ކ. މާލެ
|
6 މާރޗް 2018 | އަންގާރަ 14:27
ސްރީ ލަންކާގެ ކެންޑީގައި ބުޑިސްޓުންގެ ބަޔަކު އެއްވެފައި
ސްރީ ލަންކާގެ ކެންޑީގައި ބުޑިސްޓުންގެ ބަޔަކު އެއްވެފައި
ޓްވިޓަރ
ސްރީލަންކާގެ ދީނީ ހަމަނުޖެހުން
ދީނީ ހަމަނުޖެހުންތަކާއި ގުޅިގެން ސްރީލަންކާގައި ކުއްލި ނުރައްކަލުގެ ހާލަތު އިއުލާންކޮށްފި
 
ހަމަނުޖެހުންތައް ހިނގަނީ ބުޑިސްޓުންނާއި މުސްލިމުންނާއި ދެމެދު
 
ކުއްލި ނުރައްކަލުގެ ހާލަތު އިއުލާން ކޮށްފައިވަނީ 10 ދުވަހަށް
 
ކުއްލި ނުރައްކަލުގެ ހާލަތު އިއުލާން ކުރީ ދީނީ ހަމަނުޖެހުންތަކާއި ގުޅިގެން

ސްރީލަންކާގައި 10 ދުވަހުގެ މުއްދަތަކަށް ކުއްލި ނުރައްކަލުގެ ހާލަތު އިއުލާން ކޮށްފިއެވެ.

ސްރީލަންކާގެ މިނިސްޓަރ އޮފް ސޯޝަލް އެމްޕަވަރމަންޓް އެންޑް ވެލްފެއަރ އެސް.ބީ. ޑިސަނަޔަކެ އާ ހަވާލާދީ ސިލޯން ޓުޑޭ ނޫހުން ބުނީ، ލަންކާގައި 10 ދުވަހުގެ މުއްދަތަކަށް ކުއްލި ނުރައްކަލުގެ ހާލަތު އިއުލާން ކުރުމަށް ނިންމާފައިވަނީ އަންގާރަ ދުވަހު ބޭއްވި ކެބިނެޓްގެ ބައްދަލުވުމެއްގައި ކަމަށެވެ.

ކޮލޮމްބޯގައި ހުންނަ ރިޔާސީ ސެކްރެޓޭރިއަޓްގައި ބޭއްވި ކެބިނެޓްގެ ހާއްސަ ބައްދަލުވުމަށްފަހު ނިކުމެވަޑައިގެން ނޫސްވެރިންނާއި ވާހަކަ ދައްކަވަމުން ޑިސަނަޔަކެ ވިދާޅުވީ، މިއަދުގެ ވަގުތެއްގައި ސަރުކާރުގެ ގެޒެޓުގައި އެނިންމެވުން ޝާއިއު ކުރާނެ ކަމަށެވެ.

ކުއްލި ނުރައްކަލުގެ ހާލަތު އިއުލާން ކުރެއްވުމަށް ސްރީލަންކާގެ ރައީސް މައިތުރިޕާލާ ސިރިސޭނާ ނިންމެވީ، ސްރީލަންކާގައި ހިނގަމުންދާ ދީނީ ހަމަނުޖެހުންތަކާއި ގުޅިގެން ކަމަށް އޭނާ ވިދާޅުވި އެވެ.

މިހަމަނުޖެހުންތަކާއި ގުޅިގެން ހޯމަ ދުވަހު ކެންޑީގައި ވަނީ ކާފިއު ހިންގާފައެވެ. ލަންކާގެ ބުޑިސްޓުންނާއި މުސްލިމުންނާއި ދެމެދު ހޯމަ ދުވަހު ހިނގި ހަމަނުޖެހުންތަކުގައި ބުޑިސްޓަކު މަރުވެފައިވާއިރު، މުސްލިމު ވިޔަފާރިވެރިންތަކެއްގެ ފިހާރަތަކުގައި ބުޑިސްޓުން ވަނީ ހުޅުޖަހާފައެވެ.

