ހައްޖަށް މީހުން ގެންދާނެ ކުންފުނިތައް ކަނޑައެޅުމުގައި ކޮރަޕްޝަން ނުހިމެނޭ: އޭސީސީ
އޭސީސީން އެގޮތަށް ނިންމީ، އެ ކޮމިޝަނަށް ހުށަހެޅުނު ޝަކުވާތައް ތަހުޤީޤްކުރުމަށްފަހު
ދިވެހިންތަކެއް ހައްޖުގެ އަޅުމަކަށް ފުރަނީ
1440 ވަނަ އަހަރު ހައްޖަށް މީހުން ގެންދާނެ ކުންފުނިތައް ކަނޑައެޅުމުގައި ކޮރަޕްޝަންގެ ކަމެއް ނުހިމެނޭކަމަށް އެންޓި ކޮރަޕްޝަން ކޮމިޝަން (އޭސީސީ) އިން ނިންމައިފިއެވެ.
އޭސީސީން އެގޮތަށް ނިންމީ، އެ ކޮމިޝަނަށް ހުށަހެޅުނު ޝަކުވާތައް ތަހުޤީޤްކުރުމަށްފަހު އެވެ. އެގޮތުން އޭސީސީގެ ތަހުގީގަށް ފާހަގަކުރެވުނު ކަންތައްތަކަށް އަލިއަޅުވާލާ ނެރުނު ރިޕޯޓުގައި ބުނެފައިވަނީ، ހިދުމަތާއި ހިދުމަތުގެ ފެންވަރުގެ ބަޔަށް ޕޮއިންޓް ދީފައިވަނީ، ޕްރޮޕޯސަލްއާ އެކު ހުށައެޅި ލިޔެކިޔުންތަކަށް ބެލުމަށް ފަހުގައި އިވެލުއޭޝަން ކޮމިޓީގައި މަޝްވަރާކޮށްފައިކަން ތަހުގީގަށް އެނގިފައިވާ ކަމަށެވެ.
ނަމަވެސް ޕޮއިންޓްދީފައިވާގޮތަށް ބެލިބެލުމުން، ބައެއް ދާއިރާތަކުގެ ސަބްކެޓެގަރީތަކަށް ދީފައިވާ ޕޮއިންޓަކީ ރަނގަޅަށް ދީފައިވާ ޕޮއިންޓްކަން ކުންފުނިތަކުން ހުށައަޅާފައިވާ ލިޔެކިޔުންތަކުން ކަށަވަރާ ނުވާކަމަށް ވެސް އޭސީސީން ވަނީ ބުނެފައެވެ. އަދި ވަކި ފަރާތަކަށް ނާޖައިޒު ފައިދާއެއް ނުވަތަ މަންފާއެއް ލިބޭގޮތަށް ޕޮއިންޓް ދީފައިވާކަން، އެ ކޮމިޝަނަށް ފާހަގުރެވިފައި ނުވާކަމަށް އޭސީސީން ބުނެފައިވެއެވެ.
ހައްޖަށް މީހުން ގެންދިޔުމުގެ ޕްރޮޕޯސަލްތައް ހުށައެޅި ފަރާތްތަކުގެ ލިޔެކިޔުންތައް ހަމަނުވި ނަމަވެސް، އެ ޕްރޮޕޯސަލްތައް ބާތިލްނުކޮށް ބަލައިގެންފައިވާ އޮތުމުން، އޭސީސީން ވަނީ އިސްލާމިކް މިނިސްޓްރީއަށް ވެސް އެކަންކަން އިސްލާހު ކުރުމަށް އަންގާފައެވެ.
ހައްޖަށް މީހުން ގެންދާ ކުންފުނިތައް ކަނޑައެޅުމުގައި އިސްލާމިކް މިނިސްޓްރީގެ ކޮރަޕްޝަންގެ އަމަލުތަކެއް ހިންގާފައިވާ ކަމަށް އޭސީސީއަށް ޝަކުވާ ހުށައެޅީ ސިސިލްފަރު ޖަމާއަތުންނެވެ. އެ ޖަމާއަތުން އޭރު ފާހަގަކުރީ ތަޖުރިބާގެ ބަޔަށް ޕޮއިންޓް ދިނުމުގައި އެ ކުންފުންޏަށް މަދުން ޕޮއިންޓް ދީފައިވާ ކަމަށެވެ.
