ބްރޯޑްކޮމްގެ މެންބަރު ސޮފްވާން ވަކިކުރަން މަޖިލީހުގެ ތަޅުމަށް ފޮނުވަން ފާސްކޮށްފި
25 ޖޫން 2019 | އަންގާރަ 10:10ފާސްކޮށްފައިވަނީ ކޮމިޓީގައި ބައިވެރިވި ހުރިހާ މެންބަރުންގެ އިއްތިފާގުން
މަޖިލީހުގެ މިނިވަން މުއައްސަސާތަކައި ބެހޭ ކޮމިޓީ ބައްދަލުވުން
ބްރޮޑްކޮމްގެ ކުރީގެ ނައިބް ރައީސް އަދި މިހާރުގެ ވެސް މެންބަރު އިސްމާއީލް ސޮފްވާން މަޤާމުން ވަކިކުރުމަށް ނިންމައި މަޖިލީހުގެ ތަޅުމަށް ފޮނުވުމަށް މިނިވަން މުއައްސަސާތަކައި ބެހޭ ކޮމިޓީން ފާސްކޮށްފިއެވެ.
ސޮފްވާން ވަކިކުރުމަށް ކޮމިޓީއަށް ހުށަހަޅުއްވާފައި ވަނީ ގޮލަޅު ދެކުނު ދާއިރާގެ މެންބަރު މީކާއިލް ނަސީމްއެވެ. ތާއީދު ކުރެއްވީ ބިލެއްދޫ ދާއިރާގެ މެމްބަރު އަހުމަދު ހަލީމްއެވެ.
ފާސްކޮށްފައިވަނީ ކޮމިޓީގައި ބައިވެރިވި ހުރިހާ މެންބަރުންގެ އިއްތިފާގުންނެވެ. އެ ގޮތަށް މެންބަރުން ނިންމީ ބްރޯޑްކޮމް އިން ފޮނުވި ސޮފްވާންގެ ހާޒިރީ ބެލުމަށް ފަހުގައެވެ.
ބްރޯޑްކާސްޓްކުރުމުގެ ޤާނޫނުގެ 12 ވަނަ މާއްދާގެ 5 ވަނަ ނަމްބަރުގައި ބުނެފައިވާ ގޮތުގައި އެކަށީގެންވާ ސަބަބެއް ނެތި ވިދިވިދިގެން ކޮމިޝަންގެ ތިން ޖަލްސާއަށް ހާޒިރު ނުވެއްޖެ ނަމަ، އެ މެމްބަރަކު މަޤާމުން ވަކިކުރެވޭނެ އެވެ.
ސޮފްވާން ވަކިކުރުމަށް ހުށަހަޅުއްވާފައި މިވަނީ އޭނާ ވަޒީފާއަށް ނުނިކުންނަވާ މުސާރަ ނަންގަވަމުންގެންދަވާތާ އަށް މަސް ވެފައިވަނިކޮށެވެ. ކޮމިޝަންގެ މެންބަރެއްގެ މުސާރައަށް 40،000ރ ( ސާޅީސް ހާސް) ރުފިޔާ ލިބެއެވެ.
ކޮމިޝަންގެ ނައިބް ރައީސް ގެ މަޤާމުން ސޮފްވާން އިސްތިއުފާ ދެއްވާފައިވަނީ 13 ޖޫން 2019 ގައެވެ.
މީގެ އިތުރުން ބްރޮޑްކާސްޓިން ކޮމިޝަންގެ ހުރިހާ މެންބަރުން ވަކިކުރުމަށް ވެސް ކޮމިޓީއަށް ވަނީ ހުށަހަޅާފައެވެ.
ގަމު ދާއިރާގެ މެންބަރު މުހައްމަދު ވިސާމް ހުށަހެޅުއްވި މި މަސައްލައަށް ތާއީދު ކުރައްވަފއިވަނީ ބިލެތްދޫ ދާއިރާގެ މެންބަރު އަހުމަދު ހަލީމްއެވެ.
އަންގާރަ ދުވަހު އޮތް ކޮމިޓީގެ ބައްދަލުވުމުގައި މި މައްސަލައަށް ގޮތެއް ނިންމުމަށް ވަނީ ސަބް ކޮމިޓީއެއް އެކުލަވާލާފައެވެ.
ސަބް ކޮމިޓީގައި ހިމެނި ވަޑައިގަންނަވަނީ ގަމު ދާއިރާގެ މެންބަރު މުހައްމަދު ވިސާމް އާއި، ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގް އާއި، ވިލިމާލެ ދާއިރާގެ މެންބަރު އަހުމަދު އުޝާމް އަދި ތިނަދޫ ދެކުނު ދާއިރާގެ މެންބަރު އަބްދުﷲ ސަނީފް އެވެ.
ސަބް ކޮމިޓީގެ މަސައްކަތް ޖުލައި އަށްވަނަ ދުވަހަށް ނިންމައިދެއްވުމަށް ކޮމިޓީގެ މުޤައްރިރު އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވަނީ އެދިވަޑައިގެންފައެވެ.
