56 ލޯޔަރުން އެއްފަހަރާ ސަސްޕެންޑް ކޮށްފައިވަނީ ސުޕްރީމް ކޯޓުގެ ލަފައެއް ނެތި: ޑީޖޭއޭ
9 ޖުލައި 2019 | އަންގާރަ 13:0856 ވަކީލުން އެއްފަހަރާ ސަސްޕެންޑް ކޮށްފައިވަނީ 2017 ވަނަ އަހަރު
މިއަދު ބޭއްވި ޖުޑީޝަރީ ކޮމިޓީގެ ތެރެއިން
ފަންސާސް ހަ ލޯޔަރުން ސަސްޕެންޑް ކޮށްފައި ވަނީ ސުޕްރީމް ކޯޓުގެ ލަފައެއް ނެތިކަން ހާމަވާ ކަމަށް ޑިޕާޓްމަންޑް އޮފް ޖުޑީޝަލް އެޑްމިނިސްޓްރޭޝަނުން(ޑީޖޭއޭ) ބުނެފިއެވެ.
ޖުޑީޝަރީ ކޮމިޓީއަށް ޑީޖޭއޭ އަންގާރަ ދުވަހު ހާޒިރު ކޮށް ސުވާލުކުރުމުން ޖުޑިޝަލް އެޑްމިނިސްޓްރޭޓާ ޑރ. އަބްދުﷲ ނަޒީރު ވިދާޅުވީ އެމަގާމާ ހަވާލުވުމަށްފަހު ޑީޖޭއޭގެ އިންޓަރނަލް އޮޑިޓެއް ކުރެއްވި ކަމަށެވެ. އަދި އެ އޮޑިޓުން 56 ލޯޔަރުން ސަސްޕެންޑް ކޮށްފައިވަނީ ސުޕްރީމް ކޯޓުގެ އެންގުމަށް ކަމެއް އެނގޭނެ އެއްވެސް ލިޔެކިޔުމެއް ފެންނަން ނެތް ކަމަށް ވިދާޅުވިއެވެ.
ނަޒީރު ވިދާޅުވީ 56 ވަކީލުން ސަސްޕެންޑު ކުރުމަށް ސުޕްރީމް ކޯޓުގެ ލިޔުމެއް ނެތްކަމުގައި ވީނަމަވެސް އޭރު ޖުޑިޝަލް އެޑްމިނިސްޓްރޭޓަރުގެ މަގާމުގައި ހުންނެވި ބޭފުޅަކު އެ ވަކީލުންނަށް ދައުވާ ކޮށްދިނުމަށް އެދި ފުލުހުންނަށް ހުށައެޅި ލިޔުންތައް އެބަހުރި ކަމަށެވެ. އަދި އެލިޔުންތަކުގައި ސޮއި ކުރައްވާފައި ވަނީ އޭރުގެ ޖުޑީޝަލް އެޑްމިނިސްޓްރޭޓަރ ކަމަށް ވިދާޅުވިއެވެ.
ލޯޔަރުން އެއްފަހަރާ ސަސްޕެންޑް ކުރި އިރު ޖުޑިޝަލް އެޑްމިނިސްޓްރޭޓަރ ކަމުގެ މަގާމުގައި އޭރު ހުންނެވީ ހަސަން ސައީދެވެ. އޭނާގެ މަގާމު ގެއްލުނީ 2018 ވަނަ އަހަރުގެ ފެބްރުއަރީ މަހު ހައްޔަރުކުރުމުން އޭނާ އެ މަގާމުން ވަކި ކޮށްފައި ވާތީ އެވެ. އޭގެ ފަހުން އެ މަގާމަށް ހުޅުވާލި ފުރުސަތުގައި ޑރ. އަބްދުﷲ ނަޒީރު އެމަގާމަށް އައްޔަން ކުރީ އެ އަހަރުގެ ނޮވެމްބަރު މަހުގެ ތެރޭގައެވެ.
މި މައްސަލާގައި ކޮމިޓީގެ މުގައްރިރު އަދި މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ " އެމައްސަލަ ވަކި ބައެއްގެ އިސްތަށިފުޅަށް ކަނޑުއްވާލަނީ ތޯ"ވިދާޅުވެ ނަޒީރާއި ސުވާލު ކުރައްވާފައެވެ. އެއަށް ޖަވާބު ދެއްވައިޑީޖޭއޭގެ ތަރުޖަމާންފައިސަލްއާދަމް ވިދާޅުވީ ނަޒީރު "އެ ވިދާޅުވަނީ އެއީ ވަކި މީހެއްގެ ބޮލަށް މައްސަލަ ޖައްސަވަނީ ނޫން"ކަމަށާއި އޭނާ ދަންނަވަނީ 56 ވަކީލުން ސަސްޕެންޑް ކުރުމަށް އެންގި ލިޔުމެއް އެ އިދާރާގައި ނެތް ވާހަކަ ކަމަށެވެ.
56 ވަކީލުން އެއްފަހަރާ ސަސްޕެންޑް ކޮށްފައިވަނީ 2017 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހުއެވެ. އޭގެތެރެއިން ބައެއް ވަކީލުންގެ ސަސްޕެންޝަން އޭރު އުވާލާފައިވަނީ އެ ވަކީލުން ސުޕްރީމް ކޯޓުގައި މައާފަށް އެދުމުނެންވެ.
ގާނޫނީ ދާއިރާގައި ހުރި މައްސަލަތައް ފާހަގަ ކޮށް 56 ވަކީލަކު ޕެޓިޝަނެއްގައި ސޮއިކޮށް ސުޕްރީމް ކޯޓަށް ހުށައެޅުމުން ޑީޖޭއޭއިން ސަސްޕެންޑް ކޮށްފައިވަނީ ގާނޫނު އަސާސީއާއި ގާނޫނުތަކާއި ގަވާއިދުތަކާ ޚިލާފަށް ޢަދުލު އިންޞާފު ގާއިމުކުރުމުގެ ބާރުގެ މުސްތަޤިއްލުކަމާއި، ފަނޑިޔާރުންގެ މުސްތަގިއްލުކަމަށް ހުރަސް އެޅޭގޮތަށް ޖަމާޢަތް ހަދައިގެން ޣައިރުގާނޫނީ ގޮތެއްގައި ދިވެހިރާއްޖޭގެ ސުޕްރީމް ކޯޓު ދޮށަށް އެއްވެ، ޢަދުލު އިންޞާފުގެ ބާރުގެ މަސައްކަތާއި ބެހި، ނުފޫޒު ފޯރުވަން މަސައްކަތްކުރުމުން ކަމަށް ބުނެއެވެ. އަދި ކޯޓުތައް ކޯޓުތަކުގެ އިހްތިސާސްތަކާއި ކޯޓުތަކުގެ އިޖުރާއަތުތަކާއި، ކޯޓުތަކުން ނިންމާ ނިންމުންތަކާ ޚިލާފު ޣައިރު ގާނޫނީ ލިޔުމެއް ލިޔެ، އެ ލިޔުމުގައި ސޮއިކޮށް، ދިވެހިރާއްޖޭގެ ޢަދުލު އިންޞާފު ޤާއިމުކުރުމުގެ ބާރަށް ދަތިކޮށް، ކޯޓުތަކުގެ ޙުރުމަތް ކެނޑި މައްސަލަ ބަލައި ތަހުގީގުކުރަމުންދާތީ ކަމަށެވެ.
ޑީޖޭއޭ ހިންގަމުން ދަނީ ސުޕްރީމް ކޯޓުގެ ދަށުންނެވެ.
