ރާޖަސްތާންގައި ދީނީ ހަރަކާތެއް ކުރިޔަށް ގެންދިޔަ ޓެންޓެއް ވެއްޓި 14 މީހުން މަރުވެއްޖެ
24 ޖޫން 2019 | ހޯމަ 09:18ޓެންޓް ވެއްޓުނީ ގަދަވަޔާއި ބޯ ވާރޭގެ ސަބަބުން
ޓެންޓަށް 300 އެއްހާ މީހުން ޖަމާވެ ތިބި ކަމަށް ރިޕޯޓްތައް ބުނޭ
އިންޑިއާގެ ރާޖަސްތާނުގައި އާދީއްތަ ދުވަހު ގަދަވަޔާއި ބޯ ވާރޭގެ ސަބަބުން ޓެންޓެއް ވެއްޓި މަދުވެގެން 14 މީހުން މަރުވެ 50 އަށް ވުރެ ގިނަ މީހުން ޒަޚަމްވެއްޖެއެވެ.
ރޮއިޓަރސް އިން ރިޕޯޓްކޮށްފައިވާ ގޮތުގައި ބައެއް މީހުން މަރުވެފައި ވަނީ ޓެންޓްގެ ދަށުވެ ކަރަންޓުގައި ޖެހިގެން ކަމަށްވާއިރު އަނެއް ބައި މީހުން މަރުވެފައި ވަނީ ޓެންޓްގެ ބައިތައް ވެއްޓިގެންނެވެ.
ހިންދުސްތާން ޓައިމްސް ރިޕޯޓްކޮށްފައިވާ ގޮތުގައި ދީނީ އަޅުކަމަކަށް އެ ޓެންޓަށް އެއްވެ ތިބި މީހުންގެ އަދަދު 300 އަށް އަރައެވެ.
މި ޓެންޓް ވެއްޓިފައި ވަނީ ރާޖަސްތާންގެ ބަރްމާ ޑިސްޓްރިކްޓްގައެވެ.
އެ ސްޓޭޓްގެ ޑިޒާސްޓަރ މެނޭޖްމަންޓް އެންޑް ރިލީފް މިނިސްޓަރ ބަންވާރް ލަ މެގްވާލް ވަނީ ފެނުގެ އަސަރުކުރުމުން ކަރަންޓް ކަނޑާނުލީ ކީއްވެތޯ ސުވާލުކޮށްފައެވެ.
މި ހާދިސާގެ ތަހުގީގު މިހާރުވަނީ ފަށާފައެވެ.
