ރައީސް ސޯލިހުގެ ހާއްސަ ސިޓީފުޅެއް ސީޝެލްސްގެ ރައީސަށް މިނިސްޓަރ ޝާހިދު އަރުވައިފި
މިނިސްޓަރ ޝާހިދުގެ އަރިހުގައި، މިނިސްޓަރ އޮފް ޔޫތު، އަހްމަދު މަހްލުފް ވެސް ބައިވެރިވެ ވަޑައިގަންނަވާ
ސީޝެލްސްއަށް ކުރައްވާ ރަސްމީ ދަތުރުފުޅުގައި މިނިސްޓަރ ޝާހިދު ވަނީ ސީޝެލްސްގެ ރައީސް ޑެނީ ފޯރ އާއި ބައްދަލު ކުރައްވާފަ
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ގެ ސިޓީފުޅެއް ސީޝެލްސްގެ ރައީސް ޑެނީ ފޯރ އަށް ފޮރިން މިނިސްޓަރު ޢަބްދުﷲ ޝާހިދު އަރުވައިފިއެވެ.
އިންޑިއަން އޯޝަން އައިލެންޑް ގޭމްސް (އައި.އޯ.އައި.ޖީ) 2023 ވަނަ އަހަރު ދިވެހިރާއްޖޭގައި ބޭއްވުމަށް ރާއްޖެއިން ކުރާ ބިޑަށް ތާއީދު ހޯދުމަށް ރައީސް ސޯލިހް ގެ ހާއްސަ މަންދޫބެއްގެ ގޮތުން، ޝީސެލްސްއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި، ހޯމަ ދުވަހު ހެނދުނު ސީޝެލްސްގެ ރައީސް ޑެނީ ފޯރ އާއި ބައްދަލު ކުރައްވާ ރައީސް ސޯލިހުގެ ހާއްސަ ސިޓީފުޅެއް ސީޝެލްސްގެ ރައީސަށް ވަނީ އަރުވާފައެވެ.
މިބައްދަލުކުރެއްވުމުގައި ދިވެހިރާއްޖެއާއި ސީޝެލްސްއާ ދެމެދުގައި އޮތް ޒަމާންވީ ގުޅުން އެކި ދާއިރާތަކުން އިތުރަށް ބަދަހިކުރެއްވުމާ ބެހޭގޮތުން ދެބޭފުޅުން ވަނީ މަޝްވަރާ ކުރައްވާފައިވެއެވެ.
މި ދަތުރު ފުޅުގައި މިނިސްޓަރ ޝާހިދުގެ އަރިހުގައި، މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަހްމަދު މަހްލޫފް ވެސް ބައިވެރިވެ ވަޑައިގަންނަވައެވެ.
