕްރޮގްރާމްގައި ވާހަކަ ދައްކަވަމުން މަރުޒޫގު ވިދާޅުވީ މިއަހަރު އޮންނަ އޭޝިއަން ގޭމްސްގައި 11 ކުޅިވަރަކުން 200 އެއްހާ އެތުލީޓުން ބައިވެރިވާނެ ކަމަށެވެ. އެންމެ ފުރަތަމަ ހޭންޑްބޯލް ގައި ވެސް ބައިވެރިވާ ގޮތަށް އޮތް ނަމަވެސް މިހާރު ހޭންޑްބޯލް ޓީމެއް އޭޝިއަން ގޭމްސްގައި ބައިވެރިނުވާނެ ކަމަށް މަރުޒޫގު ވިދާޅުވެފައިވެއެވެ. ހަމައެހެންމެ ހުރިހާ އެސޯސިއޭޝަންތަކާއެކު މަޝްވަރާކުރުމަށް ފަހު ގައިޑްލައިން އަދި ކޯޑް އޮފް ކޮންޑަކްޓެއް ތައްޔާރުކުރުމުގެ މަސައްކަތް ނިމެމުންދާ ކަމަށެވެ.
މަރުޒޫގު ވިދާޅުވީ ބޭނުންވަނީ އެ މުބާރާތަށް ރާއްޖޭގެ ހުރިހާ އެތުލީޓުން ވެސް ތައްޔާރުވެގެން ދިޔުން ކަމަށާއި އޭޝިއަން ގޭމްސް ކޮންމެ އަހަރަކު ވެސް އޮންނަނީ އައިއޯއައިޖީގެ ކުރީ އަހަރު ކަމަށްވުމާއެކު އެއީ ތައްޔާރުވުމަށް ލިބޭ ބޮޑު ފުރުސަތެއް ކަމަށެވެ. މަރުޒޫގު ވިދާޅުވީ މިއީ އައިއޯއައިޖީއަށް އެތުލީޓުން ޓްރެއިނިން ފެށުމަށް ލިބޭ މުބާރާތެއް ކަމަށާއި އެ ޓްރެއިނިން އެގޮތަށް ކުރިޔަށް ގެންދެވިއްޖެނަމަ ދޮޅު އަހަރު ވަންދެން ހުރިހާ އެތުލީޓުންނަށް ވެސް ޓްރެއިނިން ދިނުމުގެ މަގުފަހި ވެގެންދާނެ ކަމަށެވެ.
