މެމްބަރުން އެނބުރި ވަޑައިގެންފި ނަމަ ގައުމުގެ ހުރިހާ ކަމެއް އެއްފަހަރާ ހަމަޖެހޭނެ: ގާސިމް
އެކައުންޓްތައް ފްރީޒް ކުރިއަސް ފަރުވާލެއް ނެތް
ޖުމްހޫރީ ޕާޓީގެ ލީޑަރު ގާސިމް އިބްރާހިމް
ޖުމްހޫރީ ޕާޓީ އާއި އެމްޑީޕީ ދޫކުރައްވައި ސަރުކާރު ހިންގާ ޕީޕީއެމްއާ ގުޅިވަޑައިގެންފައިވާ މެމްބަރުން، އެ ބޭފުޅުންގެ އަސްލަށް ރުޖޫއަވެއްޖެ ނަމަ "މުޅި ގައުމުގެ ހުރިހާ ކަމަހެން އެއްފަހަރާ ހަމަޖެހިގެން ދާނެ" ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް އާދީއްތަ ދުވަހުގެ ރޭ ވިދާޅުވެއްޖެ އެވެ.
ގާސިމް މިހެން ވިދާޅުވީ، މަޖިލީހުގެ ރައީސް އަބްދުﷲ މަސީހްގެ އިތުބާރު ނެތްކަމުގެ މައްސަލަ ބޯމަތިވެފައި ވަނިކޮށެވެ.
ކުރިއަށް އޮތް ލޯކަލް ކައުންސިލްގެ އިންތިހާބުގައި ޖުމްހޫރީ ޕާޓީން ވާދަކުރާ 94 ކެންޑިޑޭޓުންނަށް ޓިކެޓް ހަވާލުކުރަން، އެ ޕާޓީގެ މައި އޮފީސް، މ.ކުނޫޒުގައި ބޭއްވި ޖަލްސާގައި ގާސިމް ވިދާޅުވީ ގައުމުގެ ސަލާމަތާއި އަމާންކަން ދެމެހެއްޓުމަށާއި ގައުމަށް ބާއްޖަވެރިކަން ގެނައުމަށްޓަކައި ރައްޔިތުންގެ ހައްގުތައް އެ ބައިމީހުންނަށް ފުރިހަމަކޮށްދޭންޖެހޭ ކަމަށެވެ. މި ގައުމު ފަސާދައިގެ ތެރެއަށް ގެނބި، މަޖިލީހުގެ މެމްބަރުން ރައްޔިތުންގެ މަތިން ހަނދާންނެތި، ވަކި ބައެއްގެ ހައްގުތަކަށް މަސައްކަތްކުރައްވާ ބޭފުޅުންނަށް ވެގެން ނުވާނެ ކަމަށް ވެސް ގާސިމް ވިދާޅުވި އެވެ.
"މި ދިވެހި ގައުމުގެ ހަމަޖެހުމާއި އަމާންކަމަށްޓަކައި، ރައްޔިތުންގެ މަސްލަހަތަށްޓަކައި ވެސް އަޅުގަނޑުމެންގެ ޕާޓީން ދިޔަ 9 މެމްބަރުންނާއި އަދި އެމްޑީޕީން ވަކިވެގެން ދިޔަ މެމްބަރުން އެނބުރި ވަޑައިގަތުމުން ގައުމުގެ ހުރިހާ ކަމެއް ހަމަޖެހިގެން ދިޔައީ،" ގާސިމް ވިދާޅުވި އެވެ.
މި މެމްބަރުން އަސްލަށް ރުޖޫއަވެއްޖެ ނަމަ، ޕާޓީގެ ދިދަ ބަދަލު ކުރަން ނޭންގޭނެ ކަމަށާއި ގާނޫނާ ހިލާފަށް ކަންކަން ކުރުން ވެސް ހުއްޓުވި ޒިންމާދާރުކުރެވޭނެ ކަމަށް ގާސިމް ވިދާޅުވި އެވެ. ގާސިމް މިހެން ވިދާޅުވީ ޖުމްހޫރީ ޕާޓީގެ ދިދަ ބަދަލުކުރަން އިލެކްޝަންސް ކޮމިޝަނުން އަންގާފައިވަނިކޮށެވެ.
މިހާރު މިއޮތް ސަރުކާރު ހޮވިފައިވަނީ، ރައްޔިތުންގެ ގާތަށް އޭނާ ވަޑައިގެން ސަލާންޖަހައިގެން ކަމަށް ގާސިމް ވިދާޅުވި އެވެ. ނަމަވެސް މި ސަރުކާރުން ވެސް ޖެހީ ކޮޅުފައިން ކަމަށް ގާސިމް ވިދާޅުވި އެވެ.
ކޮންމެ ކަމެއް ވެސް ވަގުތު ޖެހުމުން ވާނެ ކަމަށް ފާހަގަ ކުރައްވަމުން ގާސިމް ވިދާޅުވީ، ކިތަންމެ ބާރުވެރިކަމުގައި ހުންނެވި ނަމަވެސް ކަންކަން ވުމަށް އިރާދަ ކުރެއްވުމުން މާގިނަ އިރެއް ނުވެ ކަންކަން ބަދަލުވެގެންދާނެ ކަމަށެވެ. ސަރުކާރުން އަނިޔާވެރިވަމުންދާ ކަމަށް އިޝާރަތް ކުރައްވައި ގާސިމް ވިދާޅުވީ ހިޓިލަރާއި ފިރުއަނުވެ ސް ނިމިގެން ދިޔައީ ކުޑަ ހިނދިކޮޅެއްގެ ތެރޭގައި ކަމަށެވެ. ގައުމު ހަމައަކަށް އެޅުވުމަށްޓަކައި ތައުލީމު ހާސިމް ކުރައްވާފައިވާ ބޭފުޅުން އިސް ނަންގަވައި، ގާނޫނީ އިމުގެ ތެރެއިން ކަންކަން ކުރުމަށް ގާސިމް ގޮވާލެއްވި އެވެ.
ގާސިމް ވިދާޅުވީ އޭނާގެ މުދަލާއި ރިސޯޓްތައް ނަގައި، އެކައުންޓްތައް ފްރީޒު ކުރިޔަސް އެއްވެސް ފަރުވާލެއް ނެތް ކަމަށެވެ. މާތް ﷲ ދެއްވި މުދަލެއް އެ މިންވަރު ކުރައްވާފައިވާ ގޮތަކަށް ގެންދަވާނެ ކަމަށެވެ. ނަމަވެސް މުދާ ނަގައި، އެކައުންޓްތައް ފްރީޒުކޮށްފި ނަމަ ކަންބޮޑުވަނީ 5000 މުވައްޒަފުންނަށް މުސާރަ ނުދެވިދާނެތީ ކަމަށް ވެސް އޭނާ ވިދާޅުވި އެވެ.