މިދިޔަ ހަފްތާ ބަންދުން ފެށިގެން ތަޅާފޮޅުމާއި ހުޅުޖެހުންފަދަ ހަރަކާތްތައް އާއްމުވެފައިވާ ކަމަށް ލަންކާގެ ފުލުހުން ހޯމަ ދުވަހު ބުނެފައިވެއެވެ.

ސްރީލަންކާ އަކީ ދީނީ އަދި ނަސްލީ ހަމަނުޖެހުންތަކުގެ ބޮޑު މާޒީއެއް އޮތް ގައުމެކެވެ. 21 މިލިއަން މީހުންގެ އާބާދީއެއް އޮންނަ ލަންކާގެ އާބާދީގެ 10 އިންސައްތަ އަކީ މުސްލިމުންނެވެ. ބުޑިސްޓު ސިންހަޅައިގެން ނިސްބަތް އާބާދީގެ 75 އިންސައްތައިގައި އުޅޭއިރު، 13 އިންސައްތަ އަކީ ހިންދޫ އިންނެވެ.

ސްރީލަންކާގެ މުސްލިމުންނާއި ދެކޮޅަށް ހަމަނުޖެހުން ހިންގުމުގެ އިސްކޮށް ހަރަކާތްތެރިވަނީ ބުޑިސްޓް ޖަމާއަތެއް ކަމަށްވާ ބޮޑު ބަލަ ސޭނާ (ބީބީއެސް) ގްރޫޕުން ކަމަށް ރިޕޯޓްތައް ބުނެއެވެ.

މިދިޔަ ފެބްރުއަރީ މަހުގެ ތެރޭގައި ބުޑިސްޓުންނާއި މުސްލިމް ގްރޫޕްތަކާއި ދެމެދު ހިނގި ކުރިމަތިލުންތަކުގައި ފަސް މީހަކު ޒަޚަމްވެފައިވާއިރު، ބައެއް ފިހާރަތަކާއި މިސްކިތަކަށް ގެއްލުންދީފައިވެއެވެ.

މީގެ އިތުރުން 2014 ވަނަ އަހަރުގެ ޖޫން މަހުގެ ތެރޭގައި ބުޑިސްޓުން އަލުތުގާމާގައި ހިންގި މުސްލިމުންނާއި ދެކޮޅު ކެމްޕެއިންގައި ގިނަ ބަޔަކު މަރުވެ، ބޮޑެތި ގެއްލުންތަކެއް ލިބިފައިވެއެވެ.

މީގެ އިތުރުން ލަންކާގެ ހަރުކަށި ބުޑިސްޓުންގެ ގްރޫޕްތަކުން ދަނީ، މުސްލިމް ޖަމާއަތްތަކުން ބުޑިސްޓުން އިސްލާމް ވުމަށް މަޖުބޫރު ކުރާ ކަމަށާއި، ބުޑިސްޓުންގެ އާޘާރީ ބިނާތައް ސުންނާފަތި ކުރަމުންދާ ކަމުގެ ތުހުމަތު ކުރަމުންނެވެ.

2015 ވަނަ އަހަރު ވެރިކަމަށް ވަޑައިގެންނެވުމަށްފަހު ސްރީލަންކާގެ މިހާރުގެ ރައީސް މައިތުރިޕާލާ ސިރިސޭނާ ވަނީ، މުސްލިމުންނާއި ދެކޮޅަށް ހިންގާފައިވާ ކުށްތައް ތަހުގީގު ކުރައްވާނެ ކަމަށް ވައުދުވެވަޑައިގެންފައެވެ. އެހެންނަމަވެސް އެ މަސައްކަތުގައި ކުރިއެރުމެއް ލިބިފައިވާ ކަމުގެ ރިޕޯޓެއް ލިބިފައެއްނުވެއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަހްމަދު ސާއިފް ޝިޔާދް
0%
0%
75%
25%
0%
0%
ކޮމެންޓް