މިސްރުގެ މަޝްހޫރު ދީނީ އިލްމްވެރިޔާ ޔޫސުފް އަލް ގަރްދާވީ އުމުރަށް ޖަލަށް ލުމަށް މިސްރުގެ އަސްކަރީ ކޯޓަކުން ހުކުމް ކޮށްފިއެވެ.
މިއީ 2015 ވަނަ އަހަރު މިސްރުގައި ހިނގި ހަމަނުޖެހުންތަކުގައި ބައިވެރިވި ކަމުގެ ތުހުމަތުގައި ހިންގުނު ޝަރީއަތާ ގުޅިގެން އަލް ގަރްދާވީ މައްޗަށް ބުދަ ދުވަހު އިއްވި ހުކުމެވެ.
ޔޫސުފް އަލް ގަރްދާވީ މައްޗަށް ހުކުމް އިއްވީ އޭނާގެ ޣައިރު ހާޒިރުގައެވެ.
އަލް ގަރްދާވީ މައްޗަށް ކުރެވުނު ތުހުމަތު ތަކުގެ ތެރޭގައި މީހުން މެރުމަށް ހިތްވަރު ދިނުމާއި، ދޮގު ޚަބަރު ފެތުރުމާއި، ދައުލަތުގެ ތަކެއްޗަށް ގެއްލުން ދިނުން ހިމެނެއެވެ.
އަލް ގަރްދާވީ އަކީ ދޯހާ ގައި ގާއިމް ކޮށްފައިވާ އިންޓަނޭޝަނަލް ޔޫނިއަން އޮފް މުސްލިމް ސްކޯލާރސް ގެ ވެރިޔާ އެވެ. އޭނާ ދިރިއުޅެމުން ގެންދަނީވެސް ގަތަރުގައެވެ.
އަލް ގަރްދާވީގެ އިތުރުން 17 މީހަކު އުމުރަށް ޖަލަށް ލުމަށް ބުދަ ދުވަހު ހުކުމް އިއްވިއެވެ. އަދި 8 މީހުންނަށް މަރުގެ ހުކުމް އައެވެ.
މިނިވަން އިންތިޚާބަކުން މިސްރުގައި ފުރަތަމަ އިންތިޚާބު ކުރެވުނު ރައީސް މުހައްމަދު މުރުސީގެ ވެރިކަން 2013 ވަނަ އަހަރު އަސްކަރީ ބަޣާވާތަކުން ވައްޓާލި ފަހުން މިސުރުގައި ހަމަ ޖެހުން އޮތް ތަނެއް ނުފެނެއެވެ.
ހުސްވި އަހަރުގެ ސެޕްޓެމްބަރު މަހު އިންޓަޕޯލުން ވަނީ އުމުރުން 91 އަހަރުގެ އަލް ގަރްދާވީ ވޯންޓެޑް ލިސްޓުން އުނި ކޮށްފައެވެ. އިންޓަޕޯލުން އަލް ގަރްދާވީ ނަން ވޯންޓެޑް ލިސްޓުން އުނިކުރީ މިސުރުން އޭނާގެ މައްޗަށް ކޮށްފައިވާ ތުހުމަތައް ދިރާސާ ކުރުމަށްފަހުގައި ކަމަށް އެ މުވައްސަސާއިން ހާމަ ކޮށްފައިވެއެވެ.
