ގެއްލިގެން ހޯދަމުންދާ ދަފްތަރު ނަމްބަރު 2997 ޝައިމް އަބްދުﷲ އަކީ ކުޑަކުދިންގެ ހިޔާގައި ދަފްތަރު ކުރެވިފައިވާ ކުއްޖެއް ނޫން ކަމަށް ޖެންޑާ މިނިސްޓްރީން ބުނެފިއެވެ.
އެ މިނިސްޓްރީން ބުނެފައިވަނީ ޝައިމް އަކީ ކުށުގެ ވެށިން ގެނެވިފައިވާ ކުއްޖެއް ކަމަށާ އެހެންކަމުން އޭނާ ކުޑަކުދިންގެ ހިޔާއަށް ގެންދެވިފައިވަނީ އޭނާގެ އެސެސްމެންޓްތަކެއް ހެދުމަށްޓަކައި ކަމަށެވެ.
ޖެންޑާ މިނިސްޓްރީން މިހެން ބުނެފައި މި ވަނީ ޝައިމް އަކީ ހިޔާގައި ދަފްތަރު ކުރެވިފައިވާ ކުއްޖެއް ކަމަށް ބުނެ ސޯޝަލް މީޑިއާގައި ބައެއް މީހުން ތަފާތު ވާހަކަތައް ދައްކަމުން ދާ ދަނޑިވަޅެއްގައެވެ.
ޝައިމް ހިޔާގައި ބެހެއްޓިފައިވަނީ އެއްވެސް ހާލެއްގައި އެތަނުގައި މަރުކަޒު ކުރުމަށް ނޫން ކަމަށް ވެސް ޖެންޑާ އިން ބުނެފައިވެއެވެ. އަދި ޝައިމް އެތަނުގައި ހުރި ދުވަސްވަރު ވެސް އެތަނުގެ ކުދިންނާ އެއްތަން ކުރެވިފައި ނުވާނެ ކަމަށް އެ މިނިސްޓްރީން ބުނެފައިވެއެވެ.
ޝައިމް ގެއްލިގެން ފުލުހުންނަށް ރިޕޯޓު ކުރެވިފައިވަނީ 18 ވަނަ އަށް ވީ އާދިއްތަ ދުވަހުއެވެ. އަދި މިހާތަނަށް ވެސް އޭނާގެ އެއްވެސް ހަބަރެއް ލިބިފައި ނުވާ ކަމަށް ރާއްޖެ އެމްވީއަށް މައުލޫމާތު ދެމުން ފުލުހުން ބުނެފައިވެއެވެ.
14 އަހަރުގެ ޝައިމް ގެއްލިގެން ހޯދާތާ ހަ ދުވަސް ވެފައިވާއިރު އޭނާ ހޯދުމަށް ތަނެއް ބަލާ ފާސް ކުރުމަށް ފުލުހުންނަށް ކޯޓުން ދީފައިވާ އަމުރެއް ކަމަށް ބުނާ އަމުރެއްގެ ފޮޓޯއެއް ވަނީ ސޯޝަލް މީޑިއާގައި ދައުރުވެފައެވެ.
