މުޒާހަރާތަކާއި ގުޅިގެން އީރާނުގެ ކުރީގެ ރައީސް އަހުމަދީނީޖާދު ހައްޔަރުކޮށްފި

ހަމަޖެހުން ނަގާލުމަށް ހިތްވަރުދިން ކަމަށް ބުނެ އީރާނުގެ ކުރީގެ ރައީސް މަހުމޫދު އަހުމަދީނީޖާދު ހައްޔަރު ކޮށްފައިވާ ކަމަށް ރިޕޯޓްތައް ބުނެފި އެވެ.

ސައުދީ ނޫހެއް ކަމަށްވާ އަލް އަރަބިއްޔާ އިން ބުނީ، އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަދި އީރާނުގެ ރައީސް ހަސަން ރޫހާނީ އާ އެގައުމުގެ ސަރުކާރާ ދެކޮޅަށް އާއްމުން ނުކުމެ ކުރި މުޒާހަރާތަކުގެ ތެރެއިން، ހަމަނުޖެހުން ހިންގުމަށާއި މުޒާހަރާ ކުރުމަށް ހިތްވަރު ލިބޭފަދަ ބަޔާންތަކެއް ނެރުނު ކަމަށް ބުނެ އަހުމަދީނީޖާދު ހައްޔަރުކޮށްފައިވާ ކަމަށެވެ.

އޭނާ ހައްޔަރު ކޮށްފައިވަނީ އީރާނުގެ ޝިރާޒް ސިޓީ އިން ކަމަށް ރިޕޯޓްތައް ބުނެއެވެ.

އީރާނުގެ ވެރިރަށް ތެހެރާނުގައި ހުރި އިތުބާރު ހުރި މަސްދަރުތަކާއި ހަވާލާދީ އަލް ޤުދުސް އަލް އަރާބީ ނޫހުން ވަނީ، ރޫހީ ލީޑަރު އަލީ ޚާމަނާއީގެ ހުއްދައާއެކު އަހުމަދު އިނީޖާދު ގޭބަންދަށް ބަދަލު ކުރުމަށް އީރާނުގެ ކަމާއިބެހޭ އިދާރާތަކުން މަސައްކަތް ކުރަމުންދާ ކަމަށް ރިޕޯޓް ކޮށްފައެވެ.

މިދިޔަ ޑިސެމްބަރު މަހުގެ ތެރޭގައި ބުޝެއިރު ސިޓީ އަށް ކުރި ދަތުރުފުޅެއްގައި އީރާނުގެ ސަރުކާރުގެ ހިންގުން ބޮއްސުންލާފައިވާ ކަމަށް އަހުމަދީނީޖާދު ވިދާޅުވި ކަމަށް އެނޫހުން ރިޕޯޓް ކޮށްފައިވެއެވެ.

އަދި އީރާނަކީ އެމީހުންގެ އަމިއްލަ ބިމެއްގެ ގޮތުގައި މިހާރުގެ ރައީސް ހަސަން ރޫހާނީ އާ އޭނާގެ ސަރުކާރުން ދެކޭ ކަމަށާއި، އީރާނުގެ ރައްޔިތުންނަކީ ތަންދޮރު ނުދަންނަ ބައެއްގެ ގޮތުގައި އެފަރާތްތަކުން ދެކޭ ކަމަށް އަހުމަދީނީޖާދު ވިދާޅުވި ކަމަށް ރިޕޯޓް ކޮށްފައިވެއެވެ.

މީގެ އިތުރުން އާއްމުންނާއި ގުޅޭ މައްސަލަތަކާއި އާއްމުންގެ ޝަކުވާތަކާއި ދުރަށް ވަޑައިގަތުމަށް ސަރުކާރުގެ އިސް ބައެއް ވެރިން މަސައްކަތް ކުރައްވަމުން ގެންދަވާ ކަމަށާއި، އާއްމު މުޖުތަމައުއެއްގެ ހަގީގަތް ސަރުކާރުގެ އިސްވެރިންނަށް އެނގިވަޑައިނުގަންވަނާ ކަމަށް އޭނާ ވިދާޅުވި އެވެ.

