މި ސަރުކާރަށް މުހިންމީ ބޮޑެތި ޕްރޮޖެކްޓްތަކެއް ނޫން ކަމަށައީ، ސަރުކާރަށް މުހިއްމީ ރައްޔިތުންގެ ޖީބަށް ފަސޭހައިން ފައިސާ ވަންނާނެ ކަންތައްތަކެއް ކުރުން ކަމަށް އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެ އެވެ.
އިކޮނޮމިކް މިނިސްޓްރީގެ މަސަައްކަތްތަކާއި ގުޅޭގޮތުން ރައީސް އޮފީހުގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރ ފައްޔާޒް އިސްމާއިލް ވިދާޅުވީ ވިޔަފާރިވެރިންނަށް ހުރި ދަތިތައް ނައްތާލައި، މިނިވަންކަމާއެކު ވިޔަފާރިކުރެވޭނެ މާހައުލެއް ޤާއިމްކުރުމަކީ އިޤްތިސާދެއް ކުރިއެރުވުމަށްކުރެވޭނެ އެންމެ މުހިންމު ކަންތައްތައް ކަމަށެވެ.
ބޮޑެތި މެގާ ޕްރޮޖެކްޓްތަކަކީ ވެސް މުހިއްމު ކަންތައްތައްކަން ފާހަގަކުރައްވާ ފައްޔާޒް ވިދާޅުވީ އެކަންކަން އަންނާނި އިންފްރާސްޓަކްޗަރ ތެރެއިން ކަމަށެވެ. އަދި ގުޅީފަޅު ޕްރޮޖެކްޓަކީ މުޅި އިގްތިސާދަށް އޭގެ ސަބަބުން ބޮޑެތި އަސަރުތަކެއް ކުރާނެ، ބޮޑު ޕްރޮޖެކްޓަކަށްވާނެކަމަށް ފައްޔާޒް ވިދާޅުވި އެވެ.
އޭގެއިތުރުން ވިޔަފާރިވެރިންގެ މައި ބަނދަރުގައި ހުރި މައްސަލަތައް ހައްލުކުރެވުމުންވެސް ވިޔަފާރިވެރިންނަށް ބޮޑެތި ލުއިތަކެއް ލިބިގެންދާނެކަން މިނިސްޓަރ ފާހަގަކުރެއްވި އެވެ. އެގޮތުން ވިޔަފާރިވެރިންގެ މައި ބަނދަރުގައި ހިދުމަތް ލިބުމުގެ ލަސްކަމާއި، އަގު ބޮޑުވުން ފަދަ މައްސަލަތައް ހައްލުވެގެންދިއުމުން ވިޔަފާރިވެރިންނަށށް ބޮޑެތި ފައިދާތަކެއްކުރާނެކަމަށް މިނިސްޓަރ ވިދާޅުވި އެވެ.
ޓްރާންސްޝިޕްމަންޓް ޕޯޓަކީ ބޮޑު ޕްރޮޖެކްޓެއްކަން ފާހަގަކުރައްވާ، ފައްޔާޒް ވިދާޅުވީ އެކަން ކާމިޔާބު ކަމާއެކު ކުރެވިއްޖެނަމަ ޓޫރިޒަމަށް ބަރޯސާވާ، ބަރޯސާވުން ވަރަށް ބޮޑުތަން ކުޑަވެގެން ދާނެކަމަށެވެ.
ލޯކަލް ޓޫރިޒަމްގެ ޕްރޮޖެކްޓަކީ ވެސް ބިޔަ މަޝްރޫއެއް ކަމަށާއި ވަކި ކޮންމެ ގެސްޓް ހައުސްއަކީ ކުޑަ ޕްރޮޖެކްޓެއްކަމުގައިވީ ނަމަވެސް މުޅި ރާއްޖެގައި އެކަން ކުރެވެންހުރި ރަށްރަށުގައި އެ ފުރުސަތުތަށް ހުޅުވައިލައިގެން ކުރިއަށް ގެންދިއުމަކީވެސް ބޮޑު ޕްރޮޖެކްޓެއްކަން މިނިސްޓަރ ފާހަގަކުރެއްވި އެވެ.