އީރާނުގެ ޝަރުޢީ ނިޒާމުގެ ތެރެއިން ފަސްވަނަ އަށް އެންމެ އިސްވެރިޔާ އަމޯލީ ލަރްޖާނީ ވެސް ވަނީ، ސަރުކާރާއި ދެކޮޅު ބޮޑެތި މުޒާހަރާތަކަކަށް އަހުމަދީނީޖާދު ގޮވާލާފައިވާ ކަމުގެ ތުހުމަތު ކުރައްވާފައެވެ. އަހުމަދީނީޖާދުގެ މައްޗަށް ލަރްޖާނީ ކޮށްފައިވާ ތުހުމަތުތަކަކީ ގޭބަންދުގައި ހުންނެވި ޝިއައީންގެ އިސް ލީޑަރެއް ކަމަށް މެހްދީ ކަރޫބީ އަދި ކުރީގެ ބޮޑުވަޒީރު މީރް ހުސެއިން މޫސަވީގެ މައްޗަށް މީގެ ކުރިން ކުރައްވާފައިވާ ތުހުމަތުތަކެކެވެ.

ލަރްޖާނީ އަށް އިޝާރާތްކޮށް އަހުމަދީނީޖާދު ނެރުއްވާފައިވާ ވީޑިއޯ ބަޔާނެއްގައި ވަނީ، ހުޅަނގަށް ޖާސޫސް ކޮށްދޭނެ ދަރިއަކު އޭނާގެ ނެތް ކަމަށާއި، މުދަލުގެ ވަގު ވިޔަފާރި ކުރާ ބޭބެއަކު އޭނާގެ ނެތް ކަށާއި، އަދި ނަޢަމްސޫފިތައް ބެލެހެއްޓުމަށް ވަގަށް ނަގާފައިވާ ބިމެއް އޭނާގެ ނެތް ކަމަށް ބުނެ، ލަރްޖާނީ އަށް މަލާމާތް ކުރައްވާފައެވެ.

އީރާނުގައި ކުރިއަށްދާ މުޒާހަރާތަކަކީ، 2009 ވަނަ އަހަރު ބޭއްވި އިންތިޚާބުގައި އޭރުގެ ރައީސް މަހްމޫދު އަހުމަދީނީޖާދު އިންތިޚާބު ވެވަޑައިގަތުމާއިގުޅިގެން އުފެދުނު ގްރީން މޫވްމަންޓްގެ މުޒާހަރާތަކަށް ފަހު އީރާނުގެ ސަރުކާރަށް އެންމެ ގޮންޖެހުން ބޮޑު މުޒާހަރާއެވެ.

އާދީއްތަ ދުވަހު ބޭއްވި މުޒާހަރާތަކާއެކު، ޖެހިޖެހިގެން 11 ވަނަ ދުވަހަށް މުޒާހަރާތައް ދެމިގެން ގޮސްފައިވާއިރު، ހުކުރު ދުވަހު ބޭއްވި މުޒާހަރާތައް ހާއްސަކޮށްފައި ވަނީ މި މުޒާހަރާތަކުގައި މިހާތަނަށް މަރުވި މީހުންނަށެވެ. މުޒާހަރާތައް ހުއްޓުވުމަށް ނިކުތް އީރާނުގެ ސަލާމަތީ ބާރުތަކުގެ އަމަލުތަކުގެ ސަބަބުން މިހާތަނަށް 50 މީހަކު މަރުވެފައިވާ ކަމަށް އީރާނުގެ އިދިކޮޅު ފަރާތްތަކުން ބުނެ އެވެ.

އެހެން ނަމަވެސް ސަރުކާރުގެ ތަފާސްހިސާބުތައް ދައްކާ ގޮތުން މުޒާހަރާތަކާއި ގުޅިގެން މިހާތަނަށް މަރުވެފައިވަނީ 22 މީހުންނެވެ.